ମୁମ୍ବାଇ: ଆପଣମାନେ ଖାଇବା ପାଇଁ ରେସ୍ତୋରାଁ ଯାଉଛନ୍ତି କି ? ତାହାଲେ ହୋଇଯାଆନ୍ତୁ ସାବଧାନ । କାରଣ ଷ୍ଟାଟରରେ ଚିକେନ ବଦଳରେ ପରସା ଯାଉଛି ପାରା । ମୁମ୍ବାଇର କିଛି ରେସ୍ତୋରାଁ ଏବଂ ବାରରେ ପାରା ମାଂସ ପରସା ଯାଉଥିବା ନେଇ ଅଭିଯୋଗ ହୋଇଛି । ଜଣେ ଅବସରପ୍ରାପ୍ତ ସେନା ଅଧିକାରୀଙ୍କ ଅଭିଯୋଗ ଆଧାରରେ ସିଓନ ପୋଲିସ ମାମଲା ରୁଜୁ କରି ତଦନ୍ତ କରୁଛି ।
ମୁମ୍ବାଇର ସିଓନ ଥାନା ଅଞ୍ଚଳରେ ଏକ ବିଲ୍ଡିଂର ଛାତ ଉପରେ ପାରା ପାଳନ କରି ହୋଟେଲକୁ ଯୋଗାଉଥିବା ଜଣେ ସେନା ଅଧିକାରୀ ଅଭିଯୋଗ କରିଛନ୍ତି । ସୂଚନା ଅନୁଯାୟୀ, ସେନା ଅଧିକାରୀ ରହୁଥିବା ବିଂଲ୍ଡିଂରେ ଅଭିଷେକ ସାୱନ୍ତ ନାମକ ଜଣେ ବ୍ୟକ୍ତି ରୁହନ୍ତି । ସେ ଘରେ ପାରା ପାଳନ କରୁଥିଲେ । ଗତ ମାର୍ଚ୍ଚ ମାସରୁ ମେ’ ଯାଏ ପାରାକୁ ରଖିବା ପରେ ମୁମ୍ବାଇର କିଛି ହୋଟେଲକୁ ବିକ୍ରି କରିଥିଲେ । ଅଭିଷେକ ପାରା ବିକ୍ରି ପାଇଁ ନିଜ ଡ୍ରାଇଭରଙ୍କ ସହାୟତା ନିଅନ୍ତି । ଡ୍ରାଇଭର ମାଧ୍ୟମରେ ବିଭିନ୍ନ ରେସ୍ତୋରାଁ ଏବଂ ବାର ଗୁଡ଼ିକରେ ପାରା ମାଂସ ବିକ୍ରି କରୁଥିଲେ ।
ଏହା ମଧ୍ୟ ପଢ଼ନ୍ତୁ: 2 ବର୍ଷର ଝିଅକୁ ଖୁଆଇବାକୁ ପାଖରେ ଅର୍ଥ ନଥିଲା, ମାରିଦେଲା ଇଞ୍ଜିନିୟର ବାପା
ଅବସରପ୍ରାପ୍ତ ସେନା ଅଧିକାରୀ ଏହା ଜାଣିବା ପରେ ଏହି ଘଟଣାର କିଛି ଫଟୋ ମଧ୍ୟ ଉଠାଇ ରଖିଛନ୍ତି । ପ୍ରମାଣ ସଂଗ୍ରହ କରିବା ପରେ ସେ ଥାନାରେ ଅଭିଯୋଗ କରିଛନ୍ତି । ପାରା ବିକ୍ରି କାର୍ଯ୍ୟରେ ସମ୍ପୃକ୍ତ ଥିବା କେତେକ ଲୋକଙ୍କ ବିରୋଧରେ ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଛି । ତେବେ ଏହି ମାମଲାର ବର୍ତ୍ତମାନ ସୁଦ୍ଧା କେହି ଗିରଫ ହୋଇନଥିବା ଜଣାପଡ଼ିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
