ନୂଆଦିଲ୍ଲୀ: ମୋଦି ସରକାରଙ୍କ ଯୋଜନା ନାଁରେ ଚାଲିଛି ଠକେଇ । ସୋସିଆଲ ମିଡିଆରେ ପ୍ରଧାନମନ୍ତ୍ରୀଙ୍କ ସୋଲାର ପ୍ୟାନେଲ ଯୋଜନାରେ ଆବେଦନ ପାଇଁ ଆସୁଛି ନିବେଦନ । ଖାଲି ସୋଲାର ପ୍ୟାନେଲ ନୁହେଁ, ମାଗଣାରେ ଲ୍ୟାପଟପ ପ୍ରଦାନ ପାଇଁ ଆସୁଛି ଲୋଭନୀୟ ଅଫର ।
ଆଉ ଯୋଜନାର ଲାଭ ଉଠାଇବା ପାଇଁ ନକଲି ଆବେଦନ କରିବାକୁ ମଧ୍ୟ ଅନଲାଇନ ଠକ ଲିଙ୍କ୍ ପଠାଉଛନ୍ତି । କିଛି ଲୋକେ ବିନା ଯାଞ୍ଚରେ ନିଜର ବ୍ୟକ୍ତିଗତ ସୂଚନା ଫେକ୍ ୱେବସାଇଟରେ ଦେଉଥିବା ଘଟଣା ସାମ୍ନାକୁ ଆସିଛି । ଯାହା ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
କିଛି ଠକ ସୋଲାର ପ୍ୟାନେଲ ଯୋଜନାର ଲାଭ ଉଠାଇବା ପାଇଁ ମାଗଣାରେ ଫର୍ମ ପୂରଣ କରିବାକୁ ନିବେଦନ କରୁଛନ୍ତି । ଏଥିସହ ଫର୍ମ ପୂରଣ କରିବାର ଶେଷ ତାରିଖ ଆସନ୍ତା 5 ତାରିଖ ବୋଲି ମେସେଜ ଆସୁଛି । ଏହି ଯୋଜନାର ଲାଭ ଉଠାଇବା ନିଜ ସାଙ୍ଗଙ୍କୁ ପଠାନ୍ତୁ ବୋଲି ଉଲ୍ଲେଖ ରହୁଛି । ଏଥିପାଇଁ ଠକମାନେ ଏକ ଲିଙ୍କ୍ ମଧ୍ୟ ଦେଉଛନ୍ତି ।
ସେହିପରି ମୋଦି ଦ୍ବିତୀୟ ଥର ପ୍ରଧାନମନ୍ତ୍ରୀ ହେବା ଖୁସିରେ 2 କୋଟି ଯୁବକ ଓ ଯୁବତୀଙ୍କୁ ମାଗଣାରେ ଲ୍ୟାପଟପ ଦିଆଯିବ ବୋଲି ସୋସିଆଲ ମିଡିଆରେ ଏକ ମେସେଜ ଘୁରି ବୁଲୁଥିବା ଜଣାପଡିଛି ।
