ନୂଆଦିଲ୍ଲୀ: କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଚଳିତ ମାସ ଶେଷ ପୂର୍ବରୁ ନୂଆଦିଲ୍ଲୀର ଲୋଧି ଇଷ୍ଟେଟ୍ 35 ର ସରକାରୀ ବଙ୍ଗଳା ଖାଲି କରିବେ ଓ ଗୁରୁଗ୍ରାମର ସେକ୍ଟର 42 ସ୍ଥିତ DLF ଅରାଲିଆରେ ଘରକୁ ସ୍ଥାନାନ୍ତର ହେବେ। ତେବେ ପ୍ରିୟଙ୍କା କିଛି ଦିନ ପାଇଁ ଗୁରୁଗ୍ରାମରେ ରହିବେ।
ସୂଚନାନୁଯାୟୀ, ଗୁରୁଗ୍ରାମ ଘରେ ଅଧିକାଂଶ ଜିନିଷ ସିଫ୍ଟ ସରିଛି । ସେଠାରେ ସମସ୍ତ ସୁରକ୍ଷା ବ୍ୟବସ୍ଥା କରାଯାଇଛି । ପ୍ରିୟଙ୍କା ଗାନ୍ଧୀଙ୍କ ପାଖରେ Z + ବର୍ଗର ସୁରକ୍ଷା ରହିଛି । ବର୍ତ୍ତମାନ ତାଙ୍କ ମା ସୋନିଆ ଗାନ୍ଧୀଙ୍କ ସରକାରୀ ବାସଭବନକୁ ଦିଲ୍ଲୀରେ ରାଜନୈତିକ ବୈଠକ ପାଇଁ ବ୍ୟବହାର କରିବେ।
ଏସପିଜି ସୁରକ୍ଷାକୁ ଦୃଷ୍ଟିରେ ରଖି 1997 ମସିହାରୁ ପ୍ରିୟଙ୍କା ଗାନ୍ଧୀଙ୍କୁ ନୂଆଦିଲ୍ଲୀର ଲୋଧି ଇଷ୍ଟେଟର 35 ନମ୍ବର ସରକାରୀ ବଙ୍ଗଳା ମିଳିଥିଲା କିନ୍ତୁ ଗତ ବର୍ଷ ଏସପିଜି ସୁରକ୍ଷାକୁ ହଟାଇ ଦିଆଯାଇଥିଲା। ଏସପିଜି ସୁରକ୍ଷା ହଟାଇବା ପରେ 1 ଜୁଲାଇରେ କେନ୍ଦ୍ର ସରକାରଙ୍କ ଗୃହ ଓ ନଗର ବ୍ୟାପାର ମନ୍ତ୍ରଣାଳୟ ସେମାନଙ୍କୁ 31 ଜୁଲାଇ ଅର୍ଥାତ ଏକ ମାସ ମଧ୍ୟରେ ସରକାରୀ ଘର ଖାଲି କରିବାକୁ ନୋଟିସ୍ ଦେଇଥିଲା।
ବଙ୍ଗଳା ଖାଲି କରିବାକୁ କେନ୍ଦ୍ର ସରକାର ନୋଟିସ ପାଇବା ପରେ ପ୍ରିୟଙ୍କା ଗାନ୍ଧୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ । ତେବେ ପ୍ରଧାନମନ୍ତ୍ରୀଙ୍କୁ ବାସଭବନ ପାଇଁ ଅନୁରୋଧ କରାଯାଇଥିବା କଥାକୁ ମିଥ୍ୟା ବୋଲି କହି ଖୁବ ଶୀଘ୍ର ସେ ବାସଭବନ ଖାଲି କରୁଛନ୍ତି ବୋଲି ପ୍ରତିକ୍ରିୟା ଦେଇଥିଲେ ।
