ଶ୍ରୀନଗର: ଦେଶରେ ଆତଙ୍କବାଦୀଙ୍କ ଉତ୍ପାତ ଦିନକୁ ଦିନ ବୃଦ୍ଧି ହେବାରେ ଲାଗିଛି । କେତେବେଳେ ବିସ୍ଫୋରଣ କରୁଛନ୍ତି ତ ଆଉ କେତେବେଳେ ସେନା ଉପରେ ଆଖିବୁଜା ଗୁଳିମାଡ କରୁଛନ୍ତି । ଯାହାକୁ ନେଇ ସୀମାରେ ସୁରକ୍ଷାବାହିନୀ ପକ୍ଷରୁ ମଧ୍ୟ ଆତଙ୍କୀ ଦମନ ଅଭିଯାନ ଜାରି ରହିଛି । ଆଜି ଶ୍ରୀନଗର ଅଲ୍ଲୀଜାନ ରୋଡରେ (Ali Jan road in Srinagar) ଜଣେ ପୋଲିସ କର୍ମଚାରୀଙ୍କ ଉପରେ ଆତଙ୍କବାଦୀ ଗୁଳିମାଡ କରିଛନ୍ତି । ଏଥିରେ ପୋଲିସ କର୍ମଚାରୀ ଜଣକ ଆହତ ହୋଇଛନ୍ତି । ଗୁରୁତର ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତୀ କରାଯାଇଛି । ହେଲେ ଅବସ୍ଥା ସଙ୍କଟାପନ୍ନ ହେବାରୁ ସୌରାରେ ଥିବା ସ୍କିମସ (SKIMS, Soura)କୁ ସ୍ଥାନାନ୍ତର କରାଯାଇଛି । ଆହତ ହୋଇଥିବା ସୁରକ୍ଷା କର୍ମୀ ହେଲେ ଗୁଲାମ ହାସନ । ସେ ପିସିଆର ଡ୍ରାଇଭର ଭାବେ କାର୍ଯ୍ୟ କରନ୍ତି ।
ଶୁକ୍ରବାର ଦିନ ସେନା ପକ୍ଷରୁ ଜମ୍ମୁ କଶ୍ମୀର ଅନନ୍ତନାଗ ପୂର୍ବ ବାଟକୋଟ ପାହାଲଗାମ ଜଙ୍ଗଲ ଅଞ୍ଚଳ ଶ୍ରୀଚନ୍ଦରେ ଏନକାଉଣ୍ଟର କରାଯାଇଥିଲା । ସୁରକ୍ଷାବାହିନୀଙ୍କ ଗୁଳିରେ ୩ ଆତଙ୍କୀ ନିପାତ ହୋଇଥିଲେ । ସେମାନଙ୍କ ମଧ୍ୟରୁ ଜଣେ ହିଜବୁଲ ମୁଜାହିଦ୍ଦିନର କମାଣ୍ତର ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
