ଭୁବନେଶ୍ବର: ଗଞ୍ଜେଇ ବେପାରୀଙ୍କ ମିଛ ଧରା ପକାଇଲା ସତ ଘଟଣା । ଗୋ ଦାନା ବସ୍ତାରେ ଗଞ୍ଜେଇ ଚାଲାଣବେଳେ ଖଣ୍ଡଗିରି ଛକରୁ ଧରାପଡିଛନ୍ତି 4 ଅଭିଯୁକ୍ତ । ସେମାନଙ୍କ ନିକଟରୁ ୮୦ କେଜି ଗଞ୍ଜେଇ ସହ ୪ଟି ମୋବାଇଲ ଫୋନ ଓ ଗୋଟିଏ ଇଣ୍ଡିକା କାର OD33D4832କୁ ଜବତ କରିଛି ପୋଲିସ ।
ସୂଚନାନୁସାରେ, କନ୍ଧମାଳରୁ ଗଞ୍ଜେଇ ଆସୁଥିବା ନେଇ ଖବର ପାଇଥିଲା କମିଶନରେଟ ପୋଲିସ । ଏନେଇ ରାଜଧାନୀ ଖଣ୍ଡଗିରି ଥାନା ଅଞ୍ଚଳରେ ଗାଡି ଗୁଡିକୁ ଚେକିଂ କରାଯାଉଥିଲା । ଏହି ସମୟରେ ଏକ ଇଣ୍ଡିଗୋ ଗାଡ଼ିକୁ ଅଟକାଇଥିଲା ପୋଲିସ । ଘଟଣାରେ ୪ ଜଣଙ୍କ ଉପରେ ସନ୍ଦେହ ହେବାରୁ ସେମାନଙ୍କ ଗାଡ଼ି ଚେକିଂ କରିଥିଲେ । ସମସ୍ତ ଅଭିଯୁକ୍ତ ଗାଡ଼ିରେ ଗୋ ଦାନା ଥିବା କହିଥିଲେ ।
ତେବେ ବସ୍ତା ଉପରେ ଗୋ ଦାନା ଚିତ୍ର ଦେଖି ପ୍ରଥମେ ପୋଲିସ ଛାଡି ଦେବାକୁ ଭାବିଥିଲା । ହେଲେ ହଠାତ୍ ଚେକିଂ କରୁଥିବା ଅଧିକାରୀ ଇଣ୍ଡିଗୋ କାରରେ ଗୋ ଦାନା ନେଇ ସନ୍ଦେହ ହେବାରୁ ପ୍ୟାକେଟ ଖୋଲି ଚେକ କରିଥିଲେ । ଏହି ସମୟରେ ଧରାପଡିଥିଲା ଅଭିଯୁକ୍ତଙ୍କ ଚାଲାକି ।
ଉକ୍ତ ଘଟଣାରେ ଗିରଫ 4 ଅଭିଯୁକ୍ତ ହେଲେ କନ୍ଧମାଳର ବିନୋଦ ଦିଗଲ, ଜ୍ୟୋତିରାଜ ଦିଗଲ, ରାମକୃଷ୍ଣ କହଁର, ଲକ୍ଷ୍ମୀଧର ଦାସ । ଏମାନଙ୍କୁ ଏନଡିପିଏସ ଆକ୍ଟରେ ଗିରଫ କରିଛି ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
