ଲକ୍ଷ୍ନୌ: ଉତ୍ତରପ୍ରଦେଶରେ ଆଜି ଠାରୁ ଜାରି ହେଲା ରାତ୍ରିକାଳୀନ କର୍ଫ୍ୟୁ । ସମସ୍ତ ଶିକ୍ଷାନୁଷ୍ଠାନ ମଧ୍ୟ ବନ୍ଦ ରଖିବାକୁ ନିଷ୍ପତ୍ତି ହୋଇଛି । ଆଜି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏକ ଉଚ୍ଚସ୍ତରୀୟ ବୈଠକରେ ରାଜ୍ୟର କୋଭିଡ ସ୍ଥିତି ସମୀକ୍ଷା କରିବା ପରେ ଏହି ନିଷ୍ପତ୍ତି ନେଇଛନ୍ତି । ସମଗ୍ର ରାଜ୍ୟରେ ରାତି 10 ଟାରୁ 6 ଟା ମଧ୍ୟରେ ରାତ୍ରି କର୍ଫ୍ୟୁ ଲାଗୁ କରାଯାଇଛି । ଚଳିତ ମାସ 16 ପର୍ଯ୍ୟନ୍ତ ସମସ୍ତ ଶିକ୍ଷାନୁଷ୍ଠାନରେ ଅଫଲାଇନ କ୍ଲାସ୍ ମଧ୍ୟ ସ୍ଥଗିତ ରଖାଯାଇଛି । ସେହିପରି ପୂର୍ବରୁ ନିର୍ଦ୍ଧାରିତ ହୋଇସାରିଥିବା ପରୀକ୍ଷା ଉକ୍ତ ସୂଚୀ ଅନୁସାରେ ହେବା ନେଇ ସରକାର ପଦକ୍ଷେପ ଗ୍ରହଣ କରିବେ ବୋଲି ମଧ୍ୟ ନିଷ୍ପତ୍ତି ହୋଇଛି ।
ଆଜି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ଅଧକ୍ଷତା କରିଥିଲେ । ଏହି ବୈଠକରେ ତାଙ୍କୁ ରାଜ୍ୟର କୋଭିଡ ସଂକ୍ରମଣ ଓ ସ୍ଥିତି ସମ୍ପର୍କରେ ସଦ୍ୟତମ ତଥ୍ୟ ପ୍ରଦାନ କରାଯାଇଥିଲା । ତେବେ ଆଜିର ବୈଠକ ପରେ ଏହି ନୂଆ ନିୟମ ସହ ଅନ୍ୟ କିଛି କୋଭିଡ ଗାଇଡଲାଇନ ମଧ୍ୟ ଜାରି କରିଛନ୍ତି ଯୋଗୀ ସରକାର ।
ମନିଟରିଂ କମିଟି ଏବଂ ଇଣ୍ଟିଗ୍ରେଟେଡ୍ କୋଭିଡ୍ କମାଣ୍ଡ ସେଣ୍ଟର ଗୁଡ଼ିକ ସମ୍ପୂର୍ଣ୍ଣ କାର୍ଯ୍ୟକ୍ଷମ କରିବା ସହ ମନିଟରିଂ କମିଟି, ଆମ୍ବୁଲାନ୍ସ ଏବଂ ଟେଲି କନସଲଟେସନ୍ ପାଇଁ ଅଲଗା ନମ୍ବର ପ୍ରଦାନ କରାଯିବା ଉପରେ ଗୁରୁତ୍ବ ଦେଇଛନ୍ତି ସରକାର । ସେହିପରି ପ୍ରତ୍ୟେକ ଜିଲ୍ଲାରେ ଡାକ୍ତରଙ୍କ ଏକ ପ୍ୟାନେଲ ନିୟୋଜନ କରି ଲୋକଙ୍କ ପାଇଁ ଟେଲି କନସଲଟେସନ୍ ସୁବିଧା ମଧ୍ୟ ଉପଲବ୍ଧ କରାଯିବା ପାଇଁ ନିଷ୍ପତ୍ତି ହୋଇଛି । କୋଭିଡ ଚିକିତ୍ସା ପାଇଁ ଆବଶ୍ୟକ ଜରୁରୀ ଔଷଧ ଓ ଅନ୍ୟାନ୍ୟ ଜରୁରୀ ମେଡିକାଲ ସାମଗ୍ରୀ ମହଜୁଦ ରଖିବା ଉପରେ ମଧ୍ୟ ଯୋଗୀ ସରକାର ସମସ୍ତ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ।
ଉତ୍ତର ପ୍ରଦେଶ ସ୍ବାସ୍ଥ୍ୟ ବିଭାଗ ସୂଚନା ଅନୁଯାୟୀ, ଗତ 24 ଘଣ୍ଟା ମଧ୍ୟରେ ରାଜ୍ୟରେ ମୋଟ 6,411 ଟି ନୂଆ ସଂକ୍ରମଣ ମାମଲା ମଧ୍ୟ ସାମ୍ନାକୁ ଆସିଛି । ଆଜିର ସଂକ୍ରମିତଙ୍କ ମଧ୍ୟରେ ରାଜଧାନୀ ଲକ୍ଷ୍ନୌରୁ 867 ଟି ମାମଲା ଥିବାବେଳେ ଗୌତମବୁଦ୍ଧ ନଗରରୁ 1,141 ଟି, ମିରଟରୁ 636 ଟି ଏବଂ ଗାଜିଆବାଦରୁ 683 ଟି ମାମଲା ସାମ୍ନାକୁ ଆସିଥିବା ରାଜ୍ୟ ସ୍ବାସ୍ଥ୍ଯ ବିଭାଗ କହିଛି ।
ANI
