ନୂଆଦିଲ୍ଲୀ: ପୁଣି ପ୍ରଦୂଷିତ ହେଲା ଦିଲ୍ଲୀ ବାୟୁ । ସୋମବାର ସକାଳେ ଦିଲ୍ଲୀ ସମେତ ଆଖପାଖ ଅଞ୍ଚଳର ବାୟୁ ଗୁଣବତ୍ତା ଖରାପ ଶ୍ରେଣୀର ରେକର୍ଡ କରାଯାଇଛି । ପୃଥିବୀ ବିଜ୍ଞାନ ମନ୍ତ୍ରଣାଳୟ (SAFAR) ଅନୁଯାୟୀ, ପବନର ଦିଗ ପରିବର୍ତ୍ତନ ହେତୁ ଆଗାମୀ ଦିନରେ ଦିଲ୍ଲୀର ବାୟୁ ଗୁଣବତ୍ତା ସୂଚକ( ଏକ୍ୟୁଆଇ)ରେ ସାମାନ୍ୟ ଉନ୍ନତି ଆସିବାର ସମ୍ଭାବନା ରହିଛି।
ସୋମବାର ସକାଳ 10ଟା ସୁଦ୍ଧା ସହରର ଏକ୍ୟୁଆଇ 240 ରେକର୍ଡ କରାଯାଇଥିଲା । ସେହିପରି ଜାହାଙ୍ଗୀରପୁରୀର ଏକ୍ୟୁଆଇ 301 ଏବଂ ବିବେକ ବିହାରର ଏକ୍ୟୁଆଇ 316 ରେକର୍ଡ କରାଯାଇଥିଲା । ଯାହା ଖରାପ ଶ୍ରେଣ୍ରୀର ବିବେଚନା କରାଯାଏ । ସେହିପରି ଗତ ରବିବାର ମଧ୍ୟ ଦିଲ୍ଲୀର ଏକ୍ୟୁଆଇ 216 ରେକର୍ଡ କରାଯାଇଥିଲା ।
ସୂଚନାଯୋଗ୍ୟ ଯେ, ଏକ୍ୟୁଆଇ 0-50 ମଧ୍ୟରେ ରହିଲେ ଏହାକୁ 'ଭଲ' ବୋଲି ବିଚାର କରାଯାଏ । ସେହିପରି 51-100 ମଧ୍ୟରେ ରହିଲେ ସନ୍ତୋଷଜନକ, 100-200 ମଧ୍ୟରେ ରହିଲେ ମଧ୍ୟମ, 201-300 ମଧ୍ୟରେ ରହିଲେ ଖରାପ, 301-400 ମଧ୍ୟରେ ରହିଲେ ଅତ୍ୟନ୍ତ ଖରାପ ଏବଂ 401-500 ମଧ୍ୟରେ ରହିଲେ ଗମ୍ଭୀର ବୋଲି ବିଚାର କରାଯାଏ ।
