ଗାନ୍ଧୀନଗର: ଗୁଜୁରାଟ ଆନନ୍ଦ ଜିଲ୍ଲାରେ ମର୍ମନ୍ତୁଦ ସଡକ ଦୁର୍ଘଟଣା । ଗୋଟିଏ କାର୍ ଏକାସାଙ୍ଗରେ ଅଟୋ ଏବଂ ବାଇକକୁ ପଛପଟୁ ଧକ୍କା ଦେବା ଯୋଗୁଁ ଘଟଣାସ୍ଥଳରେ ୬ ଜଣଙ୍କର ମୃତ୍ୟୁ ହୋଇଛି । ଏଥିରେ ଜଣେ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୪ ଅଟୋ ଯାତ୍ରୀ ଏବଂ ଦୁଇ ଜଣ ବାଇକ ଆରୋହୀ ରହିଥିବା ପୋଲିସ ସୂଚନା ଦେଇଛି । ଗୁରୁବାର ସନ୍ଧ୍ୟା ସମୟରେ ଆନନ୍ଦ ଜିଲ୍ଲାର ସୋଜିତ୍ରା ତହସିଲ ଅନ୍ତର୍ଗତ ଦାଲି ଗାଁରେ ଏହି ଦୁର୍ଘଟଣା ଘଟିଛି । ସବୁଠୁ ବଡ କଥା ହେଉଛି, ଏହି ଦୁର୍ଘଟଣା ଘଟାଇଥିବା ଅଭିଯୁକ୍ତ ସୋଜିତ୍ରା ନିର୍ବାଚନ ମଣ୍ଡଳୀର କଂଗ୍ରେସ ବିଧାୟକଙ୍କ ଜ୍ବାଇଁ ଖେତନ୍ ପଧିୟାର୍ ବୋଲି ଜଣାପଡିଛି । ପୋଲିସ ଅଭିଯୁକ୍ତକୁ ଗିରଫ କରିଛି ।
ଗତକାଲି ସନ୍ଧ୍ୟା ୭ଟା ସମୟରେ ଏହି ଦୁର୍ଘଟଣା ଘଟିଛି । ମୃତକଙ୍କ ମଧ୍ୟରେ କିଛି ଗୋଟିଏ ପରିବାରର ସଦସ୍ୟ ରହିଛନ୍ତି । ସେମାନେ ରକ୍ଷାବନ୍ଧନ ଉତ୍ସବ ପାଳନ କରି ଫେରୁଥିବା ସମୟରେ ବାଟରେ ଦୁର୍ଘଟଣାର ଶିକାର ହୋଇଛନ୍ତି । ବିଧାୟକଙ୍କ ଜ୍ବାଇଁଙ୍କ କାର୍ ଅଟୋ ଓ ବାଇକକୁ ପଛପଟୁ ଧକ୍କା ଦେଇଥିବା ପୋଲିସ ସ୍ପଷ୍ଟ କରିଛି । ଏହି ଘଟଣାରେ ଅଧିକ ତଦନ୍ତ ଜାରି ରହିଛି ।
