ଚଣ୍ଡିଗଡ଼: ପଞ୍ଜାବ ବିଧାନସଭା ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ ତାରିଖ ଘୋଷଣା ହୋଇଛି । ଜାନୁଆରୀ ୨୫ ତାରିଖରେ ଆଶାୟୀମାନେ ପ୍ରାର୍ଥୀପତ୍ର ଦାଖଲ କରିବେ । ଏହାକୁ ନେଇ ପଞ୍ଜାବ ନିର୍ବାଚନ ଆୟୋଗ ଘୋଷଣା କରିଛନ୍ତି ।
ଏହାପରେ ଫେବ୍ରୁଆରୀ ୨ ତାରିଖରେ ପ୍ରାର୍ଥୀପତ୍ର ଯାଞ୍ଚ ହେବ । ଫେବ୍ରୁଆରୀ ୪ ତାରିଖ ସୁଦ୍ଧା ଆଶାୟୀମାନେ ପ୍ରାର୍ଥୀପତ୍ର ପ୍ରତ୍ୟାହାର କରି ପାରିବେ । ଜାନୁଆରୀ ୨୫ ତାରିଖରୁ ଫେବ୍ରୁଆରୀ ୧ ତାରିଖ ପର୍ଯ୍ୟନ୍ତ ପ୍ରାର୍ଥୀପତ୍ର ଦାଖଲ ପ୍ରକ୍ରିୟା ଜାରି ରହିବ ।
ସେହିଭଳି ପ୍ରାର୍ଥୀପତ୍ର ଦାଖଲ ପାଇଁ ସ୍ବତନ୍ତ୍ର ସମୟ ମଧ୍ୟ ଧାର୍ଯ୍ୟ କରାଯାଇଛି । ସକାଳ ୧୧ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ଆଶାୟୀମାନେ ପ୍ରାର୍ଥୀପତ୍ର ଦାଖଲ କରି ପାରିବେ । ପ୍ରାର୍ଥୀପତ୍ର ଦାଖଲ ପାଇଁ ଆଶାୟୀଙ୍କ ପଞ୍ଜାବରେ ଯେକୌଣସି ନିର୍ବାଚନ ମଣ୍ଡଳୀରେ ଭୋଟର ତାଲିକାରେ ନାମ ରହିବା ଆବଶ୍ୟକ ।
ତା ସହିତ ପ୍ରାର୍ଥୀମାନେ ନାମାଙ୍କନ ପତ୍ର ଦାଖଲ ବେଳେ ରିଟର୍ଣ୍ଣିଂ ଅଧିକାରୀଙ୍କ ସମ୍ମୁଖରେ ଏକ ଶପଥ ମଧ୍ୟ ନେବେ । ଜାନୁଆରୀ ୨୬ ତାରିଖ ଛୁଟି ଥିବାରୁ କୌଣସି ପ୍ରାର୍ଥୀ ସେହି ଦିନ ପ୍ରାର୍ଥୀପତ୍ର ଦାଖଲ କରି ପାରିବେ ନାହିଁ । ଜାନୁଆରୀ ୮ ତାରିଖରୁ ପଞ୍ଜାବରେ ଆଦର୍ଶ ଆଚରଣ ବିଧି ଲାଗୁ ହୋଇଛି । ଆସନ୍ତା ବିଧାନସଭା ନିର୍ବାଚନରେ ପଞ୍ଜାବରେ ମୋଟ ୨ କୋଟି ୧୨ ଲକ୍ଷ ୭୫ ହଜାର ୬୬ ଭୋଟର ନିଜ ମତ ସାବ୍ୟସ୍ତ କରିବେ ।
@ANI
