ବ୍ୟାଙ୍କକକ: ବ୍ୟାଙ୍କକର ନେସନାଲ ଇନଣ୍ଡୋର ଷ୍ଟାଡିୟମରେ ଆୟୋଜିତ ‘ସାଓ୍ଵାସଦୀ ପିଏମ ମୋଦି' କାର୍ଯ୍ୟକ୍ରମରେ ଯୋଗ ଦେଇଛନ୍ତି ପ୍ରଧାମନ୍ତ୍ରୀ ନରେନ୍ଦ୍ର ମୋଦି। ଏହି କାର୍ଯ୍ୟକ୍ରମରେ ସେ ଥାଇଲାଣ୍ଡରେ ବସବାସ କରୁଥିବା ହଜାର ହଜାର ପ୍ରବାସୀ ଭାରତୀୟଙ୍କୁ ଉଦବୋଧନ ଦେଇଛନ୍ତି । ତେବେ ଏହି ସମୟରେ ଭାରତ ସହ ଥାଇଲାଣ୍ଡର ଐତିହାସିକ ସମ୍ପର୍କକୁ ମନେ ପକାଇଛନ୍ତି ମୋଦି । ଏନେଇ ସେ କହିଛନ୍ତି, ଥାଇଲାଣ୍ଡବାସୀଙ୍କ ପରମ୍ପରା, ଆସ୍ଥା, ସ୍ଥାପତ୍ୟ ଏବଂ ଲୋକଙ୍କ କଥାବାର୍ତ୍ତାର ଢଙ୍ଗ ସବୁଥିରେ ଭାରତର ଝଲକ ରହିଛି। ଥାଇଲାଣ୍ଡର କୋଣ ଅନୁକୋଣ ନିଜର ଅନୁଭବ ହେଉଥିବା ସେ କହିଛନ୍ତି।
ତେବେ ଭାରତ-ଥାଇଲାଣ୍ଡ ଭିତରେ ଥିବା ସମ୍ପର୍କ କେବଳ ଦୁଇ ଦେଶର ସରକାରଙ୍କ ନୁହେଁ। ଇତିହାସରେ ଥିବା ପ୍ରତ୍ୟେକ ମୁହୁର୍ତ୍ତ ଓ ଉତ୍ସବ ଆମ ସମ୍ପର୍କକୁ ମଜବୁତ୍ କରିଛି ବୋଲି ପିଏମ ମୋଦି କହିଛନ୍ତି। ଏହା ବ୍ୟତୀତ ସେ ସାଓ୍ଵାସଦୀ ମୋଦିର ଅର୍ଥ ସେଠାରେ ଉପସ୍ଥିତ ଲୋକଙ୍କୁ ବୁଝାଇଛନ୍ତି । ଏହାର ଅର୍ଥ ଆପଣଙ୍କର କଲ୍ୟାଣ ହେଉ, ଅଭିବାଦନ ହେଉ।
ତେବେ ଏହି କାର୍ଯ୍ୟକ୍ରମରେ ସେ ମୋଦି ସରକାରଙ୍କ ଉପଲବ୍ଧି ସମ୍ପର୍କରେ ମଧ୍ୟ ବଖାଣିଛନ୍ତି । ଧାରା 370 ଉଚ୍ଛେଦ ପ୍ରସଙ୍ଗକୁ ଖାସ ଢଙ୍ଗରେ ଉପସ୍ଥାପନା କରିଛନ୍ତି ମୋଦି । ସେ କହିଛନ୍ତି, ଆମେ ସେହି ଲକ୍ଷ୍ୟ ଦିଗରେ କାମ କରୁଛୁ ଯାହା ପୂର୍ବରୁ ଅସମ୍ଭବ ଥିଲା । ଆତଙ୍କବାଦର ମଞ୍ଜି ବୁଣୁଥିବା ଏକ ବହୁତ ବଡ କାରକକୁ ଦେଶରୁ ମୁକ୍ତ କରାଯାଇଛି ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି। ଏହା ସହିତ ସେ କହିଛନ୍ତି, ଭାରତରେ ଗତ 5 ବର୍ଷରେ ଅନେକ ପରିବର୍ତ୍ତନ ଆସିଛି।
ଯାହା ଫଳରେ ସାଧାରଣ ଜନତା ଏଥର ପୂର୍ଣ୍ଣବହୁମତ ଦେଇ ଆମକୁ ଚୟନ କରିଛନ୍ତି। ଭାରତର ଅର୍ଥବ୍ୟବସ୍ଥାକୁ 5 ହଜାର ଆରବ ଡଲାର ଅର୍ଥବ୍ୟବସ୍ଥାରେ ପରିଣତ କରିବା ପାଇଁ ଆମେ ପ୍ରତିବଦ୍ଧ । ଏହି ଦିଗରେ କାର୍ଯ୍ୟ କରିବା ପାଇଁ କଠିନ ପରିଶ୍ରମ କରାଯାଉଛି ବୋଲି ସେ କହିଛନ୍ତି। ଏହି କାର୍ଯ୍ୟକ୍ରମରେ ସମ୍ବୋଧନ କରିବା ପୂର୍ବରୁ ପ୍ରଧାନମନ୍ତ୍ରୀ ମୋଦି ଗୁରୁ ନାନକଙ୍କ ୫୫୦ ତମ ଜୟନ୍ତୀ ଅବସରରେ ଥାଇଲାଣ୍ଡରେ ଏକ ସ୍ମାରକୀ ମୁଦ୍ରା ଉନ୍ମୋଚନ କରିଛନ୍ତି।
