ଭୁବନେଶ୍ବର: ପଲିଥିନ୍ ବ୍ୟବହାର ନେଇ ରାଜଧାନୀରେ ବିଏମସି ପକ୍ଷରୁ ଚଢାଉ କରାଯାଇଛି । ବିଏମସିର 2ଟି ଟିମ୍ ଏହି ଚଢାଉ କରିଥିଲେ । ବିଏମସି ଅଧିକାରୀଙ୍କ ସହ କମିଶନରେଟ ପୋଲିସ ଏବଂ ଯୋଗାଣ ବିଭାଗର ଅଧିକାରୀ ମାନେ ମଧ୍ୟ ଏଥିରେ ସାମିଲ ଥିଲେ ।
ରାଜଧାନୀର 1 ନମ୍ବର ହାଟ, ମାଷ୍ଟର କ୍ୟାଣ୍ଟିନ ଉଠା ଦୋକାନୀ, ରୂପାଲି ସ୍କୋୟାର , ଭେଣ୍ଡିଂଜୋନ, ଗୋପବନ୍ଧୁ ଛକ ଆଦି ସ୍ଥାନ ମାନଙ୍କରେ ଥିବା ବିଭିନ୍ନ ଜଳଖିଆ ଓ ଉଠା ଦୋକାନୀ ଗୁଡିକରେ ଏହି ଚଢାଉ କରାଯାଇଥିଲା । ଚଢାଉ ବେଳେ 75 କେଜିର ପଲିଥିନ ଜବତ କରାଯାଇଛି । ବିଶେଷ କରି ଜଳଖିଆ ଦୋକାନ, ତେଜରାତି, ପରିବା ଓ ଫଳ ଦୋକାନରେ ଏହାର ଅଧିକ ବ୍ୟବହାର ହେଉଥିବା ଦେଖିବାକୁ ମିଳିଛି ।
ଚଢାଉର ପ୍ରଥମ ଦିନରେ ୭୫ କେଜି ଜବତ ପରେ ଆଗାମୀ ଦିନରେ ଚଢାଉ ଜୋରଦାର ହେବ ବୋଲି ବିଏମସି ପକ୍ଷରୁ ସୂଚନା ମିଳିଛି । ପଲିଥିନ ଜବତ ପରେ ପଲିଥିନ ବ୍ୟବହାରକାରୀ ଙ୍କ ଠାରୁ ଫାଇନ ଆଦାୟ କରାଯିବା ସହ ପରବର୍ତ୍ତୀ ପର୍ଯ୍ୟାୟରେ ପଲିଥିନ ବ୍ୟବହାର କଲେ ଦୋକାନ ବନ୍ଦ କରି ଦିଆଯିବ । ତେବେ ଜବତ ପଲିଥିନକୁ କଟକ ରୋଡ ସ୍ଥିତ ଯାତ୍ରୀ ନିବାସରେ ରଖାଯାଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
