ନୂଆଦିଲ୍ଲୀ: ଆଇଆଇଟି ବମ୍ବେର ବଡ ଉପଲବ୍ଧି । କ୍ୟୁଏସ ଆନ୍ତର୍ଜାତିକ ବିଶ୍ବବିଦ୍ୟାଳୟ ରାଙ୍କିଙ୍ଗରେ(QS world ranking) ଶ୍ରେଷ୍ଠ ୧୫୦ ତାଲିକାରେ ସ୍ଥାନ ପାଇଛି ଆଇଆଇଟି ବମ୍ବେ । କ୍ୟୁଏସ କ୍ବାକ୍ବାରେଲି ସାଇମଣ୍ଡସ ପକ୍ଷରୁ ଆଜି(ବୁଧବାର) ଏହି ବିଶ୍ବବିଦ୍ୟାଳୟ ରାଙ୍କିଙ୍ଗ ତାଲିକା ପ୍ରକାଶ ପାଇଛି । ଚଳିତ ବର୍ଷ ଆଇଆଇଟି ବମ୍ବେ ଭଲ ପ୍ରଦର୍ଶନ ପାଇଁ ୧୭୭ତମ ସ୍ଥାନରୁ ଉପରକୁ ଉଠି ୧୪୯ତମ ସ୍ଥାନ ଅଧିକାର କରିଛି । ଏହାରି ସହିତ ଦେଶରେ ସର୍ବଶ୍ରେଷ୍ଠ ଶିକ୍ଷାନୁଷ୍ଠାନର ଗୌରବ ମଧ୍ୟ ଅର୍ଜନ କରିଛି । ଏନେଇ କ୍ୟୁଏସ ପ୍ରତିଷ୍ଠାତା ତଥା ସିଇଓ ନୁନଜିଓ କ୍ବାକ୍ବାରେଲି ଏହି ସଂସ୍ଥାନକୁ ଅଭିନନ୍ଦନ ଜଣାଇଛନ୍ତି ।
| ସଂସ୍ଥାନ | ରାଙ୍କିଙ୍ଗ 2024 | ରାଙ୍କିଙ୍ଗ 2023 |
| ଆଇଆଇଟି ବମ୍ବେ | 149 | 172 |
| ଆଇଆଇଟି ଦିଲ୍ଲୀ | 197 | 174 |
| ଆଇଆଇଏସସି(IISc) | 225 | 155 |
| ଆଇଆଇଟି ଖଡଗପୁର | 271 | 270 |
| ଆଇଆଇଟି କାନପୁର | 278 | 264 |
| ଆଇଆଇଟି ମାଡ୍ରାସ | 285 | 250 |
| ଆଇଆଇଟି ଗୌହାଟୀ | 250 | 384 |
| ଆଇଆଇଟି ରୁରକି | 369 | 369 |
| ଦିଲ୍ଲୀ ବିଶ୍ବବିଦ୍ୟାଳୟ | 407 | 521 |
| ଜେଏନୟୁ | 601 | 601 |
କ୍ୟୁଏସ ଅନ୍ତର୍ଜାତୀୟ ବିଶ୍ବବିଦ୍ୟାଳୟ ପ୍ରତିବର୍ଷ ବିଶ୍ବର ସର୍ବଶ୍ରେଷ୍ଠ ବିଶ୍ବବିଦ୍ୟାଳୟ ତାଲିକା ପ୍ରକାଶ କରିଥାଏ । ସିଇଓ କ୍ବାକ୍ବାରେଲି କହିଛନ୍ତି ଯେ, ଚଳିତ ବର୍ଷ ଏହି ରାଙ୍କିଙ୍ଗରେ ବିଶ୍ବର ୨୯୦୦ ସଂସ୍ଥାନକୁ ସ୍ଥାନ ମିଳିଛି । ଏଥିରେ ୪୫ଟି ଭାରତୀୟ ବିଶ୍ବବିଦ୍ୟାଳୟ ରହିଛି । ଏହି କ୍ୟୁଏସ ବିଶ୍ବବିଦ୍ୟାଳୟ ମାନ୍ୟତା ତାଲିକାରେ ପୂର୍ବରୁ ୨୦୧୬ରେ ଆଇଆଇଏସସି(IISc) ବେଙ୍ଗାଲୁରୁ ସବୁଠୁ ଅଧିକ ୧୪୭ତମ ରାଙ୍କ ହାସଲ କରିଥିଲା । ରିପୋର୍ଟ ଅନୁଯାୟୀ, ଚଳିତ ବର୍ଷ ଆଇଆଇଟି ବମ୍ବେ କ୍ୟୁଏସ ରାଙ୍କିଙ୍ଗରେ ୧୦୦ରୁ ୫୧.୭ ପ୍ରତିଶତ ସ୍କୋର ସହ ଭାରତର ସର୍ବଶ୍ରେଷ୍ଠ ଶିକ୍ଷାନୁଷ୍ଠାନ ଏବଂ ବିଶ୍ବସ୍ତରରେ ୧୪୯ତମ ଶ୍ରେଷ୍ଠ ବିଶ୍ବବିଦ୍ୟାଳୟ ସ୍ଥାନର ମାନ୍ୟତା ପାଇଛି ।
ଏହାମଧ୍ୟ ପଢନ୍ତୁ: First Lappy Lab: ଲ୍ୟାପି ଲ୍ୟାବ.. ବହି ନୁହେଁ ଲ୍ୟାପଟପରେ ପଢିବେ
ଆଇଆଇଟି ବମ୍ବେ ପ୍ରଥମ ଥର ଟପ୍-୧୫୦ ତାଲିକାରେ ସ୍ଥାନ ପାଇଛି । ଚଳିତ ବର୍ଷ ୨୩ଟି ବର୍ଗରେ ଏହି ସଂସ୍ଥାନ ଭଲ ପ୍ରଦର୍ଶନ କରିଛି । ସେହିପରି ଏ ବର୍ଷ ପ୍ରଥମ ଥର ୪୫ଟି ଭାରତୀୟ ଶିକ୍ଷାନୁଷ୍ଠାନ କ୍ୟୁଏସ ରାଙ୍କିଙ୍ଗରେ ସ୍ଥାନ ପାଇଛନ୍ତି । ୯ଟି ମାପଦଣ୍ଡକୁ ନେଇ କ୍ୟୁଏସ ରାଙ୍କିଙ୍ଗ ତାଲିକା ପ୍ରସ୍ତୁତ ହୋଇଛି । ଚଳିତ ବର୍ଷ ଆଇଆଇଏସି ବେଙ୍ଗାଲୁରୁ ଅତି ଖରାପ ପ୍ରଦର୍ଶନ ପାଇଁ ୧୫୫ତମ ସ୍ଥାନରୁ ଖସି ସିଧା ୨୨୫ତମ ସ୍ଥାନରେ ପହଞ୍ଚିଛି । ଯାହା ଫଳରେ ବର୍ତ୍ତମାନ ଏହି ସଂସ୍ଥାନ ଦେଶର ସର୍ବଶ୍ରେଷ୍ଠ ମାନ୍ୟତା ହରାଇ ତୃତୀୟ ଶ୍ରେଷ୍ଠ ବିଶ୍ବବିଦ୍ୟାଳୟ ହୋଇଛି । ଏହି କ୍ରମରେ ଆନ୍ତର୍ଜାତିକ ବିଶ୍ବବିଦ୍ୟାଳୟ ତାଲିକାରେ ଆଇଆଇଟି ଦିଲ୍ଲୀ ୧୭୪ତମ ସ୍ଥାନରୁ ୧୯୭ତମ, ଆଇଆଇଟି କାନପୁର ୨୬୪ ରୁ ୨୭୮ତମ, ଆଇଆଇଟି ମାଡ୍ରାସ ୨୫୦ତମ ସ୍ଥାନରୁ ଖସି ୨୮୫ତମରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
