ଥିରୁଅନନ୍ତପୁରମ: କେରଳ ବନ୍ୟା । ଆଜିବି ସଭିଙ୍କ ମନେପଡେ ପ୍ରକୃତିର ସେହି କରାଳ ରୂପ । ଭୟଙ୍କର କେରଳ ବନ୍ୟାର କରୁଣ ଚିତ୍ର । କ୍ଷଣିକରେ ସ୍ବପ୍ନର ଘରକୁ ଉଜାଡିଦେଲା ପ୍ରକୃତିର ତାଣ୍ଡବ ରୂପ । ବସହରା ହୋଇଥିଲେ ହଜାର ହଜାର କେରଳବାସୀ । ଆଖି ସାମ୍ନାରେ ବନ୍ୟା ପାଣିରେ ଭାସିଯାଇ ପ୍ରାଣ ହରାଇଥିଲେ ଅନେକ । ଏପରିକି କେହି କେହି ମଧ୍ୟ ଆତ୍ମୀୟଙ୍କୁ ଶେଷ ଥର ଦେଖିବାକୁ ଅସମର୍ଥ ହୋଇଥିଲେ । ଆଜି ବି କେରଳ ବନ୍ୟା କଥା କହିଲେ ଶୁଭେ ବିପନ୍ନଙ୍କ ଆର୍ତ୍ତନାଦ ।
ତେବେ ଏପରି ସ୍ଥିତିରେ ନିଜସ୍ବ ଉଦ୍ୟମରେ କେରଳ ପୀଡିତଙ୍କୁ ବାସଗୃହ ଯୋଗାଇବାକୁ ହାତ ବଢାଇଥିଲା ଇନାଡୁ ରାମୋଜୀ ଗ୍ରୁପ । ପୀଡିତଙ୍କୁ ବାସସ୍ଥାନଟିଏ ଯୋଗାଇବା ପାଇଁ ରାମୋଜୀ ଗ୍ରୁପ ପାଣ୍ଠି ସଂଗ୍ରହ କରି କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନଙ୍କୁ ଦେଇଥିଲେ । ଯେଉଁ ପାଣ୍ଠି ବ୍ୟବହାରରେ ନିର୍ମାଣ ହୋଇଛି 121ଟି ଘର । ତେବେ ଏହି ଘର ନିର୍ମାଣ ଶେଷ ହୋଇସାରିଥିବାରୁ ଏହାର ଚାବି ଏବେ ବନ୍ୟା ପୀଡିତଙ୍କୁ ହସ୍ତାନ୍ତର କରିବାକୁ ଯାଉଛନ୍ତି ମୁଖ୍ୟମନ୍ତ୍ରୀ ବିଜୟନ ।
ଏହି ଘରଗୁଡିକ ବନ୍ୟା ଓ ବାତ୍ୟା ସହ ମୁକାବିଲା କରିବା ଉଦ୍ଦେଶ୍ୟରେ ତିଆରି କରାଯାଇଥିବା ବେଳେ ଏଗୁଡିକୁ ସୁରକ୍ଷିତ ସ୍ଥାନରେ ନିର୍ମାଣ କରାଯାଇଛି । ଆଗକୁ ଏକ ଭବ୍ୟ କାର୍ଯ୍ୟକ୍ରମରେ ବନ୍ୟା ପୀଡିତଙ୍କୁ ସମସ୍ତ ବାସଗୃହର ଚାବି ହସ୍ତାନ୍ତର କରାଯିବ ବୋଲି ସୂଚନା ଦେଇଛନ୍ତି କେରଳ ମୁଖ୍ୟମନ୍ତ୍ରୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
