ଚେନ୍ନାଇ: ଦିନ ଥିଲା ୧୯୧୧ ମସିହା ଜୁଲାଇ ୧୭ । ଏହି ଦିନ ତାମିଲନାଡୁ ତିରୁନେଲଭେଲିର ତତ୍କାଳୀନ ଜିଲ୍ଲାପାଳ ଆଶେ ପତ୍ନୀ ମାରିଙ୍କ କୋଡାଇକାନାଲକୁ ଗସ୍ତ କରୁଥିଲେ । ସେଠାରେ ପଢୁଥିବା ନିଜ ପିଲାଙ୍କୁ ଭେଟିବା ତାଙ୍କର ଯୋଜନା ରହିଥିଲା । ଏଥିଲାଗି ଦମ୍ପତିଙ୍କ ପାଇଁ 'ମାନିଆଚି ଜଙ୍କସନ'ରେ ସ୍ବତନ୍ତ୍ର କୋଚର ବ୍ୟବସ୍ଥା ହୋଇଥିଲା । ଯାତ୍ରା ସମୟରେ ଆଶେଙ୍କ ଅଙ୍ଗରକ୍ଷକ ପାଣି ଆଣିବାକୁ ଯାଇଥିବା ବେଳେ ହଠାତ୍ ଜଣେ ଅପରିଚିତ ବ୍ୟକ୍ତି କୋଚ ଭିତରକୁ ଧସେଇ ପଶିଥିଲେ । କେହି କିଛି ବୁଝିବା ଆଗରୁ ସେ ପତ୍ନୀଙ୍କ ସହ ବାର୍ତ୍ତାଳାପ କରୁଥିବା ଆଶେଙ୍କ ଉପରେ ଆଖିପିଛୁଳା ଗୁଳି ଚାଳନା କରିଥିଲେ । ପରେ ଉକ୍ତ ଅପରିଚିତ ବ୍ୟକ୍ତି ରେଳ ଷ୍ଟେସନ ଶୌଚାଳୟରେ ନିଜକୁ ଗୁଳି କରିଥିଲେ । ପରବର୍ତ୍ତୀ ସମୟରେ ସେ ତାମିଲନାଡ଼ୁର ବିପ୍ଳବୀ ୨୫ ବର୍ଷୀୟ ଭଞ୍ଚିନାଥନ ଥିଲେ ବୋଲି ଜଣାପଡ଼ିଥିଲା ।
ଆଶେଙ୍କୁ ଗୁଳି କରିବା ପଛରେ ଭଞ୍ଚିନାଥନଙ୍କ ଥିଲା ମହତ ଉଦ୍ଦେଶ୍ୟ । ଭାରତୀୟଙ୍କ ତୁଳନାରେ ବ୍ରିଟିଶଙ୍କ ସଂଖ୍ୟା କମ ଥିଲା । ଏଥିଲାଗି ଭଞ୍ଚି ଭାବୁଥିଲେ ଯେ ପ୍ରତ୍ୟେକ ଭାରତୀୟ ନିଜ ଜୀବନ ହାରିବା ପୂର୍ବରୁ ଜଣେ ବ୍ରିଟିଶଙ୍କୁ ହତ୍ୟା କଲେ ଦେଶ ନିଶ୍ଚିତ ଦାସତ୍ବରୁ ମୁକ୍ତ ହେବ । ସ୍ବାଧୀନତା ସଂଗ୍ରାମୀ ସୁବ୍ରମଣ୍ୟ ଓ ଭି.ଓ ଚିଦାମ୍ବରମ୍ ଗିରଫ ପରେ ଏଭଳି ନିଷ୍ପତ୍ତି ନେଇଥିଲେ ଭଞ୍ଚି । ଭଞ୍ଚିନାଥନ୍ ତାଙ୍କ ଜନ୍ମ ସହର ସେଙ୍ଗୋଟାଇ ରେ ପାଠ ପଢୁଥିଲେ ଏବଂ ଥିରୁଅନନ୍ତପୁରମରୁ କଲେଜ ଶିକ୍ଷା ଗ୍ରହଣ କରିଥିଲେ । ସ୍ବାଧୀନତା ସଂଗ୍ରାମରେ ସାମିଲ ହେବା ପାଇଁ ସେ ବନିଥିଲେ ଅଙ୍ଗରକ୍ଷକ । ଭଞ୍ଚିନାଥନ୍ ସଶସ୍ତ୍ର ସଂଗ୍ରାମର ରାସ୍ତା ବାଛିଲେ । VVS ଆଇୟରଙ୍କ ପୁଡୁଚେରୀରେ ଥିବା ଭାରତ ମାତା ସଂଗଠନରେ ଅସ୍ତ୍ରଶସ୍ତ୍ରର ତାଲିମ ନେଇଥିଲେ ସେ ।
ଆଶେଙ୍କଠୁ ପ୍ରତିଶୋଧ ନେବାର ନିଆଁରେ ଭଞ୍ଚିନାଥନ ଜଳୁଥିବା ବେଳେ ଆଶେ ତିରୁନେଲଭେଲିରେ କଲେକ୍ଟର ଭାବରେ ପଦୋନ୍ନତି ପାଇଲେ । ଆଶେ ସ୍ବାଧୀନତା ଆନ୍ଦୋଳନକୁ ଦମନ କରିବାକୁ ମଧ୍ୟ କରୁଥିଲେ ଚେଷ୍ଟା । ଏଥିଲାଗି ସେ ଆଇୟରଙ୍କ ଭାରତ ମାତା ସଂଗଠନକୁ ଧ୍ବଂସ କରିଥିଲେ । ଏଥିରେ କ୍ରୋଧିତ ହୋଇ ଭଞ୍ଚିନାଥନ୍ ଆଶେଙ୍କୁ ହତ୍ୟା କରିବାକୁ ନେଇଥିଲେ ଶପଥ । ଭଞ୍ଚିନାଥନ୍ କେବେ ଘରେ ରହୁନଥିଲେ । ସେ ସ୍ବାଧୀନତା ସଂଗ୍ରାମରେ ଅଧିକ ଅଂଶଗ୍ରହଣ କରୁଥିଲେ । ତାଙ୍କୁ ନିଜକୁ ନୀଳକଣ୍ଡା ବ୍ରହ୍ମଚାରୀ ଭାବେ ପରିଚିତ କରାଇ 'ଭାରତମାତା' ନାମକ ଏକ ସଂଗଠନ ଗଠନ କରିଥିଲେ । ସେମାନେ ଗୁପ୍ତ ସଭା କରିଥିଲେ ଏବଂ 1908 ମାର୍ଚ୍ଚ 9ରେ ଭିପିନ୍ ଚନ୍ଦ୍ରପାଲାଙ୍କ ମୁକ୍ତି ଏବଂ ସ୍ବାଧୀନତା ଦିବସ ପାଳନ କରିବାକୁ ଶପଥ ନେଇଥିଲେ । 1907 ରୁ 1911 ମଧ୍ୟରେ ଭଞ୍ଚି ବ୍ରିଟିଶଙ୍କ ବିରୁଦ୍ଧରେ ଲଢିଥିଲେ ।
ଦେଶର ସ୍ବାଧୀନତା ପାଇଁ ଭଞ୍ଚିନାଥନ୍ ଏକ ବଡ଼ ଆନ୍ଦୋଳନର ମଞ୍ଜି ବୁଣୁଥିଲେ । ସେପଟେ ସନାତନ ଧର୍ମର ସଂରକ୍ଷଣ ପାଇଁ ସେ ଚେଷ୍ଟା କରୁଥିଲେ ବୋଲି ନିଜ ସୁଇସାଇଡ଼ ନୋଟରେ କହିଥିଲେ ଯେ," ବ୍ରିଟିଶମାନେ ଆମ ଦେଶକୁ ଅକ୍ତିଆର କରି ଅମର ସନାତନ ଧର୍ମକୁ ପ୍ରଭାବିତ କରିଛନ୍ତି । ଆମେ ବ୍ରିଟିଶମାନଙ୍କୁ ଦେଶରୁ ତଡ଼ିବା ଏବଂ ଦେଶରେ ସ୍ବାଧୀନତା ପ୍ରତିଷ୍ଠା କରିବା ଆବଶ୍ୟକ । ଏଥିଲାଗି ଏକ ବଡ଼ ପ୍ରୟାସ ଚାଲିଛି । ତାଙ୍କୁ ଦମନ ପାଇଁ 3000 ମାଡ୍ରାସିସ୍ ତାଲିମ ନେଉଛନ୍ତି । ମୁଁ ସେମାନଙ୍କ ମଧ୍ୟରେ ସାନ ଥିଲି' ନିଜ ଆତ୍ମହତ୍ୟା ନୋଟରେ ଏପରି ଲେଖିଥିଲେ ଭଞ୍ଚି ।
ଯେତେବେଳେ ଭଞ୍ଚିନାଥନ୍ ଏହି ଘଟଣା ଘଟାଇଥିଲେ, ତାଙ୍କ ପରିବାର ବହୁତ କଷ୍ଟରେ ଥିଲେ । ଭଞ୍ଚିଙ୍କ ପିତା ରଘୁପଥିଙ୍କୁ ବ୍ରିଟିଶମାନେ ଭଞ୍ଚିଙ୍କ ମୃତଦେହକୁ ଚିହ୍ନିବା ପାଇଁ ନେଇଥିଲେ । ସେମାନେ ଜାଣି ନଥିଲେ କିଏ ପ୍ରଥମେ ଗୁଳି ଚଳାଇଥିଲା ଏବଂ ପରେ ସେମାନେ ଭଞ୍ଚିଙ୍କ ପିତା ଏବଂ ଜେଜେବାପାଙ୍କ ସାହାଯ୍ୟରେ ତାଙ୍କ ମୃତଦେହକୁ ଚିହ୍ନଟ କରିଥିଲେ । ପରବର୍ତ୍ତୀ ସମୟରେ ଭଞ୍ଚିଙ୍କ ପରିବାର ତାଙ୍କ ମୃତଦେହକୁ ଗ୍ରହଣ କରିବାକୁ ମନା କରିଥିଲେ ।
ଦେଶକୁ ସ୍ବାଧୀନତା ଦେବା ପାଇଁ ଖୁବ କମ ବୟସରେ ନିଜ ପ୍ରାଣ ବଳି ଦେଇଥିଲେ ଏହି ମହାନ ଆତ୍ମା । ତାଙ୍କ ବଳିଦାନକୁ ସ୍ମରଣ କରିବା ପାଇଁ ପୂର୍ବତନ ସାଂସଦ କୁମାରୀ ଆନନ୍ଦନ୍ ମାନିଆଚି ରେଳ ଷ୍ଟେସନକୁ "ଭଞ୍ଚି ମାନିଆଚି" ନାମରେ ନାମିତ କରିଛନ୍ତି । ଏହାସହ ତାମିଲନାଡୁ ସରକାର ସେଙ୍ଗୋଟାଇ ଠାରେ ଭଞ୍ଚିଙ୍କ ଏକ ପ୍ରତିମୂର୍ତ୍ତି ଓ ସ୍ମାରକ ନିର୍ମାଣ କରି ଏହି ବିପ୍ଲବୀଙ୍କୁ ଜଣାଇଛନ୍ତି ଶ୍ରଦ୍ଧାଞ୍ଜଳି ।
ବ୍ୟୁରୋ ରିପୋର୍ଟ, ଇଟିଭି ଭାରତ
