ଲକ୍ଷ୍ନୌ: ଆହ୍ଲାବାଦ୍ ହାଇକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ । ଏବେ ପ୍ରତ୍ୟେକ ନିଜ ନିଜର ମନପସନ୍ଦ ଜୀବନସାଥୀ ଚୟନ କରିପାରିବେ । କାରଣ ଜୀବନସାଥୀ ଚୟନ କରିବା ଏକ ମୌଳିକ ଅଧିକାର । ଜାତି, ଧର୍ମ ଏବଂ ବର୍ଣ୍ଣ ନିର୍ବିଶେଷରେ ଜଣେ ଜୀବନସାଥୀ ବାଛିବାର ଅଧିକାର ହେଉଛି ବ୍ୟକ୍ତି ସ୍ବାଧୀନତାର ମୂଳ ଆଧାର । ତେଣୁ ବିବାହ କ୍ଷେତ୍ରରେ ଏକ ବ୍ୟକ୍ତିଗତ ସମ୍ପର୍କରେ ହସ୍ତକ୍ଷେପ କରିବାର ଅର୍ଥ ଦୁଇ ଜଣ ବ୍ୟକ୍ତିଙ୍କ ସ୍ବାଧୀନତାର ଅଧିକାରକୁ ଉଲ୍ଲଂଘନ କରିବା । ଉତ୍ତରପ୍ରଦେଶରେ ଧର୍ମ ପରିବର୍ତ୍ତନ କରି ଜଣେ ହିନ୍ଦୁ ମହିଳାଙ୍କୁ ବିବାହ କରିଥିବା ଜଣେ ମୁସଲିମ ଯୁବକଙ୍କ ଦ୍ବାରା ହୋଇଥିବା ଏକ ଆବେଦନର ଶୁଣାଣି କରି ଆହ୍ଲାବାଦ ହାଇକୋର୍ଟ ଏହି ରାୟ ଦେଇଛନ୍ତି ।
ଗତବର୍ଷ ଉତ୍ତରପ୍ରଦେଶ କୁଶିନଗରର ଜଣେ ମୁସଲିମ ଯୁବକ ସଲାମତ୍ ଅନ୍ସାରି ଜଣେ ହିନ୍ଦୁ ମହିଳା ପ୍ରିୟଙ୍କା ଖାରୱରଙ୍କୁ ବିବାହ କରିଥିଲେ । ପ୍ରିୟଙ୍କା ତାଙ୍କ ବାପା ମା’ଙ୍କ ଇଚ୍ଛା ବିରୋଧରେ ଧର୍ମ ପରିବର୍ତ୍ତନ କରି ସଲାମତ୍ଙ୍କୁ ବିବାହ କରିଥିଲେ। ପରିବାରର ଅଭିଯୋଗ ଆଧାରରେ ଝିଅକୁ ନାବାଳିକା ଦର୍ଶାଇ ସଲାମତ୍ଙ୍କ ବିରୋଧରେ ପୋକ୍ସୋ ଆଇନ ଅଧୀନରେ ମାମଲା ରୁଜୁ ହୋଇଥିଲା । ଏହି ମାମଲାର ଶୁଣାଣି କରି ଆଜି ହାଇକୋର୍ଟ ଏଭଳି ମତ ରଖିଛନ୍ତି ।
ଅଦାଲତ କହିଛନ୍ତି ଯେ, କାହାର ବ୍ୟକ୍ତିଗତ ସମ୍ପର୍କରେ ହସ୍ତକ୍ଷେପ କରିବା ହେଉଛି ସେମାନଙ୍କ ସ୍ବାଧିନତା ଅଧିକାରକୁ ଉଲ୍ଲଂଘନ କରିବା । ଏହା ସହ ଜଣେ ଯୁବତୀଙ୍କ ପିତାଙ୍କ ଦ୍ବାରା ଦିଆଯାଇଥିବା ଏଫଆଇଆରକୁ କୋର୍ଟ ଖାରଜ କରିଦେଇଛନ୍ତି । ତେବେ 25 ଅଗଷ୍ଟ 2019 ରେ କୁଶୀନଗରର ବିଷ୍ଣୁପୁର ପୋଲିସ ଷ୍ଟେସନରେ ଦାଖଲ ହୋଇଥିବା ଆଇପିସିର ଧାରା 363, 366, 352, 506 ଏବଂ ପୋକ୍ସୋ ଆକ୍ଟର ଧାରା 7/8 ର FIR ରଦ୍ଦ କରିବାକୁ ଆବେଦନ କରାଯାଇଥିଲା ।
