ଭୁବନେଶ୍ବର: ଯାହା ଆକଳନ କରାଯାଉଥିଲା ଶେଷରେ ତାହା ହୋଇଛି । ବିଜେପୁର ଉପ-ନିର୍ବାଚନର ଠିକ ଅବ୍ୟବହିତ ପୂର୍ବରୁ ବିଜେପିକୁ ଜବରଦସ୍ତ ଝଟକା ଦେଇଛନ୍ତି ଅଶୋକ ପାଣିଗ୍ରାହୀ । ଆଜି ଦଳୀୟ ଅବହେଳା ଅଭିଯୋଗ ଆଣି ବିଜେପିରୁ ଇସ୍ତଫା ଦେଇଛନ୍ତି ଅଶୋକ ପାଣିଗ୍ରାହୀ । ଗତ କିଛିଦିନ ହେବ ଅଶୋକ ଗଣମାଧ୍ୟମରେ ନିଜର ଅସନ୍ତୋଷ ପ୍ରକାଶ କରିଥିଲେ । ସେହିଦିନ ଠାରୁ ରାଜ୍ୟରେ ଚର୍ଚ୍ଚା ଚାଲିଥିଲା ଦଳ ଛାଡିବେ ଅଶୋକ ।
ଶେଷରେ ଆଜି ନିଜ ସମର୍ଥକଙ୍କ ସହ ଆଲୋଚନା କରି ଦଳୀୟ ଅବହେଳାର ଅଭିଯୋଗ ଦର୍ଶାଇ ବିଜେପିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ଅଶୋକ ନିଜ ଇସ୍ତଫାରେ ଦର୍ଶାଇଛନ୍ତି ଦଳ ତାଙ୍କୁ କୌଣସି ସାଂଗଠନିକ ଦାୟିତ୍ବ ଦେଲା ନାହିଁ । ପ୍ରାର୍ଥୀ ସଂପର୍କରେ ଆଲୋଚନା କଲେ ନାହିଁ । ଏପରିକି ଦଳ ଉପ-ନିର୍ବାଚନ ପାଇଁ ଜାରି କରିଥିବା ଷ୍ଟାର ପ୍ରଚାରକ ତାଳିକାରେ ମଧ୍ୟ ସାମିଲ କଲା ନାହିଁ । ‘ମୋତେ କୌଣସି ପ୍ରକାରରେ ବିଶ୍ବାସକୁ ନେଲେ ନାହିଁ । ଏଥିଯୋଗୁଁ ମୋ ସମର୍ଥକଙ୍କ ସହ ଆଲୋଚନା କରି ଦଳରୁ ଇସ୍ତଫା ଦେଇଛି । ତେବେ ବିଜେଡିକୁ ଯିବାର କୌଣସି ପ୍ରଶ୍ନ ଉଠୁନାହିଁ ।’ ତେବେ ବିଶ୍ବସ୍ଥ ସୂତ୍ରରୁ ମିଳିଥିବା ସୂଚନା ଅନୁସାରେ ଅଶୋକ ଖୁବଶୀଘ୍ର ବିଜେଡିରେ ଯୋଗଦେବା ନେଇ ଚର୍ଚ୍ଚା ଜୋର ଧରିଛି ।
ସୂଚନାଯୋଗ୍ୟଯେ ବିଜେଡି ଟିକେଟରୁ ବିଧାନସଭାକୁ ଆସିଥିବା ଅଶୋକ ପରବର୍ତ୍ତୀ ସମୟରେ ଗତ 2018 ଉପ-ନିର୍ବାଚନରେ ବିଜେଡି ଛାଡି ବିଜେପିରେ ଯୋଗଦେଇ ପ୍ରାର୍ଥୀ ହୋଇଥିଲେ । ସଂଯୋଗର କଥା ହେଉଛି 2018 ଉପ-ନିର୍ବାଚନ ପୂର୍ବରୁ ଅଶୋକ ବିଜେପିରେ ସାମିଲ ହୋଇଥିଲେ, ଆଉ ଏବେ 2019 ଉପ-ନିର୍ବାଚନ ପୂର୍ବରୁ ସେହି ବିଜେପିକୁ ବାଏବାଏ କରିଛନ୍ତି ।
ଭୁବନେଶ୍ବରରୁ, ଜ୍ଞାନଦର୍ଶୀ ସାହୁଙ୍କ ସହ ବିକାଶ ଦାସ, ଇଟିଭି ଭାରତ
