ପାଟନା: ବିହାରରେ କ୍ଷମତାସୀନ ଜନତା ଦଳ ୟୁନାଇଟେଡକୁ (ଜେଡିୟୁ) ଲାଗିଛି ଜୋରଦାର ଝଟକା । ଦଳୀୟ ମୁଖପାତ୍ର ପଦରୁ ଇସ୍ତଫା ଦେଇଛନ୍ତି ଡ.ଅଜୟ ଆଲୋକ । ଗୁରୁବାର ସେ ଏ ସମ୍ପର୍କରେ ଜଣାଇବା ସହ କହିଥିଲେ ଯେ ଏହି ଦାୟିତ୍ବ ନିର୍ବାହ କରିବା ପାଇଁ ଅକ୍ଷମ ।
ଦଳୀୟ କାର୍ଯ୍ୟାଳୟରେ ନିଜ ଇସ୍ତଫା ଦେବା ସମ୍ପର୍କରେ ମତ ରଖି ଅଜୟ କହିଛନ୍ତି, "ଦଳର ମୁଖପାତ୍ର ପଦରୁ ମୁଁ ଇସ୍ତଫା ପ୍ରଦାନ କରୁଛି । କାରଣ ମୁଁ ଭାବୁଛି ଦଳ ପାଇଁ ମୁଁ ଠିକ କରିନାହିଁ । ଦଳ ପକ୍ଷରୁ ମୋତେ ଅନେକ ସମ୍ମାନ ମିଳିଛି । ସେଥିପାଇଁ ଧନ୍ୟବାଦ । ତେବେ ମୋର ଇସ୍ତଫାକୁ ଗ୍ରହଣ କରାଯାଉ । "
ମୁଖପାତ୍ର ବ୍ୟତୀତ ଦଳର ସାଙ୍ଗଠନିକ ଦାୟିତ୍ବରେ ମଧ୍ୟ ଥିଲେ ଅଜୟ ଆଲୋକ । ତାଙ୍କୁ ବିହାର ଜେଡିୟୁ ରାଜ୍ୟ ଶାଖାର ସାଧାରଣ ସମ୍ପାଦକ ଭାବେ ନିଯୁକ୍ତ କରାଯାଇଥିଲା । ମୁଖପାତ୍ର ପଦରୁ ଇସ୍ତଫା ଦେବା ସମ୍ପର୍କରେ ପ୍ରତିକ୍ରିୟା ରଖି ଟ୍ବିଟରରେ ପ୍ରତିକ୍ରିୟା ରଖି ସେ କହିଥିଲେ ଯେ, ମୁଖପାତ୍ର ଭାବେ ମୁଁ ଦେଉଥିବା ମତାମତ ମୋର ବ୍ୟକ୍ତିଗତ । ଦଳ ସହ ଏହାର କୌଣସି ସମ୍ପର୍କ ନାହିଁ ।
ଅନ୍ୟପଟେ ଦଳ ଏବଂ ଦଳୀୟ ସଭାପତି ତଥା ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଧନ୍ୟବାଦ ଦେଇଛନ୍ତି ଅଜୟ ଆଲୋକ । ବର୍ତ୍ତମାନ ମୁଁ ତାଙ୍କ ପାଇଁ ଅସୁବିଧାର କାରଣ ହେବାକୁ ଚାହିୁନାହିଁ ବୋଲି ନୀତିଶଙ୍କ ସମ୍ପର୍କରେ କହିଛନ୍ତି ଅଜୟ।
ଗତ 11 ତାରିଖ ମଙ୍ଗଳବାର ଦେଶରେ ବଢି ଚାଲିଥିବା ବେଆଇନ ଅନୁପ୍ରବେଶ ପ୍ରସଙ୍ଗରେ ଟ୍ବିଟରରେ ପ୍ରତିକ୍ରିୟା ରଖିଥିଲେ ଅଜୟ । ଏନେଇ ମତ ରଖି କହିଥିଲେ ଯେ ଅବୈଧ ଅନୁପ୍ରବେଶ ପ୍ରସଙ୍ଗରେ ମମତା ବାନାର୍ଜୀଙ୍କୁ ଟାର୍ଗେଟ କରିବା ଠିକ ନୁହେଁ । ଅମିତ ଶାହା ହେଉଛନ୍ତି ଆମର ଗୃହମନ୍ତ୍ରୀ । ଏଥିପାଇଁ ଆମର ବ୍ୟବସ୍ଥାକୁ ବଦଳାଇ ସହ ବେଆଇନ ଅନୁପ୍ରବେଶକୁ ନିୟନ୍ତ୍ରଣ କରିବା ଆହୁରି ଗୁରୁତ୍ବପୂର୍ଣ୍ଣ ।
