ଭୁବନେଶ୍ବର: ‘ଫନି’କୁ ବିତିଲା ପାଞ୍ଚ ମାସ । ହେଲେ ଏବେ ବି ସୁଧୁରିନି ଲୋକଙ୍କ ସ୍ଥିତି । ଆଜିବି ଅନେକ ଲୋକ ଅନ୍ଧାରରେ ରହୁଛନ୍ତି । ନା ମିଳିଛି ସରକାରୀ ସହାୟତା, ନା କିଏ ବୁଝୁଛି କଷ୍ଟ । ଏପଟେ କେନ୍ଦ୍ର ସରକାର ରାଜ୍ୟକୁ କୋଟି କୋଟି ଟଙ୍କା ଦେଇଥିବା ବେଳେ ରାଜ୍ୟ ସରକାର କେଉଁ ବାଟରେ ଖର୍ଚ୍ଚ କଲେ ସେନେଇ ବିଜେପି ଏସଆରସିଙ୍କ ନିକଟରେ ଅଭିଯୋଗ କରିଛି ।
‘ଫନି’ ବାତ୍ୟାକୁ ଏମଧ୍ୟରେ ପାଞ୍ଚ ମାସ ପୁରୁଛି । ହେଲେ ଫନି ପୂର୍ବରୁ କେନ୍ଦ୍ର ସରକାର ରାଜ୍ୟ ସରକାରଙ୍କୁ ତୁରନ୍ତ 341 କୋଟି ଟଙ୍କା ଦେଇଥିଲେ । ପରେ ପ୍ରଧାନମନ୍ତ୍ରୀ ହଜାର କୋଟି ଟଙ୍କା ସହାୟତା ଦେଲେ । ତେବେ ସରକାରଙ୍କ ରିପୋର୍ଟ ଆଧାରରେ 3800 କୋଟି ଟଙ୍କା ରାଜ୍ୟ ସରକାରଙ୍କୁ ଦେଇଛନ୍ତି ।
କ୍ଷତିଗ୍ରସ୍ତଙ୍କ ବଦଳରେ ସରକାର ଥିଲାବାଲାଙ୍କୁ ଟଙ୍କା ବାଣ୍ଟି ଦେଇଥିବା ଅଭିଯୋଗ ଆଣିଛି ବିଜେପି । ଖାଲି ସେତିକି ନୁହେଁ ଫନି ସହାୟତା ରାଶିକୁ ଦଳୀୟ କର୍ମୀଙ୍କୁ ବାଣ୍ଟି ଦିଆଯାଇଥିବା ଭଳି ସଙ୍ଗୀନ ଅଭିଯୋଗ ଆଣିଛି ବିଜେପି । ଏହାର ତଦନ୍ତ ପାଇଁ ସବୁ ଜିଲ୍ଲାପାଳଙ୍କୁ ଏସଆରସି ନିର୍ଦ୍ଦେଶ ଦିଅନ୍ତୁ ବୋଲି ଦଳ ଦାବି କରିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
