ବ୍ରହ୍ମପୁର: କାଜୁ ଜଙ୍ଗଲରୁ ମିଳିଲା ମହିଳାଙ୍କ ରକ୍ତାକ୍ତ ମୃତଦେହ । ଏଭଳି ଚାଞ୍ଚଲ୍ୟ ଖେଳାଇଦେବା ଭଳି ଘଟଣା ଘଟିଛି ଗଞ୍ଜାମ ଜିଲ୍ଲାର ଖଲ୍ଲିକୋଟ ଥାନା ଅନ୍ତର୍ଗତ ତାଳପଡା ପଞ୍ଚାୟତରେ । ମହିଳାଙ୍କ ଏହି ମୃତଦେହଟି ଲକ୍ଷ୍ମୀନାରାୟଣପୁର କାଜୁ ଜଙ୍ଗଲରୁ ମିଳିଛି । ପୋଲିସର ପ୍ରାଥମିକ ତଦନ୍ତ ପରେ ମୃତଦେହଟି ଗୋଳନ୍ଥରା ଥାନା ଅନ୍ତର୍ଗତ ଗୋବିନ୍ଦ ନଗର ଅଞ୍ଚଳର ଲକ୍ଷ୍ମୀ ସାହୁଙ୍କର ବୋଲି ଜଣାପଡ଼ିଛି ।
ସୂଚନା ଅନୁସାରେ, ମୃତ ମହିଳା ଜଣକ କୋରାପୁଟ ଜିଲ୍ଲା ଦାମନଯୋଡିରେ କିଛି ବର୍ଷ ହେଲା ବିବାହ କରିଥିଲେ । ତାଙ୍କ ସ୍ବାମୀ ଗୋବିନ୍ଦ ସାହୁ ରାଜ୍ୟ ବାହାରେ ରହି ଏକ ଘରୋଇ କମ୍ପାନୀରେ କାର୍ଯ୍ୟରତ ଅଛନ୍ତି । ଗତକାଲି ଏହି ମହିଳା ଜଣକ ଏକ ଘରୋଇ ବ୍ୟାଙ୍କକୁ ଯିବେ କହି ଘରୁ ବାହାରି ଆସିଥିବା ବେଳେ ଆଉ ଘରକୁ ଫେରିନଥିଲେ । ଫଳରେ ଲକ୍ଷ୍ମୀଙ୍କ ଭଉଣୀ ଏନେଇ ସ୍ଥାନୀୟ ଗୋଳନ୍ଥରା ଥାନାକୁ ଅବଗତ କରାଇଥିଲେ ।
ପୋଲିସର ତଦନ୍ତ ପରେ ଖଲ୍ଲିକୋଟ ନିକଟସ୍ଥ ଏକ କାଜୁ ଜଙ୍ଗଲରେ ମହିଳାଙ୍କ ମୃତଦେହ ମିଳିବା ସହ ଶରୀରର ବିଭିନ୍ନ ସ୍ଥାନରେ କ୍ଷତାକ୍ତ ଚିହ୍ନ ଦେଖିବାକୁ ମିଳିଥିଲା । ଏହାସହ ମୃତଦେହ ପାଖରୁ ଏକ ଭ୍ୟାନିଟ ବ୍ୟାଗ ସହ ମୋବାଇଲ ମିଳିଛି ।
ଖବର ପାଇ ସ୍ଥାନୀୟ ପୋଲିସ ଓ ଛତ୍ରପୁର ଏସଡିପିଓ ଉତ୍କଳ କେଶରୀ ଦାସ, ଆଇଆଇସି ସୁନୀଲ କୁମାର ବେହେରା ପ୍ରମୁଖ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି । ମହିଳାଙ୍କ ଶରୀରର ୧୫ରୁ ଊର୍ଦ୍ଧ୍ବ ସ୍ଥାନରେ ଛୁରୀରେ ଆକ୍ରମଣ କରାଯାଇଥିବା ଅନୁମାନ କରାଯାଉଛି ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
