ଜୟପୁର: ହିନ୍ଦୁ ନବବର୍ଷ ପାଳନ ସମୟରେ ପଥର ଫିଙ୍ଗିଲେ ଦୁର୍ବୃତ୍ତ । ୪୨ ଜଣ ସାଧାରଣ ଜନତାଙ୍କ ସମେତ ୪ ପୋଲିସ କର୍ମଚାରୀ ଆହତ ହୋଇଥିବା ସୂଚନା । ରାଜସ୍ଥାନର କରୌଲି ଅଞ୍ଚଳରେ ଏପରି ଘଟଣା ସାମ୍ନାକୁ ଆସୁଛି ।
ଆଜି (ଶନିବାର) ହିନ୍ଦୁ ନବବର୍ଷ ଅବସରରେ ବାଇକ ରାଲି ଚାଲିଥିଲା । ଏହି ସମୟରେ ହଠାତ୍ କେତେକ ଦୁର୍ବୃତ୍ତ ଲୋକଙ୍କ ଉପରକୁ ପଥର ଫିଙ୍ଗିଥିଲେ । ଏନେଇ ଖବର ପାଇ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି, ପରିସ୍ଥିତିକୁ ନିୟନ୍ତ୍ରଣକୁ ଆଣିବାକୁ ଉଦ୍ୟମ କରିଛି । ସୁରକ୍ଷାକୁ ଦୃଷ୍ଟିରେ ରଖି ସ୍ଥାନୀୟ ଅଞ୍ଚଳରେ ୧୪୪ ଧାରା ଜାରି କରାଯାଇଛି ।
ଏଥିସହ ଇଣ୍ଟରନେଟ ସେବା ମଧ୍ୟ ବନ୍ଦ କରାଯାଇଛି । ଆସନ୍ତା ସୋମବାର ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ । ସୁରକ୍ଷା ପାଇଁ ଅତିରିକ୍ତ ପୋଲିସ ଫୋର୍ସ ମୁତୟନ କରାଯାଇଥିବା କରୌଲି ଜିଲ୍ଲାପାଳ ରାଜେନ୍ଦ୍ର ଶେଖୱାତ କହିଛନ୍ତି । ଏହିପରି ଜିଲ୍ଲାର ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି । ଉତ୍ତେଜନା ଦେଖା ଦେଇଥିଲେ ମଧ୍ୟ ପରିସ୍ଥିତି ନିୟନ୍ତ୍ରଣାଧୀନ ଥିବା ଜିଲ୍ଲାପାଳ କହିଛନ୍ତି ।
