ଭୁବନେଶ୍ବର: ସାମୟିକ ଭାବେ ବନ୍ଦ ହେବ ଭୁବନେଶ୍ବର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦର । ରନୱେ ରିକାର୍ପେଟିଂ ପାଇଁ 8 ମାସ ପାଇଁ ନଭେମ୍ବର 1 ରୁ ସାମୟିକ ଭାବେ ବନ୍ଦ ରହିବ ବିମାନ ଉଡାଣ ।
ବିମାନ ବନ୍ଦରର ରନୱେ ରିକାର୍ପେଟିଂ ପାଇଁ ବିମାନ ଚଳାଚଳ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଥିବା ସୂଚନା ଦେଇଛନ୍ତି ବିମାନ ବନ୍ଦର ନିର୍ଦ୍ଦେଶକ । ସୂଚନା ଅନୁସାରେ ଆସନ୍ତା ନଭେମ୍ବର 2 ତାରିଖରୁ ମାର୍ଚ୍ଚ 31, 2020 ପର୍ଯ୍ୟନ୍ତ ବିମାନବନ୍ଦର ସାମୟିକ ବନ୍ଦ ରହିବ । ଏହି ସମୟସୀମା ମଧ୍ୟରେ ରାତି 10ଟାରୁ ସକାଳ 5ଟା 30 ଯାଏଁ ବିମାନବନ୍ଦରରେ ବିମାନ ଚଳାଚଳ ବନ୍ଦ ରହିବ।
ସେହିପରି ଆସନ୍ତା 2020 ଏପ୍ରିଲ ମାସ 1 ତାରିଖରୁ ଜୁନ୍ 30 ତାରିଖ ଯାଏ ଦିନବେଳା ବନ୍ଦ ରହିବ ବିମାନ ବନ୍ଦର । ଏହି ସମୟରେ ପୂର୍ବାହ୍ନ 10ଟା 30ରୁ ସନ୍ଧ୍ୟା 6ଟା ଯାଏଁ ବନ୍ଦ ରହିବ ବିମାନ ଚଳାଚଳ । ପ୍ରାୟ 2742 ମିଟରର ରନୱେରେ ରିକାର୍ପେଟିଂ କାର୍ଯ୍ୟ କରାଯିବ । ଏଥିପାଇଁ ଖର୍ଚ୍ଚ ହେବ ପ୍ରାୟ 28 କୋଟି ଟଙ୍କା । 2007ରେ ଶେଷଥର ପାଇଁ ବିଜୁ ପଟ୍ଟନାୟକ ବିମାନ ବନ୍ଦରର ରନୱେ ରିକାର୍ପେଟିଂ କରାଯାଇଥିଲା।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
