ଡେରାଡୁନ: ଉତ୍ତରାଖଣ୍ଡର ରୁଡକିରେ ବିଦେଶୀ ଛାତ୍ରଙ୍କୁ ନିର୍ମମ ଭାବେ ମାଡ ମରାଯାଉଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓକୁ ଭଗବାନପୁର ପୋଲିସ ଷ୍ଟେସନ ପରିସରରେ ଥିବା ରୁଡକି ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି କଲେଜର ବୋଲି ଜଣାଯାଉଛି । ଭିଡିଓରେ କଲେଜ ଗାର୍ଡ ଏବଂ କର୍ମଚାରୀଙ୍କ ଉପସ୍ଥିତିରେ ବିଦେଶୀ ଛାତ୍ରଙ୍କୁ ଆକ୍ରମଣ କରାଯାଇଥିବା ସୂଚନା ରହିଛି । ଏହି ଘଟଣା ପରେ ପୋଲିସ ଏହାର ତଦନ୍ତ ଜାରି ରଖିଛି ।
କୁହାଯାଉଛି ଯେ କୌଣସି କାରଣରୁ ଜଣେ ବିଦେଶୀ ଛାତ୍ରକୁ କଲେଜରୁ ବାହାର କରିଦିଆଯାଇଥିଲା । ଏହା ସତ୍ତ୍ବେ ଛାତ୍ର ଓ ତାଙ୍କ ସାଥୀ କଲେଜ ହଷ୍ଟେଲରେ ରହୁଥିଲେ । ଛାତ୍ରଙ୍କୁ କଲେଜରୁ ବାହାର କରିବା ପାଇଁ ଗାର୍ଡ ପହଞ୍ଚିଥିଲେ । ଏହାପରେ ସେଠାରେ ବିଦେଶୀ ଛାତ୍ର ଓ ଗାର୍ଡଙ୍କ ମଧ୍ୟରେ ବଚସା ହୋଇଥିଲା । ସଙ୍ଗେ ସଙ୍ଗେ ଘଟଣାସ୍ଥଳରେ 12ରୁ ଉର୍ଦ୍ଧ୍ବ ଗାର୍ଡ ପହଞ୍ଚିଥିଲେ । ଏହାପରେ ବିଦେଶୀ ଛାତ୍ରଙ୍କୁ ମାଡ ମାରୁଥିବା ଭିଡିଓରେ ଦେଖିବାକୁ ମିଳୁଛି । ପରେ ଉଭୟ ଛାତ୍ରଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଆରୋଗ୍ୟମ ହସ୍ପିଟାଲରେ ଭର୍ତ୍ତି କରାଯାଇଛି।
ଏଥି ସହ ମାଙ୍ଗାଲୋର ସିଓ ଅଭୟ କୁମାର କହିଛନ୍ତି ଯେ, ଛାତ୍ରଙ୍କୁ ମାଡ ମାରିବା ଘଟଣାରେ ଆହତ ଛାତ୍ରଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏହି ଘଟଣାରେ ବିଳମ୍ବିତ ରାତିରେ ସୂଚନା ମିଳିଥିଲା । ଏହାର ଆଧାରରେ 8 ଜଣଙ୍କୁ ଗିରଫ କରାଯାଇଛି। ବର୍ତ୍ତମାନ ଭିଡିଓ ଏବଂ ଅନ୍ୟାନ୍ୟ ଦିଗକୁ ଦୃଷ୍ଟିରେ ରଖି ତଦନ୍ତ କରାଯାଉଛି। ସିଓ କହିଛନ୍ତି ଯେ ଏପରି ଘଟଣା ନିନ୍ଦନୀୟ, ଦୋଷୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
