ନୂଆଦିଲ୍ଲୀ: ହାଇଦ୍ରାବାଦ ଦୁଷ୍କର୍ମ ଓ ହତ୍ୟା ମାମଲା ପରେ ପୀଡିତାଙ୍କ ନାମକୁ ବ୍ୟବହାର କରୁଥିବା ଗଣମାଧ୍ୟମ ସଂସ୍ଥା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦିଲ୍ଲୀ ହାଇକୋର୍ଟ ନୋଟିସ ଜାରି କରିଛନ୍ତି । ଏକ୍ରମରେ ହାଇକୋର୍ଟ କେନ୍ଦ୍ର ସରକାର, ଦିଲ୍ଲୀ ସରକାର ଓ ଗଣମାଧ୍ୟମ ସଂସ୍ଥା ଗୁଡିକୁ ନୋଟିସ ଜାରି କରିଛନ୍ତି । ଗଣମାଧ୍ୟମରେ ପୀଡିତାଙ୍କ ନାମ ବ୍ୟବହାର ହେଉଥିବା ନେଇ ଯଶପାଲ ଚହଲଙ୍କ ଦ୍ବାରା କରାଯାଇଥିବା ଯାଚିକାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି ।
ପିଟିସନରେ ଦର୍ଶାଯାଇଛି ଯେ, ଗଣମାଧ୍ୟମ ସଂସ୍ଥା ଗୁଡିକ ସୁପ୍ରିମକୋର୍ଟଙ୍କ ଆଧାରିତ ଭାରତୀୟ ପେନାଲ କୋଡର 228(ଏ)ଧାରା ଉଲ୍ଲଂଘନ କରିଛନ୍ତି । ଏହା ସହିତ ପୀଡିତାଙ୍କ ନାମ ବ୍ୟବହାର କରି ନିପୁନ ସାକସେନାଙ୍କ ମାମଲାର ରାୟକୁ ଉଲ୍ଲଂଘନ କରାଯାଇଛି । ସେହିପରି ସୁପ୍ରିମକୋର୍ଟ ମୁଦ୍ରଣ , ବୈଦ୍ୟୁତିକ ଗଣମାଧ୍ୟମ ଓ ସାମାଜିକ ଗଣମାଧ୍ୟମ ଉପରେ ଏକ ନିର୍ଦ୍ଦେଶନାମା ଜାରି କରିଛି । ଯେଉଁଥିରେ ପୀଡିତାଙ୍କ ନାମ ପ୍ରକାଶ କରିବାକୁ ବାରଣ କରାଯାଇଛି । ଯଦି ପୀଡିତାଙ୍କ ମୃତ୍ୟୁ ହୁଏ, ତେବେ ମଧ୍ୟ ତାଙ୍କ ପରିବାର ଓ କୋର୍ଟଙ୍କ ଅନୁମତି ବିନା ତାଙ୍କ ନାମ ପ୍ରକାଶ କରାଯାଇପାରିବ ନାହିଁ ।
ସୁପ୍ରିମକୋର୍ଟ ଭାରତୀୟ ପିଙ୍ଗଳକୋଡ ଧାରା 376, 376(ଏ), 376(ବି), 376(ସି), 376(ଡି), 376(ଡି ଏ) ଓ 376(ଇ) ସହ ପୋକ୍ସୋ ଧାରା ଅଧୀନରେ ରୁଜୁ ହୋଇଥିବା ମାମଲାକୁ ଲୋକଲୋଚନକୁ ଅଣାଯାଇପାରିବ ନାହିଁ । ଏହାପାଇଁ ପୋଲିସକୁ ମାମଲାରେ ତଦନ୍ତ ବେଳେ ସମସ୍ତ ତଥ୍ୟ ଓ କାଗଜପତ୍ରକୁ ଏକ ସିଲ କଭର ମଧ୍ୟରେ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରିଛନ୍ତି ।
