Amit Shah Statement: ମଣିପୁର ଘଟଣା ଆଲୋଚନା ପାଇଁ ମୁଁ ପ୍ରସ୍ତୁତ: ଗୃହମନ୍ତ୍ରୀ

ଗୃହମନ୍ତ୍ରୀ ଅମିତ ଶାହ କହିଛନ୍ତି ‘‘ସମସ୍ତ ସମ୍ମାନନୀୟ ସାଂସଦଙ୍କୁ ମୋର ଅନୁରୋଧ, ମଣିପୁର ଘଟଣାରେ କେହି ରାଜନୀତି କରନ୍ତୁ ନାହିଁ । ମଣିପୁର ଘଟଣାରେ ଆଲୋଚନା ପାଇଁ ମୁଁ ପ୍ରସ୍ତୁତ ଅଛି । ବିରୋଧୀ ଆଲୋଚନା ପାଇଁ ସଂସଦକୁ ସ୍ବାଭାବିକ କରନ୍ତୁ । ମଣିପୁର ଘଟଣାକୁ ନେଇ ସରକାରୀ ଓ ବିରୋଧୀ ଦଳ ଚାହୁଁଛନ୍ତି । ସରକାର ମଧ୍ୟ ପ୍ରସ୍ତୁତ ଅଛନ୍ତି । ଅଧିକ ପଢନ୍ତୁ

ନୂଆଦିଲ୍ଲୀ: ମଣିପୁର ଘଟଣାକୁ ନେଇ ସଂସଦ ଅଚଳ । ଗତ 20 ତାରିଖରୁ ଆରମ୍ଭ ହୋଇଥିବା ମୌସୁମୀ ଅଧିବେଶନ ବର୍ତ୍ତମାନ ସୁଦ୍ଧା ସ୍ବାଭାବିକ ହୋଇପାରିନାହିଁ । ମଣିପୁର ହିଂସା ଘଟଣାକୁ ନେଇ ପୁରା ବିରୋଧୀ ତଥା ନୂଆ ଗଠବନ୍ଧନ (ଇଣ୍ଡିଆ)ର ସାଂସଦ ମାନେ ସଡକରୁ ସଂସଦ ପର୍ଯ୍ୟନ୍ତ ହଙ୍ଗାମା ହଟ୍ଟଗୋଳ ଜାରି ରଖିଛନ୍ତି । ଲୋକସଭା ବାଚସ୍ପତି ଓ ରାଜ୍ୟସଭା ଅଧ୍ୟକ୍ଷଙ୍କ ତମାମ ପ୍ରୟାସ ସତ୍ବେ ସଂସଦ ସ୍ବାଭାବିକ ହୋଇପାରୁ ନାହିଁ । ସରକାରୀ ବିରୋଧୀ ଦଳର ତୁହାକୁ ତୁହା ବୈଠକ ବସୁଛି । ରଣନୀତି ହେଉଛି । କିନ୍ତୁ ସଂସଦ ଅଚଳ ହୋଇପଡିଛି । ବିରୋଧୀ ଦଳ ମଣିପୁର ହିଂସା ଘଟଣାରେ ପ୍ରଧାନମନ୍ତ୍ରୀ ମୋଦିଙ୍କ ବିବୃତ୍ତି ସହ ସଂସଦରେ ଆଲୋଚନା ଦାବି କରୁଛନ୍ତି । କେନ୍ଦ୍ର ସରକାର ମଧ୍ୟ ଆଲୋଚନା ପାଇଁ ପ୍ରସ୍ତୁତ ବୋଲି କହିଆସୁଛନ୍ତି । କିନ୍ତୁ ସଂସଦ ଅଚଳ ହୋଇ ରହିଛି । ଏହି ଆରୋପ ପ୍ରତ୍ୟାରୋପ ମଧ୍ୟରେ ଆଜି କେନ୍ଦ୍ର ସରକାରଙ୍କ ପକ୍ଷରୁ ମୈଦାନକୁ ଆସିଛନ୍ତି ନିଜେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ।

ଅପରାହ୍ନ 2 ଟାରେ ଲୋକସଭା ଆରମ୍ଭ ହେବାମାତ୍ରେ ଗୃହମନ୍ତ୍ରୀ ଅମିତ ଶାହ କହିଛନ୍ତି ‘‘ସମସ୍ତ ସମ୍ମାନନୀୟ ସାଂସଦଙ୍କୁ ମୋର ଅନୁରୋଧ, ମଣିପୁର ଘଟଣାରେ କେହି ରାଜନୀତି କରନ୍ତୁ ନାହିଁ । ମଣିପୁର ଘଟଣାରେ ଆଲୋଚନା ପାଇଁ ମୁଁ ପ୍ରସ୍ତୁତ ଅଛି । ବିରୋଧୀ ଆଲୋଚନା ପାଇଁ ସଂସଦକୁ ସ୍ବାଭାବିକ କରନ୍ତୁ । ମଣିପୁର ଘଟଣାକୁ ନେଇ ସରକାରୀ ଓ ବିରୋଧୀ ଦଳ ଚାହୁଁଛନ୍ତି । ସରକାର ମଧ୍ୟ ପ୍ରସ୍ତୁତ ଅଛନ୍ତି । ମୁଁ ଜାଣିନାହିଁ ବିରୋଧୀ କାହିଁକି ଆଲୋଚନା ଚାହୁଁନାହାଁନ୍ତି । ମଣିପୁରର ସତ ପୁରା ଦେଶବାସୀ ଜାଣିବାର ଆବଶ୍ୟକତା ରହିଛି । ’’

ଏହା ପୂର୍ବରୁ କଂଗ୍ରେସ ସଭାପତି ମଲ୍ଲିକାର୍ଜୁନ ଖର୍ଗେ ଟ୍ବିଟ କରି କହିଥିଲେ, ଆମର ଦାବି ହେଉଛି ମଣିପୁର ଘଟଣାରେ ପ୍ରଧାନମନ୍ତ୍ରୀ ମୋଦି ଗୃହକୁ ଆସି ଆଲୋଚନା କରନ୍ତୁ । ଯଦି 140 କୋଟିଙ୍କ ନେତା ସଂସଦ ବାହାରେ ଗଣମାଧ୍ୟମ ସହ ଆଲୋଚନା କରୁଛନ୍ତି, 140 କୋଟି ଜନତାଙ୍କ ପ୍ରତିନିଧି ସଂସଦ ମଧ୍ୟରେ ବସିଛନ୍ତି । ତେଣୁ ପ୍ରଧାନମନ୍ତ୍ରୀ ସଂସଦରେ ଆଲୋଚନା କରନ୍ତୁ । କଂଗ୍ରେସ ସାଂସଦ ମନୀଷ ତିୱାରୀ କହିଛନ୍ତି ଆମର ଦାବି ହେଉଛି ମଣିପୁର ଘଟଣାରେ ଉଉୟ ସଦନରେ ପ୍ରଧାନମନ୍ତ୍ରୀ ଏକ ବ୍ୟାପକ ଆଲୋଚନା କରନ୍ତୁ । ଆମ ଆଦମୀ ପାର୍ଟି ସାଂସଦ ରାଘବ ଚଢା କହିଛନ୍ତି, ମଣିପୁର ଘଟଣାକୁ ନେଇ ସଂସଦରେ ଆଲୋଚନା ପାଇଁ ଦେଶର ଜନତା ଦାବି କରୁଛନ୍ତି । ଦେଶରେ ଶାନ୍ତି ବଜାୟ ରଖିବା କେନ୍ଦ୍ର ସରକାରଙ୍କ ଦାୟିତ୍ବ ।

ଅନ୍ୟପଟେ ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଯୋଶୀ କହିଥିଲେ ମଣିପୁର ଭାଇରାଲ ଭିଡିଓ ହେଉ କି ହିଂସା ଘଟଣା, ପୁରା ପ୍ରସଙ୍ଗରେ କେନ୍ଦ୍ର ସରକାର ଦୁଃଖ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ଘଟଣାକୁ ନେଇ ଦୁଃଖିତ । ବିରୋଧୀଙ୍କୁ ଆମର ନିବେଦନ, ରାଜନୀତି ବନ୍ଦ କରି ଆଲୋଚନା ପାଇଁ ଆସନ୍ତୁ । ସଂସଦରେ ଆଲୋଚନା ହେଲେ, ସରକାର ବର୍ତ୍ତମାନ ସୁଦ୍ଧା କଣ କଣ ପଦକ୍ଷେପ ନେଇଛନ୍ତି, କଣ କରିଛନ୍ତି ସଂସଦ ଅବଗତ ହେବ । ଏହାସହ ବିରୋଧୀଙ୍କ ପରାମର୍ଶ ମଧ୍ୟ ସରକାରଙ୍କୁ ମିଳିବ । ମାମଲା ସମ୍ବେଦନଶୀଲ । ଆଲୋଚନା ମାଧ୍ୟମରେ ସମାଧାନ ହୋଇପାରିବ। ବିରୋଧୀ ସଂସଦକୁ ଅଚଳ କରିବା ପରିବର୍ତ୍ତେ ଆଲୋଚନା ପାଇଁ ଆସନ୍ତୁ ।

ସୂଚନାଯୋଗ୍ୟଯେ ସଂସଦର ମୌସୁମୀ ଅଧିବେଶନ ଗତ 20 ତାରିଖରୁ ଆରମ୍ଭ ହୋଇଛି । ଯାହା ଅଗଷ୍ଟ 11 ପର୍ଯ୍ୟନ୍ତ ଚାଲିବ । ଏହି ସ୍ବଳ୍ପକାଳୀନ ଅଧିବେଶନରେ କେନ୍ଦ୍ର ସରକାର ମୋଟ 31 ଟି ବିଲ ଆଣିବାକୁ ଯାଉଛନ୍ତି । ଅଧିବେଶନରେ ଆସିବାକୁ ଥିବା ବିଲ ମଧ୍ୟରେ ରହିଛି ଗଭରମେଣ୍ଟ ଅଫ ନ୍ୟାସନାଲ କ୍ୟାପିଟାଲ ଟେରିଟୋରୀ ଅଫ ଦିଲ୍ଲୀ(ଆମେଣ୍ଡମେଣ୍ଡ) ବିଲ 2023, ଦ ସିନେମାଟୋଗ୍ରାଫି (ଆମେଣ୍ଡମେଣ୍ଡ) ଆକ୍ଟ 2019, ଡିଏନଏ ଟେକ୍ନୋଲୋଜୀ ଆକ୍ଟ( ୟୁଜ ଆଣ୍ଡ ଆପ୍ଲିକେଶନ) ରେଗୁଲେସନ ବିଲ 2019, ଦ ମେଡିଏସନ ବିଲ2023, ଦ ବାୟୋଲୋଜିକାଲ ଡାଇଭର୍ସିଟି (ଆମେଣ୍ଡମେଣ୍ଡ) ବିଲ 2023, ଦ ମଲ୍ଟି ଷ୍ଟେଟ କୋ- ଅପେରେଟିଭ ସୋସାଇଟି (ଆମେଣ୍ଡମେଣ୍ଡ) ବିଲ 2022, ଦ ଜନ ବିଶ୍ବାସ (ଆମେଣ୍ଡମେଣ୍ଡ ଅଫ ପ୍ରୋଭିଜନ) ବିଲ 2023, ଦ ଫରେଷ୍ଟ (କନଜରଭେସନ) (ଆମେଣ୍ଡମେଣ୍ଡ) ବିଲ 2023, ଦ କନଷ୍ଟିଚ୍ୟୁସନ (ସିଡୁଲଟ୍ରାଇଭ) ଥାର୍ଡ (ଆମେଣ୍ଡମେଣ୍ଡ) ବିଲ 2022( ଫର ହିମାଚଳ ପ୍ରଦେଶ), ଦ ପୋଷ୍ଟାଲ ସର୍ଭିସ ବିଲ 2023, ଦ ନ୍ୟାସନାଲ କୋ-ଅପରେଟିଭ ୟୁନିଭର୍ସିଟି ବିଲ 2023, ଦ ଡିଜିଟାଲ ଡାଟା ପ୍ରୋଟେକସନ ବିଲ 2023, ଦ ପ୍ରୋଭିଜନାଲ କଲେକ୍ସସନ ଅଫ ଟାକ୍ସ ବିଲ 2023, ଦ ନ୍ୟାସନାଲ ଡେଣ୍ଟାଲ କମିଶନ ବିଲ 2023, ଦ ଡ୍ରଗ୍ସ ମେଡିକାଲ, ଡେଭାଇସ ଆଣ୍ଡ କସମେଟିକ୍ସ ବିଲ 2023, ଦ ଜମ୍ମୁ କାଶ୍ମୀର ରିଜର୍ଭଭେସନ (ଆମେଣ୍ଡମେଣ୍ଡ) ବିଲ 2023 ସମେତ ମୋଟ 31 ଟି ବିଲ କେନ୍ଦ୍ର ସରକାର ସଂସଦରେ ଆଗତ କରିବେ ।