ମୁମ୍ବାଇ: ସର୍ବୋଚ୍ଚ ନ୍ୟାୟାଳୟରେ ଜାରି ରହିଛି ମହାରାଷ୍ଟ୍ର ମାମଲାର ଶୁଣାଣି । ଏହା ସହିତ ତିନି ଦଳ ଶିବସେନା, କଂଗ୍ରେସ ଓ ଏନସିପିର ଓକିଲ ମଧ୍ୟ ନିଜ ନିଜର ପକ୍ଷ ରଖିଛନ୍ତି । ସେହିପରି ରାଜ୍ୟପାଳ ଭଗତ ସିଂହ କୋଶୟାରୀଙ୍କ ପକ୍ଷ ରଖିଛନ୍ତି ସଲିସିଟର ଜେନେରାଲ ତୁଷାର ମେହେଟ୍ଟା । ସମସ୍ତ ଦଳର ପକ୍ଷ ଶୁଣିବା ସହ ମାମଲାର ରାୟ କ’ଣ ଆସିବ ତାହା ଆମ ଉପରେ ଛାଡ଼ିଦିଅ ବୋଲି କହିଛନ୍ତି ସୁପ୍ରିମକୋର୍ଟଙ୍କ ଦ୍ବାରା ଗଠିତ ଖଣ୍ଡପୀଠ ।
ଏହି ମାମଲାକୁ ଅତିରଞ୍ଜିତ କରି ଉପସ୍ଥାପନା ନକରିବାକୁ ସମସ୍ତ ପକ୍ଷକୁ ନିର୍ଦ୍ଦେଶ ଦେଇଛନ୍ତି କୋର୍ଟ । ଯଥାଶୀଘ୍ର ଅର୍ଥାତ୍ 24 ଘଣ୍ଟା ମଧ୍ୟରେ ଗୃହରେ ବହୁମତ ସାବ୍ୟସ୍ତ କରିବାକୁ ସୁପ୍ରିମକୋର୍ଟରେ ଆବେଦନ କରିଛନ୍ତି ଶିବସେନା ପକ୍ଷର ଓକିଲ କପିଲ ସିବଲ ।
ବହୁମତ ସାବ୍ୟସ୍ତ କରିବାକୁ 14 ଦିନ ସମୟ ଦେଇଛନ୍ତି ରାଜ୍ୟପାଳ । ତା’ଠାରୁ କମ ଦିନର ସମୟ ଦିଆ ଯାଇପାରିବ ନାହିଁ ବୋଲି ସୁପ୍ରିମକୋର୍ଟରେ କହିଛନ୍ତି ବିଜେପି ଓକିଲ । ସେହିପରି ସଂଖ୍ୟା ଗରିଷ୍ଠତାର ପ୍ରମାଣ ଦେବାକୁ କେତେ ଦିନର ସମୟ ଧାର୍ଯ୍ୟ ହେବ ତାହା କୋର୍ଟ ନିର୍ଦ୍ଧାରିତ କରିବେ ବୋଲି କହିଛନ୍ତି ଅଦାଲତଙ୍କ ଦ୍ବାରା ଗଠିତ ତିନି ଜଣିଆ ଖଣ୍ଡପୀଠ।
