ଭୁବନେଶ୍ୱର: ନିର୍ବାଚନ ସମୟ ପାଖେଇ ଆସୁଥିବା ବେଳେ ରାଜଧାନୀ ସାଜିଛି ଅପରାଧୀଙ୍କ ପେଣ୍ଠସ୍ଥଳୀ । ନିର୍ବାଚନ ପାଇଁ ଅପରାଧୀ ଅପରାଧ ଜନିତ ଗତିବିଧିକୁ ମଧ୍ୟ ବୃଦ୍ଧି କରିଛନ୍ତି । କିନ୍ତୁ ଅପରାଧୀଙ୍କ ଏହି ଯୋଜନାକୁ ପଣ୍ଡ କରିଛି କ୍ୟୁଏଟି । ଏଥିସହ ୪ ଜଣଙ୍କୁ ଗିରଫ ମଧ୍ୟ କରିଛି । ଗିରଫ ଅଭିଯୁକ୍ତଙ୍କ ନିକଟରୁ ବିଭିନ୍ନ ମାରଣାସ୍ତ୍ର, ମୋବାଇଲ ଫୋନ, ମାଉଜର ଓ ୨ଟି ଗୁଳି ଜବତ ହୋଇଛି । ଏମାନଙ୍କର ଚୋରା ବନ୍ଧୁକ ଓ ନିଶା କାରବାର ଭଳି ବେଆଇନ କାର୍ଯ୍ୟରେ ସମ୍ପୃକ୍ତି ରହିଛି । ଏମାନେ ବିଭିନ୍ନ ସ୍ଥାନରେ ଆକ୍ରମଣ ପରେ ଲୁଟ କରି ଫେରାର ହୋଇଯାଉଥିଲେ ।
ସୂଚନା ଅନୁଯାୟୀ, ଧଉଳି ଥାନା ଅଞ୍ଚଳରେ ଧଉଳି ଥାନା ଓ କ୍ୟୁଏଟିର ଏକ ଟିମ ମିଳିତ ଭାବେ ଚଢାଉ କରିଥିଲେ । ଏହି ଚଢାଉ ବେଳେ 4 ଜଣ ଯୁବକ ଡକାୟିତ ଉଦ୍ୟମ କରୁଥିବା ବେଳେ ଉଭୟ ଟିମ ସେମାନଙ୍କୁ ଗିରଫ କରିଥିଲା । ଏ ସମସ୍ତ ଅପରାଧୀ ବାହାର ରାଜ୍ୟର ହୋଇଥିବା ବେଳେ ଏମାନେ ଭୁବନେଶ୍ଵରରେ ଭଡା ଘର ନେଇ ରହୁଥିଲେ । ଫଳରେ ଏମାନଙ୍କୁ ବିଭିନ୍ନ ଅପରାଧମୂଳକ କାର୍ଯ୍ୟ କରିବାକୁ ସୁବିଧା ମିଳୁଥିଲା । ତେବେ ଏହି ଲୁଟେରାଙ୍କ ଅନ୍ୟ କେଉଁ ଅପରାଧିକ ମାମଲାରେ ସମ୍ପର୍କ ରହିଛି ସେ ନେଇ ମଧ୍ୟ ତଦନ୍ତ ଜାରି ରଖିଛି ପୋଲିସ ।
ରାଜଧାନୀରେ ଅପରାଧୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଅପରାଧୀଙ୍କୁ ଧରିବାରେ ପୋଲିସ ବିଫଳ । ଏହିସବୁ ଅପରାଧ ଉପରେ ରୋକ ଲଗାଇବାକୁ ସକାଳ ସମୟରେ ସ୍ଥାନୀୟ ପୋଲିସକୁ ବାଇକ୍ ଓ ପିସିଆର ଯୋଗାଇ ଦିଆଯାଇଛି ।
ଭୁବନେଶ୍ୱରରୁ ବିକାଶ ଦାସ, ଇଟିଭି ଭାରତ
