ନୂଆଦିଲ୍ଲୀ: 93 ବର୍ଷରେ ପାଦ ଦେଲେ ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ବିଟ ଯୋଗେ ଆଡଭାନୀଙ୍କୁ ଶୁଭେଚ୍ଛା ଜଣାଇବା ସହ ତାଙ୍କର ଦୀର୍ଘାୟୁ ପାଇଁ କାମନା କରିଛନ୍ତି । ଆଡଭାନୀଙ୍କ ବାସଭବନରେ ପ୍ରଧାନମନ୍ତ୍ରୀଙ୍କ ସମେତ ଗୃହ ମନ୍ତ୍ରୀ ଅମିସ ଶାହା ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡା ପ୍ରମୁଖ ପହଞ୍ଚି ଆଡଭାନୀଙ୍କୁ ଜନ୍ମ ଦିନରେ ଶୁଭେଚ୍ଛା ଜଣାଇଛନ୍ତି । ଏହାସହ କେକ୍ କାଟି ଜନ୍ମଦିନ ପାଳିଛନ୍ତି ।
ପ୍ରଧାନମନ୍ତ୍ରୀ ନେରନ୍ଦ୍ର ମୋଦି ଏନେଇ ଟ୍ବିଟ କରି କହିଛନ୍ତି, ଲୋକମାନଙ୍କ ନିକଟରେ ଦେଶର ବିକାଶରେ ଗୁରୁତ୍ତ୍ବପୂର୍ଣ୍ଣ ଭୂମିକା ଗ୍ରହଣ କରିଥିବା ସମ୍ମାନିତ ଏଲ.କେ ଆଡଭାନୀ ଜୀଙ୍କୁ ଅନେକ ଅନେକ ଅଭିନନ୍ଦନ । ଲକ୍ଷ ଲକ୍ଷ ଦଳୀୟ କର୍ମୀ ତଥା ଦେଶବାସୀଙ୍କ ପାଇଁ ସେ ପ୍ରତ୍ୟକ୍ଷ ପ୍ରେରଣା । ମୁଁ ତାଙ୍କର ଦୀର୍ଘ ଜୀବନ ଏବଂ ସୁସ୍ଥ ଜୀବନ ପାଇଁ ପ୍ରାର୍ଥନା କରୁଛି ।
ଭାରତର ରାଜନୀତିକୁ ନୂଆ ଧାରା ଦେଇଥିବା ବରିଷ୍ଠ ନେତା ଲାଲକୃଷ୍ଣ ଆଡଭାନୀ ବିଜେପିର ଭୀଷ୍ମ ପିତାମହ ଭାବରେ ବେଶ ଜଣାଶୁଣା । ବରିଷ୍ଠ ବିଜେପି ନେତା ତଥା ଦେଶର ସପ୍ତମ ଉପ-ପ୍ରଧାନମନ୍ତ୍ରୀ ଲାଲ କୃଷ୍ଣ ଆଡଭାନୀ 8 ନଭେମ୍ବର 1927 ରେ ପାକିସ୍ତାନର କରାଚିରେ ଏକ ହିନ୍ଦୁ ସିନ୍ଧି ପରିବାରରେ ଜନ୍ମଗ୍ରହଣ କରିଥିଲେ । ତାଙ୍କ ପିତାଙ୍କ ନାମ କିଶାନଚାନ୍ଦ ଆଡଭାନୀ ଏବଂ ମାତାଙ୍କ ନାମ ଜିଆନି ଦେବୀ ।
ସେ କରାଚିର ସେଣ୍ଟ ପାଟ୍ରିକ୍ ହାଇସ୍କୁଲରୁ ତାଙ୍କର ପ୍ରାଥମିକ ଶିକ୍ଷା ଗ୍ରହଣ କରିଥିଲେ । ଏହା ପରେ ସେ ହାଇଦ୍ରାବାଦ, ସିନ୍ଧର ଡିଜି ନ୍ୟାସନାଲ ସ୍କୁଲରେ ନାମ ଲେଖାଇଥିଲେ । ବିଭାଜନ ସମୟରେ ତାଙ୍କ ପରିବାର ପାକିସ୍ତାନ ଛାଡି ମୁମ୍ବାଇରେ ଅବସ୍ଥାନ କରିଥିଲେ । ଏଠାରେ ସେ ବମ୍ବେ ବିଶ୍ବବିଦ୍ୟାଳୟର ଲ କଲେଜରୁ ଆଇନ ଅଧ୍ୟୟନ କରିଥିଲେ । ତାଙ୍କ ପତ୍ନୀଙ୍କ ନାମ କମଲା ଆଡଭାନୀ ଓ ପୁଅର ନାମ ଜୟନ୍ତ ଆଡଭାନୀ । ଏବଂ ଝିଅର ନାମ ପ୍ରତୀଭା ଆଡଭାନୀ ।
ଲାଲ କୃଷ୍ଣ ଆଡଭାନୀ 2002 ରୁ 2004 ମଧ୍ୟରେ ଅଟଳ ବିହାରୀ ବାଜପେୟୀ ସରକାରରେ ଭାରତର ସପ୍ତମ ଉପମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ଏହାପୂର୍ବରୁ ସେ 1998ରୁ 2004 ମଧ୍ୟରେ ବିଜେପି ନେତୃତ୍ତ୍ବଧୀନ ଏନଡିଏରେ ଗୃହମନ୍ତ୍ରୀ ଥିଲେ । ଭାରତୀୟ ଜନତା ପାର୍ଟିର ଭିତ୍ତିପ୍ରସ୍ତର ସ୍ଥାପନ କରିବାରେ ତାଙ୍କର ରହିଛି ପ୍ରମୁଖ ଭୂମିକା । ସେ ଦଶମ ଏବଂ 14 ତମ ଲୋକସଭା ସମୟରେ ବିରୋଧୀ ଦଳର ନେତା ଭୂମିକାରେ ଅଭିନୟ କରିଥିଲେ । ସେ ରାଷ୍ଟ୍ରିୟ ସ୍ବୟଂ ସେବକ ସଙ୍ଗଠନ ମାଧ୍ୟମରେ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିଲେ । 2015ରେ ତାଙ୍କୁ ଭାରତର ଦ୍ବିତୀୟ ପ୍ରମୁଖ ନାଗରିକ ସମ୍ମାନ ପଦ୍ମଭୂଷଣ ପ୍ରଦାନ କରାଯାଇଥିଲା ।
