ପାଟନା: ବିରୋଧୀ କେନ୍ଦ୍ରରେ ଏକ ଦୁର୍ବଳ ସରକାର ଚାହୁଁଛନ୍ତି । ଯେଉଁ ସରକାର ସେମାନଙ୍କ ଇଚ୍ଛା ପୁରଣ କରିପାରିବ । ସେମାନଙ୍କ ଇଙ୍ଗିତରେ ଚାଲିପାରିବ । ଏପରି କହି ବିରୋଧିଙ୍କୁ କଡ଼ା ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ ମୋଦି । ଆଜି ବିହାରର ମୁଜାଫରପୁର ସଂସଦୀୟ କ୍ଷେତ୍ରରେ ପ୍ରଚାର ସମୟରେ ଏପରି କହିଛନ୍ତି ମୋଦି ।
ମୋଦି କହିଛନ୍ତି ଭାରତୀୟ ଜନତା ପାର୍ଟି ଏହି ନିର୍ବାଚନରେ ବହୁମତ ସହ ବିଜୟ ଲାଭ କରିବ । ଶେଷ ହୋଇଥିବା 4ଟି ପର୍ଯ୍ୟାୟ ନିର୍ବାଚନରୁ ଏହା ସ୍ପଷ୍ଟ ହୋଇଛି । ଅପରପକ୍ଷରେ ବିରୋଧି ସେମାନଙ୍କ ପରାଜୟ ସୁନିଶ୍ଚିତ ବୋଲି ସେମାନେ ଜାଣି ସାରିଛନ୍ତି । ସେମାନେ ନିଜର ପରାଜୟକୁ ସହଜରେ ଗ୍ରହଣ କରିନପାରି ଏପରି ମନ୍ତବ୍ୟ ଦେଉଛନ୍ତି ବୋଲି ମୋଦି ନିର୍ବାଚନୀ ସଭାରେ ଯୋଗ ଦେଇ କହିଛନ୍ତି ।
ମୋଦି ଆହୁରି ମଧ୍ୟ କହିଛନ୍ତି, ମହାମିଲାଓ୍ବଟ ଗ୍ୟାଙ୍ଗରେ ସାମିଲ ଥିବା ଦଳ ଗୁଡ଼ିକରେ ଅନେକ ଗୋଟିଏ ବି ଆସନରେ ବିଜୟ ହାସଲ କରିପାରିବେ ନାହିଁ । ଏପରିକି ବିରୋଧି ଦଳର ନେତା ବାଛିବା ପାଇଁ ଆବଶ୍ୟକ ବିଧାୟକ ମଧ୍ୟ ବିଜୟ ହାସଲ କରିପାରିବେ ନାହିଁ ବୋଲି ମୋଦି ତାତ୍ସଲ୍ୟ କରିଛନ୍ତି । ରାଷ୍ଟ୍ରୀୟ ଜନତା ଦଳର ନାଁ ନନେଇ ମୋଦି କହିଥିଲେ ଯେ, ଯଦି ରାଜ୍ୟରେ ବିରୋଧି ବିଜୟୀ ହେଉଛନ୍ତି ତେବେ ବିହାରରେ ଅରାଜକତା ବୃଦ୍ଧି ପାଇବ । ଏହାର ପ୍ରମାଣ ଅତୀତରେ ଲେଖା ଅଛି ବୋଲି ସେ କହିଥିଲେ ।
