ନୂଆଦିଲ୍ଲୀ: ୟୁପି ଓ ଉତ୍ତରାଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ନାରାୟଣ ଦତ୍ତ ତିୱାରୀଙ୍କ ପୁଅ ରୋହିତ ଶେଖର ତିୱାରୀଙ୍କ ହୋଇଥିଲା ସନ୍ଦିଗ୍ଧ ମୃତ୍ୟୁ । ତାଙ୍କ ମୃତ୍ୟୁ ରହସ୍ୟ ଉପରୁ ପରଦା ଉଠିବାରେ ଲାଗିଛି । ରୋହିତଙ୍କର ସ୍ବାଭାବିକ ମୃତ୍ୟୁ ହୋଇନାହିଁ । ବରଂ ଶ୍ବାସରୁଦ୍ଧ ହୋଇଥିବାରୁ ମୃତ୍ୟୁ ହୋଇଥିବା ପୋଷ୍ଟମର୍ଟମ ରିପୋର୍ଟରେ ଖୁଲାସା ହୋଇଛି । ତକିଆ ଚାପି ତାଙ୍କୁ ହତ୍ୟା କରାଯାଇଥିବା ରିପୋର୍ଟରୁ ଜାଣିବାକୁ ମିଳିଛି ।
ଶବ ବ୍ୟବଚ୍ଛେଦ ରିପୋର୍ଟ ମିଳିବା ପରେ ଗୁରୁବାର ଦିଲ୍ଲୀ ପୋଲିସ ନିକଟରେ ଏକ ହତ୍ୟା ମାମଲା ରୁଜୁ କରିଛନ୍ତି ତାଙ୍କ ମା’ । ଅଭିଯୋଗ ଆଧାରରେ କ୍ରାଇମବ୍ରାଞ୍ଚ ଏହି ମାମଲାର ତଦନ୍ତ କରିବା ନେଇ ଜଣାପଡିଛି । ସେପଟେ ରୋହିତଙ୍କ ଘରେ ଲାଗିଥିବା ସିସିଟିଭି କ୍ୟାମେରାର ଫୁଟେଜ ସଂଗ୍ରହ କରୁଛି କ୍ରାଇମବ୍ରାଞ୍ଚ । ସୂଚନା ଅନୁସାରେ ତାଙ୍କ ଘରେ ୭ଟି ସିସିଟିଭି କ୍ୟାମେରା ଲାଗିଛି । ଯେଉଁଥିରୁ ୨ଟି କାମ କରୁ ନାହିଁ । ତେବେ ଏସବୁକୁ ଗୁରୁତର ସହ ନେଇ ହତ୍ୟା ଆଧାରରେ ତଦନ୍ତ କରୁଛି ପୋଲିସ ।
ତିନି ଦିନ ପୂର୍ବରୁ ୪୦ ବର୍ଷୀୟ ରୋହିତଙ୍କ ଘରୁ ତାଙ୍କ ମୃତଦେହ ମିଳିଥିଲା । ଏହି ସମୟରେ ତାଙ୍କ ନାକରୁ ରକ୍ତ ବାହାରୁଥିବା ଦେଖାଯାଇଥିଲା ।
