ଶ୍ରୀନଗର: ବିକାଶ ପଥରେ ଜମ୍ମୁକାଶ୍ମୀର । ଆସନ୍ତା ୨ ବର୍ଷ ଭିତରେ ଖର୍ଚ୍ଚ ହେବ 60,000 କୋଟି । ଏନେଇ ସୂଚନା ଦେଇଛନ୍ତି ପ୍ରଯୁକ୍ତିବିଦ୍ୟା ଏବଂ ଦକ୍ଷତା ବିକାଶ ମନ୍ତ୍ରୀ ରାଜୀବ ଚନ୍ଦ୍ର ଶେଖର । କେନ୍ଦ୍ର ଶାସିତ ଅଞ୍ଚଳ ବିକାଶ ଓ ସମୃଦ୍ଧତାର ଏକ ନୂଆ ରୂପ ଦେଖିବ । କେନ୍ଦ୍ର ସରକାର କେନ୍ଦ୍ର ଶାସିତ ଅଞ୍ଚଳରେ 60,000 କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା ପ୍ରସ୍ତୁତ କରିଛନ୍ତି। ଏହି ଅର୍ଥ ଦକ୍ଷତା ବିକାଶ, ଉଦ୍ୟୋଗୀ ଏବଂ ସୂଚନା ପ୍ରଯୁକ୍ତିବିଦ୍ୟା ପାଇଁ ଖର୍ଚ୍ଚ କରାଯିବ । ଜାମ୍ମୁ କାଶ୍ମୀରରେ ଆୟୋଜିତ ହୋଇଥିବା ଏକ କାର୍ଯ୍ୟକ୍ରମରେ ଏଭଳି କହିଛନ୍ତି ମନ୍ତ୍ରୀ ରାଜୀବ ଚନ୍ଦ୍ରଶେଖର ।
ରୋଜଗାରର ସୁଯୋଗ ସୃଷ୍ଟି କରିବା, ଯୁବକମାନଙ୍କୁ ମାଇକ୍ରୋ ଆୟ ସୃଷ୍ଟି କରୁଥିବା ୟୁନିଟ୍ ଗଠନ ଏବଂ ସ୍ଥାନୀୟ ଅର୍ଥବ୍ୟବସ୍ଥାକୁ ଉତ୍ସାହିତ କରିବା ପାଇଁ ଏହି ରାଶି ବ୍ୟବହାର କରାଯିବ ବୋଲି ସେ କହିଛନ୍ତି। କାଶ୍ମୀରର ଯୁବକମାନେ ବହୁତ ଜ୍ଞାନୀ ଓ ପ୍ରତିଭାବାନ । ସେମାନଙ୍କୁ ଉଚ୍ଚ କୁଶଳୀ ତାଲିମ ଦେବା ଆବଶ୍ୟକ । ତାଲିମ ପରେ ସେମାନଙ୍କୁ ନିଯୁକ୍ତି ମିଳିବ। ଯାହା ଦ୍ବାରା ଏଠାରେ ରୋଜଗାର ସୃଷ୍ଟି ହେବ । ଚନ୍ଦ୍ରଶେଖର କହିଛନ୍ତି ଯେ ଆଇଟି ଏବଂ ଉତ୍ପାଦନ କ୍ଷେତ୍ରରେ ଏପ୍ରିଲ 1, 2020 ରୁ ଏପ୍ରିଲ 30, 2021 ପର୍ଯ୍ୟନ୍ତ ପ୍ରାୟ ଆଠ ଲକ୍ଷ ନୂତନ ନିଯୁକ୍ତି ସୃଷ୍ଟି ହୋଇଛି।
କେନ୍ଦ୍ର ସରକାରଙ୍କ ଲକ୍ଷ୍ୟ ରହିଛି ଏଠାରେ ଉଦ୍ୟୋଗୀ ବିବିଧତାକୁ ମଜବୁତ କରିବା । ପ୍ରତ୍ୟେକ ଯୁବକଙ୍କ ସ୍ୱପ୍ନକୁ ସାକାର କରିବା ଏବଂ ପୂରଣ କରିବା ଦିଗରେ ନିଯୁକ୍ତ ମାଧ୍ୟମରେ ସହାୟତା କରାଯିବ ବୋଲି ମନ୍ତ୍ରୀ କହିଛନ୍ତି । ସେ କହିଛନ୍ତି ଯେ ଜମ୍ମୁ କାଶ୍ମୀର ପରିଦର୍ଶନରେ ବିଭିନ୍ନ ମନ୍ତ୍ରୀମାନେ ଏଠାକୁ ଆସୁଛନ୍ତି । ଏଠାରେ ବିକାଶ ଏବଂ ବିଭିନ୍ନ ଦିଗ ସହ ଜଡିତ ସ୍ଥିତି ଯାଞ୍ଚ କରିବାର ଉଦ୍ଦେଶ୍ୟରେ ସେ ଆସୁଥିବା କହୁଛନ୍ତି । କେନ୍ଦ୍ରଶାସିତ ଅଞ୍ଚଳରେ ବୈପ୍ଲବିକ ପରିବର୍ତ୍ତନ ପାଇଁ କେନ୍ଦ୍ର ସରକାର ମିଶନ ଆରମ୍ଭ କରିଛନ୍ତି । ନୂଆ ଦକ୍ଷତା ବିକାଶ କ୍ଷେତ୍ରରେ ବୁଡଗାମ ଏକ ପାଇଲଟ ଜିଲ୍ଲାର ଭାବରେ ପରିଚିତ ହେବ ବୋଲି ମନ୍ତ୍ରୀ କହିଛନ୍ତି ।
(PTI)
