ଥିରୁଅନନ୍ତପୁରମ: କେରଳର ଏର୍ଣ୍ଣାକୁଲମ ଜିଲ୍ଲା ଅନ୍ତର୍ଗତ କୋଚିର କଲାମସେରୀ ଅଞ୍ଚଳରେ ଭୟଙ୍କର ସିରିଜ ବିସ୍ଫୋରଣ ଘଟିଛି । ଏକ ପ୍ରାର୍ଥନା ସଭା ଚାଲିଥିବା ବେଳେ ଏକ ଘଣ୍ଟା ମଧ୍ୟରେ ପାଖାପାଖି 3 ଥର ବିସ୍ଫୋରଣ ହୋଇଥିବା ସୂଚନା ମିଳିଛି । ଏହି ବ୍ଲାଷ୍ଟରେ 2 ଜଣଙ୍କର ମୃତ୍ୟୁ ହୋଇଥିବା ବେଳେ ପାଖାପାଖି 50ରୁ ଊର୍ଦ୍ଧ୍ବ ଜଣ ଆହତ ହୋଇଛନ୍ତି । ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଆହତଙ୍କ ମଧ୍ୟରେ 18 ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ମୃତ୍ୟୁ ସଂଖ୍ୟା ଆଗକୁ ବୃଦ୍ଧି ପାଇବା ନେଇ ଆଶଙ୍କା କରାଯାଉଛି ।
ତେବେ ଏର୍ଣ୍ଣାକୁଲମ ଜିଲ୍ଲା ଅନ୍ତର୍ଗତ କଲାମସେରୀ ସ୍ଥିତ ଏକ କନଭେନସନ ସେଣ୍ଟରରେ ରବିବାର ସକାଳ ସମୟରେ ଭୟଙ୍କର ବିସ୍ଫୋରଣ ହୋଇଛି । କିଛି ସମୟ ବ୍ୟବଧାନ ମଧ୍ୟରେ ବାରମ୍ବାର ବ୍ଲାଷ୍ଟର ପ୍ରଚଣ୍ଡ ଶବ୍ଦ ଶୁଣିବାକୁ ମିଳିଥିଲା । ଯେଉଁ ସମୟରେ ବିସ୍ଫୋରଣ ହେଲା ସେହି ସମୟରେ କନଭେନସନ ସେଣ୍ଟରରେ ୟହୋବା ସାକ୍ଷୀମାନଙ୍କ ପ୍ରାର୍ଥନା ଚାଲିଥିଲା ।
ଏହାମଧ୍ୟ ପଢନ୍ତୁ..ଗାଜାରେ ଉଡିଲା ଇସ୍ରାଏଲ ପତାକା ! ନେତାନ୍ୟାହୁଙ୍କ ହୁଙ୍କାର, ମୃତ୍ୟୁସଂଖ୍ୟା 9 ହଜାର ପାର୍
କଲାମସେରୀ ସିଆଇ ଭିବିନ ଦାସଙ୍କ ସୂଚନା ଅନୁଯାୟୀ, ପ୍ରଥମ ବିସ୍ଫୋରଣ ସକାଳ ପାଖାପାଖି 9ଟା ବେଳେ ହୋଇଥିବା ବେଳେ କିଛି ସମୟର ବ୍ୟବଧାନରେ ଅର୍ଥାତ ଗୋଟିଏ ଘଣ୍ଟା ମଧ୍ୟରେ ଏକାଧିକ ଥର ବିସ୍ଫୋରଣ ହୋଇଥିଲା । ତେବେ ପାଖାପାଖି 3 ଥର ବିସ୍ଫୋରଣ ହୋଇଥିବା ଜଣାପଡିଛି ।
ବିସ୍ଫୋରଣ ନେଇ ପୋଲିସ ଖବର ପାଇବା ପରେ ତୁରନ୍ତ ପୋଲିସ ଟିମ୍ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ । ଅନ୍ୟପଟେ ଗୋଟିଏ ବୋମା ନିଷ୍କ୍ରିୟକାରୀ ଟିମ ସହ 8 ଜଣିଆ ନେସନାଲ ସିକ୍ୟୁରିଟି ଗାର୍ଡର ଏକ ଟିମ ଦିଲ୍ଲୀରୁ କେରଳ ଅଭିମୁଖେ ବାହାରି ସାରିଛନ୍ତି । ସନ୍ଧ୍ୟା ସୁଦ୍ଧା ଏହି ଟିମ ଘଟଣାସ୍ଥଳରେ ପହଞ୍ଚିବେ । ଜାତୀୟ ତଦନ୍ତକାରୀ ସଂସ୍ଥା ମଧ୍ୟ ଘଟଣାର ତଦନ୍ତ କରିବା ନେଇ ସୂଚନା ରହିଛି । ଅନ୍ୟପଟେ ଗୃହମନ୍ତ୍ରୀ ଅମିତ ଶାହା ମଧ୍ୟ କେରଳ ମୁଖ୍ୟମନ୍ତ୍ରୀ ବିଜୟନ ପିନାରାୟୀଙ୍କ ସହ ଏନେଇ କଥା ହୋଇଛନ୍ତି ।
ତେବେ କଲାମସେରୀରେ ଚାଲିଥିବା ଏହି ପ୍ରାର୍ଥନା ସଭା ଅକ୍ଟୋବର 27ରେ ଆରମ୍ଭ ହୋଇଥିବା ବେଳେ ଆଜି ଏହାର ଶେଷ ଦିନ ଥିଲା । 3 ଦିନ ଧରି ଚାଲିଥିବା ଏହି ପ୍ରାର୍ଥନା ସଭାରେ ପାଖାପାଖି ଦୁଇ ହଜାର ଲୋକେ ଏକାଠି ହୋଇଥିଲେ । ବିସ୍ଫୋରଣ ଘଟିବା ବେଳେ ମଧ୍ୟ ପ୍ରାର୍ଥନା ସଭାରେ 2 ହଜାରରୁ ଊର୍ଦ୍ଧ୍ବ ଲୋକେ ଉପସ୍ଥିତ ଥିଲେ । ତେବେ ବିସ୍ଫୋରଣ କାରଣ ଓ ଏହା ପଛରେ ମାଷ୍ଟରମାଇଣ୍ଡ କିଏ ଏଯାଏଁ ଜଣା ପଡିନଥିବା ବେଳେ ଏହା ଏକ ଆତଙ୍କୀ ହାମଲା ହୋଇପାରେ ବୋଲି ସନ୍ଦେହ କରାଯାଉଛି । ତେବେ ଏହି ଭୟଙ୍କର ବିସ୍ଫୋରଣକୁ ନେଇ ଭୟଭୀତ ହୋଇପଡିଛନ୍ତି ସ୍ଥାନୀୟ ଲୋକେ ।
ଗତକାଲି ପାଲେଷ୍ଟାଇନ୍ର ଆତଙ୍କୀ ସଂଗଠନ ହମାସର ଜଣେ ସଦସ୍ୟ ଭିଡିଓ ବାର୍ତ୍ତା ଜରିଆରେ କେରଳର ମୁସଲମାନଙ୍କୁ ସମ୍ବୋଧନ କରିଥିବା ବେଳେ ଆଜି ଏହି ବ୍ଲାଷ୍ଟ ହୋଇଥିବା ନେଇ ଚର୍ଚ୍ଚା ହୋଇଛି । ତେବେ କେରଳର ସିରିଜ ବ୍ଲାଷ୍ଟ ସହ ଇସ୍ରାଏଲ-ହମାସ ଯୁଦ୍ଧର ଲିଙ୍କ୍ ନେଇ ଚର୍ଚ୍ଚା ଜୋର ଧରିଛି । ତେବେ କେରଳରେ ବିସ୍ଫୋରଣ ପରେ ଉତ୍ତରପ୍ରଦେଶର ବିଭିନ୍ନ ଅଞ୍ଚଳକୁ ହାଇଆଲର୍ଟ ଜାରି କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
