ଭୁବନେଶ୍ବର: ଦୀର୍ଘ ଦିନ ଧରି ନୟାଗଡ଼ ଜିଲ୍ଲାର ରଣପୁର ନିର୍ବାଚନ ମଣ୍ଡଳୀର କେତେକ ପରିବାର କଙ୍ଗାରୁ କୋର୍ଟ ଦ୍ବାରା ବିତାଡିତ ହୋଇ ଗ୍ରାମ ବାହାରେ ଦୟନୀୟ ଭାବେ ଜୀବନ ନିର୍ବାହ କରୁଛନ୍ତି । ତେବେ ସେମାନଙ୍କୁ ଗ୍ରାମରେ ଥଇଥାନ କରିବାକୁ ସରକାରଙ୍କୁ ହାଇକୋର୍ଟଙ୍କ ନିର୍ଦ୍ଦେଶ ଅଛି । ହେଲେ ଏପର୍ଯ୍ୟନ୍ତ ସେମାନଙ୍କୁ ଥଇଥାନ କରାଯାଇନାହିଁ । ତେବେ ରାଜ୍ୟ ଗୃହରାଷ୍ଟ୍ର ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ବିଧାନସଭାରେ ଜଣେ ସଦସ୍ୟଙ୍କ ପ୍ରଶ୍ନର ଉତ୍ତର ଦେଇ ସେମାନଙ୍କୁ ଥଇଥାନ କରାଯାଇଥିବା ଗତ 25 -11-2019 ରେ ପ୍ରକାଶ କରିଛନ୍ତି । ଯାହାକି ସମ୍ପୂର୍ଣ୍ଣ ମିଛ ବୋଲି ସାମ୍ବାଦିକ ସମ୍ମିଳନୀରେ ସଙ୍ଗୀନ ଅଭିଯୋଗ ଆଣିଛି କଂଗ୍ରେସ । ଏହାସହ ମୁଖ୍ୟମନ୍ତ୍ରୀ ତୁରନ୍ତ ଦିବ୍ୟଶଙ୍କରଙ୍କୁ ମନ୍ତ୍ରିମଣ୍ଡଳରୁ ବହିଷ୍କାର କରିବାକୁ ସେ ଦାବି କରିଛନ୍ତି ।
ସୂଚନା ଅନୁସାରେ ରଣପୁର ନିର୍ବାଚନ ମଣ୍ଡଳୀ ଓଡ଼ଗାଁ ବ୍ଲକ ଗୋଡିପାଲ୍ଲୀ ଗ୍ରାମପଞ୍ଚାୟତ ଅନ୍ତର୍ଗତ ଖଳିପାଟଣା ଗ୍ରାମର 12 ପରିବାରକୁ କୌଣସି ଏକ ଘଟଣାକୁ ନେଇ ଗ୍ରାମରେ କଙ୍ଗାରୁ କୋର୍ଟ ଦ୍ବାରା ଦଣ୍ଡବିଧାନ ସ୍ବରୂପ ବିତାଡିତ କରାଯାଇଛି । ଆଜକୁ 11 ବର୍ଷରୁ ଉର୍ଦ୍ଧ ସମୟ ଧରି ସେମାନେ ଗ୍ରାମ ବାହାରେ ବିଭିନ୍ନ ସ୍ଥାନରେ ଆଶ୍ରୟ ନେଇଥିବାବେଳେ ପ୍ରଶାସନ ପକ୍ଷରୁ ସେମାନଙ୍କୁ ଗ୍ରାମକୁ ଫେରାଇ ଆଣିବା ପାଇଁ କୌଣସି ପ୍ରଚେଷ୍ଟା ହୋଇ ନାହିଁ । ଏହି 12 ପରିବାରରୁ କିଛି ସଦସ୍ୟ କଂଗ୍ରେସ ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏହା ପ୍ରକାଶ କରିଛନ୍ତି।
ଯାହାକି ମନ୍ତ୍ରୀ ବିଧାନସଭାର ପବିତ୍ର ଗୃହରେ ରଖିଥିବା ବିବୃତି ଠାରୁ ସମ୍ପୂର୍ଣ୍ଣ ଭିନ୍ନ ଅଟେ ବୋଲି କଂଗ୍ରେସ ଆଣିଛି ଅଭିଯୋଗ । ତେଣୁ ଦଳ ପକ୍ଷରୁ ହାଇକୋର୍ଟର ନିର୍ଦେଶକୁ କାର୍ଯ୍ୟକାରୀ ନକରି ପବିତ୍ର ଗୃହରେ ମିଛ କହିଥିବା ମନ୍ତ୍ରୀ ସାଧାରଣ ଲୋକଙ୍କ ବିଶ୍ବାସ ହରାଇ ସାରିଛନ୍ତି ବୋଲି ପ୍ରକାଶ କରିଛି ଦଳ । ତେଣୁ ମୁଖ୍ୟମନ୍ତ୍ରୀ ତୁରନ୍ତ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଂଗ୍ରେସ ପକ୍ଷରୁ ଦାବି କରାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
