ନୂଆଦିଲ୍ଲୀ: ଭୂକମ୍ପ ପ୍ରଭାବିତ ତୁର୍କୀରେ ଉଦ୍ଧାରକାର୍ଯ୍ୟ ପାଇଁ ଯାଇଥିବା ଜାତୀୟ ବିପର୍ଯ୍ୟୟ ପ୍ରଶମନ ବଳ (NDRF)ର ଶେଷ ଟିମ ଭାରତ ଫେରିଛନ୍ତି । ତୁର୍କୀରେ ପ୍ରଳୟଙ୍କାରୀ ଭୂକମ୍ପ ହେବା ପରେ ଉଦ୍ଧାର ଅପରେସନ ପାଇଁ NDRF ଟିମକୁ ତୁର୍କୀ ଗସ୍ତ କରିବା ପାଇଁ ପ୍ରଧାନମନ୍ତ୍ରୀ ମୋଦି ନିର୍ଦ୍ଦେଶ ଦେଇଥିଲେ । ଏହି ଅପରେସନରେ ନାମ ରଖାଯାଇଥିଲା ‘ଅପରେସନ ଦୋସ୍ତ’। ଏଥିରେ ଏନଡିଆରଏଫ ଯବାନଙ୍କ ସମେତ ଡାକ୍ତରୀ ଟିମ, ଆବଶ୍ୟକ ଔଷଧ, ଜରୁରୀ ସାମଗ୍ରୀ ସହ ତାଲିମପ୍ରାପ୍ତ କୁକୁର ମଧ୍ୟ ରହିଥିଲେ । ତେବେ ତିନିଟି ଟିମରେ ମୋଟ 151ଜଣ NDRF ଯବାନ ତୁର୍କୀ ଗସ୍ତ କରିଥିଲେ । ପୂର୍ବରୁ ଏକାଧିକ ଟିମ ଭାରତ ଫେରିସାରିଥିବା ବେଳେ ଆଜି ତୁର୍କୀର ଉଦ୍ଧାର ଅପରେସନ ସମାପ୍ତ ଘୋଷଣା ସହ ଅନ୍ତିମ ଟିମ ମଧ୍ୟ ସ୍ବଦେଶ ଫେରିଛି ।
ତୁର୍କୀ ଭୂକମ୍ପ ଦିନ (6 ତାରିଖ) ହିଁ ଉଚ୍ଚସ୍ତରୀୟ ସମୀକ୍ଷା ବୈଠକ ପରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ତୁର୍କୀକୁ NDRF ଟିମ ପଠାଇବା ପାଇଁ ନିର୍ଦ୍ଦେଶ ମିଳିଥିଲା । ତା ପରଦିନ ଏହି ଟିମ ତୁର୍କୀରେ ପହଞ୍ଚି ଉଦ୍ଧାର ଅପରେସନ ଆରମ୍ଭ କରିଥଲା । ଅତି ଉଚ୍ଚପ୍ରଶିକ୍ଷତ ଏହି ବିପର୍ଯ୍ୟୟ ମୁକାବିଲା ଯୋଦ୍ଧାମାନେ ବିଭିନ୍ନ ୟୁନିଟରେ ଭାଗ ହୋଇ ତୁର୍କୀର ପ୍ରାୟ 35ଟି ପ୍ରଭାବିତ ଅଞ୍ଚଳରେ ସର୍ଚ୍ଚ, ଉଦ୍ଧାର ଓ ରିଲିଫ ମିଶନରେ ଅଂଶଗ୍ରହଣ କରିଥିଲେ ।
ସେହିପରି ଉଦ୍ଧାରକାରୀ ଟିମ ସହ ଭାରତ ପ୍ରାୟ 150 ଟନ ଜରୁରୀ ସାମଗ୍ରୀ ମଧ୍ୟ ପଠାଇଥିଲା । ଏହି ଉଦ୍ଧାର ଅପରେସନ ଇସ୍ତାନବୁଲରେ ଅବସ୍ଥିତ ଭାରତୀୟ ଦୂତାବାସ ଓ ସ୍ଥାନୀୟ ତୁର୍କୀ ପ୍ରଶାସନର ସମନ୍ବୟରେ କରାଯାଇଥିଲା । ଭାରତ ପକ୍ଷରୁ ଏକାଧିକ ଅସ୍ଥାୟୀ ରିଲିଫ କ୍ୟାମ୍ପ ମଧ୍ୟ ପ୍ରସ୍ତୁତ କରାଯାଇଥିଲା । ତୁର୍କୀକୁ ତୁରନ୍ତ ସହଯୋଗର ହାତ ବଢାଇବା ଦେଶ ମଧ୍ୟରେ ଆଗଧାଡିରେ ଭାରତ ରହିଥିଲା । ଭାରତର ସହଯୋଗକୁ ତୁର୍କୀ ପ୍ରଂଶସା କରିଥିବା ବୈଦେଶିକ ମନ୍ତ୍ରଣାଳୟ ମଧ୍ୟ ସୂଚନା ଦେଇଛି ।
ଏହା ମଧ୍ୟ ପଢନ୍ତୁ:- Turkey Earthquake: ରେସ୍କ୍ୟୁ ପାଇଁ ତୁର୍କୀ ଗଲା NDRF, ମେଡିକାଲ ଟିମ୍, ରିଲିଫ୍ ସାମଗ୍ରୀ
6 ତାରିଖରେ 7.8 ମ୍ୟାଗ୍ନିଚ୍ୟୁଡର ଭୂକମ୍ପରେ ଛାରଖାର ହୋଇପଡିଛି ତୁର୍କୀ ଓ ମଧ୍ୟପ୍ରାଚ୍ୟ ଦେଶ ସିରିଆ । ଅପେକ୍ଷାକୃତ ତୁର୍କୀ ସର୍ବାଧିକ ପ୍ରଭାବିତ ହୋଇଛି । ତୁର୍କୀର ମୋଟ 10ଟି ପ୍ରଦେଶ ଗମ୍ଭୀର ଭାବେ ପ୍ରଭାବିତ ହୋଇଛି । ବର୍ତ୍ତମାନ ସୁଦ୍ଧା ଉଭୟ ଦେଶରେ ପ୍ରାୟ 40 ହଜାରରୁ ଅଧିକ ଲୋକଙ୍କ ପ୍ରାଣହାନୀ ଘଟିଥିବା ଆକଳନ ପ୍ରକାଶ ପାଇଛି । ପ୍ରଥମ ଭୂକମ୍ପ ପରେ ଲାଗାତାର ଏକାଧିକ ଭୂକମ୍ପର ଝଟକାରେ ଥରିଥିଲା ତୁର୍କୀ ଓ ସିରିଆ । ଦିନ ତମାମ ଓ ପରଦିନ ମଧ୍ୟ କମ୍ପନ ଅନୁଭୂତ ହୋଇଥିଲା । ଗୋଟିଏ ପଟେ ଉଦ୍ଧାର କାର୍ଯ୍ୟ ଆରମ୍ଭ ହୋଇସାରିଥିବା ବେଳେ ବାରମ୍ବାର ଭୂକମ୍ପ ଅନୁଭୂତ ହେବା ସ୍ଥିତିକୁ ଆହୁରି ସଙ୍ଗୀନ କରିଥିଲା । ଭୂକମ୍ପ ନେଇ ସୂଚନା ମିଳିବା ପରେ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପ୍ରମୋଦ କୁମାର ମିଶ୍ରଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକରେ ସ୍ଥିତି ସମୀକ୍ଷା କରାଯାଇଥିଲା । ବୈଠକରେ ଏନଡିଆରଏଫକୁ ତୁର୍କୀ ପଠାଇବା ପାଇଁ ନିଷ୍ପତ୍ତି ହେବା ସହ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
