ଲକ୍ଷ୍ନୌ: ଉତ୍ତର ପ୍ରଦେଶର ଫିରୋଜାବାଦରୁ ଏକ ଆଶ୍ଚର୍ଯ୍ୟଜନକ ଅପରାଧ ସାମ୍ନାକୁ ଆସିଛି । ଜଣେ ଚାର୍ଟାଡ ଆକାଉଣ୍ଟ ନିଜର ଦ୍ୱିତୀୟ ପତ୍ନୀଙ୍କୁ ଗୁଳି କରି ହତ୍ୟା କରିଥିବା ଅଭିଯୋଗ ହୋଇଛି । ମାତ୍ର ହତ୍ୟାକାଣ୍ଡ ଭିଆଇବା ପରେ ହସ୍ପିଚାଲରେ ବିଦ୍ୟୁତ ଆଘାତରେ ପତ୍ନୀଙ୍କ ମୃତ୍ୟୁ ହୋଇଥିବା ଦର୍ଶାଇବାକୁ ସେ ପ୍ରୟାସ କରିଥିଲା । ମାତ୍ର ତାହା ସଫଳ ହୋଇନି । ମୃତଦେହ ବ୍ୟବଚ୍ଛେଦରେ ଗୁଳିମାଡରେ ମୃତ୍ୟୁ ହୋଇଥିବା ସାମ୍ନାକୁ ଆସିବା ପରେ ପୋଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ପ୍ରାଥମିକ ତଦନ୍ତ ପରେ ଏହା ଏକ ହତ୍ୟାକାଣ୍ଡ ହୋଇଥିବା ନେଇ ପୋଲିସ ସ୍ପଷ୍ଟ ମଧ୍ୟ କରିଛି ।
ଘଟଣାଟି ତୁଣ୍ଡଲା ସହରର ଗୋଲ୍ଡେନ ସିଟିରେ ଘଟିଛି । ଏଠାରେ ରହୁଥିବା ଚାର୍ଟାର୍ଡ ଆକାଉଣ୍ଟାଣ୍ଟ ଉଦୟ ପ୍ରତାପ ସିଂ ପୂର୍ବରୁ ବିବାହ କରିଥିଲେ । ତାଙ୍କର ପ୍ରଥମ ପତ୍ନୀ ଉତ୍ତର ପ୍ରଦେଶ ଏଟାରେ ରୁହନ୍ତି । ମାତ୍ର ଦୁଇ ବର୍ଷ ପୂର୍ବେ ସେ ମମତା ନାମ୍ନୀ ଜଣେ ଯୁବତୀଙ୍କୁ ପ୍ରେମ ବିବାହ କରିଥିଲେ । ଗତ ମଙ୍ଗଳବାର ରାତିରେ ସନ୍ଦେହଜନକ ସ୍ଥିତିରେ ଦ୍ୱିତୀୟ ପତ୍ନୀ ମମତାଙ୍କର ମୃତ୍ୟୁ ହୋଇଥିଲା । ମମତାଙ୍କ ମୃତ୍ୟୁ ପରେ ଉଦୟ ତାଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି ମଧ୍ୟ କରିଥିଲେ । ଏଠାରେ ଡାକ୍ତରମାନେ ମହିଳାଙ୍କୁ ମୃତ ଘୋଷଣା କରିଥିଲେ । ଏହା ପରେ ଉଦୟ ପୋଲିସକୁ ଏ ସମ୍ପର୍କରେ ସୂଚନା ଦେଇଥିଲେ। ତେବେ ମହିଳାଙ୍କର ମୃତ୍ୟୁ ବିଦ୍ୟୁତ ଆଘାତରେ ହୋଇଥିବା ନେଇ ଅଭିଯୁକ୍ତ ପୋଲିସକୁ କହିଥିଲା । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା । ବ୍ୟବଚ୍ଛେଦେ ମହିଳାଙ୍କ ମୃତ୍ୟୁ ଗୁଳିମାଡ କାରଣରୁ ହୋଇଥିବା ଜଣାପଡିଥିଲା ।
ପୋଲିସ ଅଭିଯୁକ୍ତକୁ ଗିରଫ କରି ପ୍ରାଥମିକ ଜେରା ପରେ କୋର୍ଟ ଚାଲାଣ କରିଛି । ଅଭିଯୁକ୍ତ ପୂର୍ବରୁ ବିବାହିତ ଥିବା ବେଳେ ପ୍ରେମ କରି ଦ୍ବିତୀୟ ବିବାହ କରିଥିଲା । କିଛି ଦିନ ପରେ ଦ୍ବିତୀୟ ପତ୍ନୀଙ୍କ ସହ କଳହ ଦେଖାଯାଇଥିଲା । ଏହା ପରେ ସେ ଦ୍ବିତୀୟ ପତ୍ନୀ ମମତାଙ୍କୁ ଛାଡପତ୍ର ପାଇଁ ଚାପ ପକାଇଥିଲା । ହେଲେ ମମତା ଏପରି କରିବାକୁ ମନା କରିଦେଇଥିଲେ । ମଙ୍ଗଳବାର ରାତିରେ ଉଭୟଙ୍କ ମଧ୍ୟରେ ତିକ୍ତତା ବଢିବା ସହ ଅଭିଯୁକ୍ତ ଉଦୟ ପତ୍ନୀ ମମତାଙ୍କ ଉପରକୁ ଗୁଳିମାଡ କରିଥିଲା । ଏଥିରେ ତାଙ୍କର ମୃତ୍ୟୁ ହେବା ପରେ ସେ ତାଙ୍କୁ ହସ୍ପିଟାଲରେ ମଧ୍ୟ ଭର୍ତ୍ତି କରି ଏହାକୁ ଦୁର୍ଘଟଣାଜନିତ ମୃତ୍ୟୁ ବୋଲି ଦର୍ଶାଇବାକୁ ପ୍ରୟାସ କରିଥିଲା । ହେଲେ ସବୁ ପ୍ଲାନ ପୋଲିସ ତଦନ୍ତରେ ଧରା ପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
