ଭୁବନେଶ୍ବର: ରାଜଧାନୀରେ ଜଣେ ସିକ୍ୟୁରିଟି ସୁପରଭାଇଜରଙ୍କୁ ଫିଲ୍ମ ଷ୍ଟାଇଲରେ ଅପହରଣ । ଦ୍ରୁତ ବେଗରେ ଆସିଲେ ଧଳା କାରରେ । ଡୋର ଖୋଲି ଫୋପାଡିଲେ ଲଙ୍କାଗୁଣ୍ଡ । ପରେ ମୁହଁରେ କପଡା ଢାଙ୍କି ନେଇଗଲେ ଅଜଣା ସ୍ଥାନକୁ । ଏମିତି ଢଙ୍ଗରେ ରାଜଧାନୀର ଏୟାରଫିଲଡ ଥାନା ଅଞ୍ଚଳରେ ସୁନ୍ଦରପଦାର ହାଇଟେକ ପ୍ଲାଜା ସିକ୍ୟୁରିଟି ସୁପରଭାଇଜର ବୈକୁଣ୍ଠ ପଟ୍ଟନାୟକଙ୍କୁ ଅପହରଣ କରାଯାଇଥିବା ନେଇ ଆସିଛି ଅଭିଯୋଗ ।
ଏହି ଘଟଣାରେ ଘର ମାଲିକ ରାଜେଶ ମଲିକଙ୍କ ସମ୍ପୃକ୍ତି ଥିବା ପୋଲିସ ନିକଟରେ ଅଭିଯୋଗ ହୋଇଛି । ଅପହୃତଙ୍କୁ ଉଦ୍ଧାର କରାଯାଇଥିବା ବେଳେ ଏନେଇ ପୋଲିସ ତଦନ୍ତ ଜାରି ରଖିଛି । ଅନ୍ୟପଟେ ଲଙ୍କାଗୁଣ୍ଡ ପଡିବା ଯୋଗୁଁ ସିକ୍ୟୁରିଟି ସୁପରଭାଇଜରଙ୍କ ଆଖି ଗୁରୁତର ଭାବେ ଆଘାତ ଲାଗିଛି । ତାଙ୍କୁ କ୍ୟାପିଟାଲ ହସପିଟାଲରେ ଚିକିତ୍ସା କରାଯାଉଛି ।
ସୂଚନା ଅନୁସାରେ, ହାଇଟେକ ପ୍ଲାଜାରେ ରହୁଥିବା ରାଜେଶ ମଲିକ ବିଳମ୍ବିତ ରାତିରେ ଫେରୁଥିବାରୁ ସିକ୍ୟୁରିଟି ଗାର୍ଡ ତାଙ୍କୁ ଅନୁମତି ଦେଉନଥିଲେ । ଯାହାପାଇଁ ସିକ୍ୟୁରିଟି ସୁପରଭାଇଜରଙ୍କ ସହ ଥିଲା ବିବାଦ । ଯାହାକୁ ନେଇ ଆଜି ସକାଳୁ ଏପରି ହୋଇଥିବା ପୋଲିସ ସନ୍ଦେହ କରୁଛି । ତେବେ ପୋଲିସ ଟିମ ଘଟଣାସ୍ଥଳରେ ତଦନ୍ତ ଜାରି ରଖିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
