ବାଲେଶ୍ବର: ପାର୍ବଣରେ ସାଧାରଣ ଲୋକ ଯେମିତି ବାସି ଖାଦ୍ୟ ଖାଇ ଅସୁସ୍ଥ ନ ହୁଅନ୍ତି, ସେଥିପ୍ରତି ଦୃଷ୍ଟି ଦେଉଛି ଖାଦ୍ୟ ସୁରକ୍ଷା ବିଭାଗ । ଏନେଇ ବିଭାଗ ପକ୍ଷରୁ ଲଗାତର ଭାବେ ସହରର ବିଭିନ୍ନ ହୋଟେଲ, ମିଠା ଦୋକାନରେ ଚଢ଼ାଉ କରି ବାସି ଖାଦ୍ୟ ନଷ୍ଟ କରିବା ସହ ସମ୍ପୃକ୍ତ ଦୋକାନରୁ ଜୋରିମାନା ମଧ୍ୟ ଆଦାୟ କରାଯାଉଛି ।
ଖାଦ୍ୟ ସୁରକ୍ଷା ଟିମ ଗତକାଲି ବିଭିନ୍ନ ମିଠା ଦୋକାନ ଓ ହୋଟେଲରେ ଚଢ଼ାଉ କରି ଫାଇନ ଆଦାୟ କରିବା ସହ ବାସି ମିଠା ନଷ୍ଟ କରିଥିଲା । ସେହିପରି ମିଠା ପ୍ୟାକେଟ ଉପରେ ପ୍ରସ୍ତୁତିର ତାରିଖ ମଧ୍ୟ ଲେଖିବା ପାଇଁ ଦୋକାନୀଙ୍କୁ ତାଗିଦ କରାଯାଇଥିଲା । ସେହିପରି ଆଜି ମଙ୍ଗଳବାର ମଧ୍ୟ ସହରର 11ଟି ହୋଟେଲରେ ଖାଦ୍ୟ ସୁରକ୍ଷା ବିଭାଗର ଅଧିକାରୀ ଚଢାଉ କରିଛନ୍ତି । ହୋଟେଲରେ ଥିବା ପ୍ରାୟ 60 କେଜି ବାସି ଖାଦ୍ୟ ନଷ୍ଟ କରାଯାଇଛି । ଏହି ଖାଦ୍ୟର ମାନ ଯାଞ୍ଚ ଓ କାର୍ଯ୍ୟାନୁଷ୍ଠାନ ପ୍ରକ୍ରିୟା ଲଗାତର ଭାବେ ଜାରି ରହିବା ନେଇ ଜିଲ୍ଲା ଖାଦ୍ୟ ସୁରକ୍ଷା ଅଧିକାରିଣୀ ଅନୁଶ୍ରୀ ଖଟୁଆ ସୂଚନା ଦେଇଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
