ଗାନ୍ଧୀନଗର: ଚଳିତ ବର୍ଷ ଗୁଜୁରାଟରେ ନବରାତ୍ରି ମହୋତ୍ସବ ପାଳନ କରାଯିବ ନାହିଁ । କୋରୋନା ମହାମାରୀ କାରଣରୁ ରାଜ୍ୟରେ କୌଣସି ଗରବା କାର୍ଯ୍ୟକ୍ରମକୁ ଅନୁମତି ଦିଆଯିବ ନାହିଁ ବୋଲି ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ନେତୃତ୍ୱାଧୀନ ସରକାର ଘୋଷଣା କରିଛନ୍ତି।
ସରକାର କହିଛନ୍ତି ଯେ, ଅକ୍ଟୋବର 17- 25 ଯାଏଁ ଅନୁଷ୍ଠିତ ହେବାକୁ ଥିବା ନବରାତ୍ରୀ ମହୋତ୍ସବ ରାଜ୍ୟରେ ଅନୁଷ୍ଠିତ କରାଯିବ ନାହିଁ। କୋରୋନା ମହାମାରୀକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଏହି ନିଷ୍ପତ୍ତି ନେଇଛନ୍ତି ।
ମୁଖ୍ୟମନ୍ତ୍ରୀ ବିଜୟ ରୁପାନି କହିଛନ୍ତି ଯେ, ପ୍ରତିବର୍ଷ ରାଜ୍ୟ ସରକାରଙ୍କ ଦ୍ବାରା 9 ଦିନିଆ ପାରମ୍ପାରିକ ନବରାତ୍ରୀ ମହୋତ୍ସବ ପାଳନ କରାଯାଏ । କିନ୍ତୁ ଚଳିତ ବର୍ଷ ପରିସ୍ଥିତି ଅଲଗା ରହିଛି । ରାଜ୍ୟରେ ବର୍ତ୍ତମାନ 1.3 ଲକ୍ଷ କୋରୋନା ସଂକ୍ରମିତ ଅଛନ୍ତି । ଏଥିସହ 3400 ଆକ୍ରାନ୍ତଙ୍କର କୋରୋନାରେ ମୃତ୍ୟୁ ଘଟିଛି । ଏଭଳି ସ୍ଥିତିରେ ଜନସାଧାରଣଙ୍କ ସୁରକ୍ଷା ଦୃଷ୍ଟିରୁ ଚଳିତ ବର୍ଷ ରାଜ୍ୟରେ ଗରବା ମହୋତ୍ସବ ପାଳନ କରାଯିବ ନାହିଁ ।
