ଭୁବନେଶ୍ବର: ଓଡିଶାରେ ଅପପୁଷ୍ଟି ବା କୁପୋଷଣ ସ୍ଥିତି ଗମ୍ଭୀର । ବର୍ତ୍ତମାନ ସମୟରେ ରାଜ୍ୟର ୪୫୨ ଶିଶୁ ଗୁରୁତର ଅପପୁଷ୍ଟି (SAM) ର ଶିକାର ହୋଇଛନ୍ତି । ଶନିବାର ଓଡ଼ିଶା ସରକାର ଏ ନେଇ ସ୍ବୀକାର କରିଛନ୍ତି ।
ବିଧାନସଭା ଅଧିବେଶନ କାଳରେ ଏକ ପ୍ରଶ୍ନର ଜବାବରେ ମହିଳା ଓ ଶିଶୁ କଲ୍ୟାଣ ଏବଂ ମିଶନ ଶକ୍ତି ମନ୍ତ୍ରୀ ଟୁକୁନି ସାହୁ ରାଜ୍ୟରେ ଅପପୁଷ୍ଟିରେ ପୀଡିତ ଶିଶୁଙ୍କ ତଥ୍ୟ ଦେଇଛନ୍ତି । ସେ ଦେଇଥିବା ସୂଚନା ଅନୁସାରେ ନବରଙ୍ଗପୁର ଜିଲ୍ଲାରେ ସର୍ବାଧିକ ସଂଖ୍ୟକ ଶିଶୁ ଅପପୁଷ୍ଟିରେ ପୀଡିତ ଅଛନ୍ତି । ଏହି ଜିଲ୍ଲାରେ ସମୁଦାୟ 57 ଅପପୁଷ୍ଟି ଶିଶୁ ରହିଛନ୍ତି ।
ତେବେ ପୁଷ୍ଟିହୀନତାକୁ ପ୍ରତିହିତ ପାଇଁ ସରକାର ନେଇଥିବା ପଦକ୍ଷେପ ସମ୍ପର୍କରେ ବିଭାଗୀୟ ମନ୍ତ୍ରୀ ଗୃହକୁ ସୂଚନା ଦେଇଛନ୍ତି । ଶୀଘ୍ର ସମୀକ୍ଷା ପରେ SAM ପିଲାମାନଙ୍କୁ ଚିହ୍ନଟ କରିବା ପାଇଁ ସରକାର ପଦକ୍ଷେପ ନେଇଥିଲେ ବୋଲି ସେ କହିଛନ୍ତି ।
ପୁଷ୍ଟିକର ଖାଦ୍ୟ ଯୋଗାଇବା ଏବଂ SAM ରେ ପୀଡିତ ପିଲାମାନଙ୍କ ଅଧିକ ଯତ୍ନ ନେବା ପାଇଁ ସେମାନଙ୍କୁ ପୁଷ୍ଟିକର ପୁନର୍ବାସ କେନ୍ଦ୍ର (NRC) କୁ ସ୍ଥାନାନ୍ତର କରାଯାଇଛି । ଅଙ୍ଗନୱାଡି କର୍ମୀଙ୍କୁ ପ୍ରତି ଘରେ ପହଞ୍ଚି ସଚେତନତା ସୃଷ୍ଟି କରିବାକୁ ନିର୍ଦ୍ଦେଶ ଦିଆଯାଇଛି ।
ମନ୍ତ୍ରୀ କହିଛନ୍ତି ଯେ, ଛଅ ମାସରୁ ତିନି ବର୍ଷ ବୟସ ବର୍ଗର କମ ଓଜନ ବିଶିଷ୍ଟ ପିଲାମାନଙ୍କୁ ଇଣ୍ଟିଗ୍ରେଟେଡ୍ ଶିଶୁ ବିକାଶ ସେବା ଅଧୀନରେ ଅତିରିକ୍ତ ପୁଷ୍ଟିକର ଖାଦ୍ୟ ଯୋଗାଇ ଦିଆଯାଇଛି ।
ଶନିବାର ପୁଷ୍ଟିହୀନତାର ଶିକାର ହୋଇଥିବା ପିଲାମାନଙ୍କର ଜିଲ୍ଲାସ୍ତରୀୟ ତାଲିକା ପ୍ରଦାନ କରିବାକୁ ଏବଂ ଏହି ବିପଦକୁ ରୋକିବା ପାଇଁ ସରକାର କେଉଁ ପଦକ୍ଷେପ ନେଇଛନ୍ତି ସେ ନେଇ ଗୃହରେ କଂଗ୍ରେସ ନେତା ସନ୍ତୋଷ ସିଂହ ସାଲୁଜା ବିଭାଗୀୟ ମନ୍ତ୍ରୀଙ୍କୁ ଜବାବ ମାଗିଥିଲେ ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
