ଅମରାବତୀ: ଆନ୍ଧ୍ରପ୍ରଦେଶର କୁର୍ନୁଲ ଜିଲ୍ଲାରେ ଗୋଟିଏ ପରିବାରର ଚାରିଜଣଙ୍କ ଆତ୍ମହତ୍ୟା ଘଟଣାରେ ସୋମବାର ଜଣେ ସର୍କଲ ଇନ୍ସପେକ୍ଟର ଏବଂ ଜଣେ ହେଡ କନଷ୍ଟେବଳଙ୍କୁ ଗିରଫ କରାଯାଇଛି । ସୋମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ସୂଚନାନୁସାରେ, ନନ୍ଦୟାଲ ସହରରେ ଗୋଟିଏ ପରିବାରକୁ ପୋଲିସ ଏକ ମିଛ ଘଟଣାରେ ଫସାଇଥିବା ନେଇ ଗତ ନଭେମ୍ବର 4 ତାରିଖରେ ପରିବାରର ସମସ୍ତେ ଆତ୍ମହତ୍ୟା କରିବା ଭଳି ଚରମ ନିଷ୍ପତି ନେଇଥିଲେ । ଆତ୍ମହତ୍ୟା ପୂର୍ବରୁ ପରିବାରର ମୁଖ୍ୟ ସଲିମ ଏକ ଭିଡିଓରେ ପୋଲିସର ନିର୍ଯାତନାରେ ସପରିବାର ଏପରି ନିଷ୍ପତି ନେଇଥିବା କହିଥିଲେ । ତେବେ ଉକ୍ତ ଭିଡିଓକୁ ଆଧାର କରି ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଜଗମୋହନ ରେଡ୍ଡୀ ଘଟଣାର ତଦନ୍ତ ପାଇଁ ପୋଲିସକୁ ନିର୍ଦ୍ଦେଶ ଦେଇଥିଲେ । ଘଟଣାର ତଦନ୍ତ ପାଇଁ ଦୁଇ ବରିଷ୍ଠ ପୋଲିସ ଅଧିକାରୀ ଶଙ୍କା ବ୍ରାଟା ବାଗଚି ଓ ଗୁଣ୍ଟୁର ଆରିଫ ହାଫିଜଙ୍କୁ ଦାୟିତ୍ବଭାର ଦିଆଯାଇଥିଲା । ତଦନ୍ତ ପରେ ପୋଲିସ ସର୍କଲ ଇନ୍ସପେକ୍ଟର ସୋମଶେଖର ରେଡ୍ଡି ଓ ହେଡ କନଷ୍ଟେବଳ ଗଙ୍ଗାଧରଙ୍କୁ ଗିରଫ କରାଯାଇଛି ।
ଗିରଫ ଅଭିଯୁକ୍ତଙ୍କ ବିରୋଧରେ ଆତ୍ମହତ୍ୟା ନେଇ ପ୍ରର୍ବତ୍ତାଇବା ପାଇଁ ଧାରା 306, ଶାରୀରିକ ଆଘାତ ଦେବା ନେଇ ଧାରା 323, 324ରେ ମାମଲା ରୁଜ୍ଜୁ ହୋଇଛି । ଘଟଣାର ତଦନ୍ତ ଉପରେ ମୁଖ୍ୟମନ୍ତ୍ରୀ ଜଗମୋହନ ରେଡ୍ଡୀ ବ୍ୟକ୍ତିଗତ ଭାବରେ ନଜର ରଖିଥିବା କହିଛନ୍ତି ।
ତେବେ ଦୋଷୀ ଯିଏ ହେଉନା କାହିଁକି ତଦନ୍ତ କରାଯାଇ ତା ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଡିଜିପି ଗୌତମ ସାୱାଙ୍ଗ ।
ବ୍ୟୁରୋ ରିପୋର୍ଟ, ଇଟିଭି ଭାରତ
