ନୂଆଦିଲ୍ଲୀ: ଅଭିବୃଦ୍ଧି ହାର ଆକଳନରେ ଦେଶର ସର୍ବୋଚ୍ଚ ବ୍ୟାଙ୍କ ସହ ସହମତ ହେଲେ କେନ୍ଦ୍ର ସରକାର । 2019-20 ଆର୍ଥିକ ବର୍ଷରେ ଭାରତର ମୋଟ ଘରୋଇ ଉତ୍ପାଦ(ଜିଡିପି) 5 ପ୍ରତିଶତକୁ ଖସିବ ବୋଲି ସରକାରୀ ଗଣନାରୁ ଜଣାପଡିଛି ।
ଏହା ଗତବର୍ଷ ଅର୍ଥାତ 2018-19 ଆର୍ଥିକ ବର୍ଷରେ ବିକାଶ ହାର 6.8 ପ୍ରତିଶତ ରହିଥିଲା । ମଙ୍ଗଳବାର କେନ୍ଦ୍ରୀୟ ପରିସଂଖ୍ୟାନ କାର୍ଯ୍ୟାଳୟ (ସିଏସଓ) ରାଷ୍ଟ୍ରୀୟ ଆୟର ପ୍ରଥମ ଅଗ୍ରୀମ ଅନୁମାନ ଜାରି କରିଛି । ଏଥିରେ କୁହାଯାଇଛି ଯେ, ବିନିର୍ମାଣ କ୍ଷେତ୍ରରେ ଅଭିବୃଦ୍ଧି ଦର ଖସୁଥିବାରୁ ଦେଶର ଜିଡିପି ହ୍ରାସ ପାଇବ ।
ପ୍ରକାଶ ଯେ, ଚଳିତ ଆର୍ଥିକ ବର୍ଷ ବିନିର୍ମାଣ କ୍ଷେତ୍ରର ଅଭିବୃଦ୍ଧି ଦର ହ୍ରାସ ପାଇ 2 ପ୍ରତିଶତ ରହିବ ବୋଲି ଅନୁମାନ ରହିଛି । ଯେତେବେଳେ କି ଗତ ଆର୍ଥିକ ବର୍ଷରେ ଏହା 6.2 ପ୍ରତିଶତ ରହିଥିଲା । ସେହିପରି କୃଷି, ନିର୍ମାଣ, ବିଦ୍ୟୁତ, ଗ୍ୟାସ ଓ ଜଳଯୋଗଣ ଭଳି ପ୍ରମୁଖ କ୍ଷେତ୍ରରେ ବୃଦ୍ଧି ଦର କମିବ । ସେପଟେ ଖନନ, ଲୋକ ପ୍ରଶାସନ ଓ ରକ୍ଷା ଭଳି କ୍ଷେତ୍ରରେ ସାମାନ୍ୟ ସୁଧାର ଆସିବ ବୋଲି ଅନୁମାନ ରହିଛି ।
ଗତ ମାସରେ ଭାରତୀୟ ରିଜର୍ଭ ବ୍ୟାଙ୍କ ମଧ୍ୟ ୨୦୧୯-୨୦ ଜିଡିପିକୁ 5 ପ୍ରତିଶତକୁ ଖସାଇଥିଲା । ପୂର୍ବରୁ ଏହି ଅନୁମାନ 6.1 ପ୍ରତିଶତ ରହିବ ବୋଲି ଗଣନା ରହିଥିଲା ।
