ନୂଆଦିଲ୍ଲୀ: ଚୀନ୍ କେବଳ ଭାରତ ପାଇଁ ବିପଦ ନୁହେଁ । ଏହା ସାରା ବିଶ୍ବ ଲାଗି ସମସ୍ୟା ସୃଷ୍ଟି କରିଛି । ବ୍ରିଟେନ ଚୀନ ଦ୍ବାରା ସୃଷ୍ଟି ସମସ୍ତ ଚ୍ୟାଲେଞ୍ଜ ସମ୍ପର୍କରେ ଅବଗତ ଅଛି । ଭାରତ ସମେତ ବିଶ୍ବ ମଧ୍ୟ ଏହାକୁ ସାମନା କରୁଛି ବୋଲି ଭାରତରେ ଥିବା ବ୍ରିଟେନ ରାଷ୍ଟ୍ରଦୂତ ସାର ଫିଲିପ୍ ବାର୍ଟୋନ କହିଛନ୍ତି ।
ଚୀନର ସମସ୍ତ ଚ୍ୟାଲେଞ୍ଜ ସମ୍ପର୍କରେ ବ୍ରିଟେନ ପାଖରେ ସ୍ପଷ୍ଟ ଖବର ରହିଛି । ହଂକଂ ପ୍ରସଙ୍ଗ ଯୁଗ୍ମ ଘୋଷଣାନାମା ଅନୁସାରେ ଥିବା ଚୁକ୍ତିର ଏକ ଗୁରୁତର ଉଲ୍ଲଙ୍ଘନ । ସେହିପରି ଦକ୍ଷିଣ ଚୀନ ସାଗର ପ୍ରସଙ୍ଗରେ ଆମେ ସ୍ପଷ୍ଟ ବାର୍ତ୍ତା ଦେଇସାରିଛୁ । ଚୀନ ବିଭିନ୍ନ ବିଷୟରେ ଅଯଥା ଚ୍ୟାଲେଞ୍ଜ ସୃଷ୍ଟି କରୁଛି । ତଥାପି ଆମେ ଏହା ସହ କାମ କରିବାକୁ ଇଚ୍ଛୁକ ବୋଲି ଫିଲିପ୍ ପ୍ରକାଶ କରିଛନ୍ତି ।
ହଂକଂରେ ଚୀନର ନୂଆ ଜାତୀୟ ସୁରକ୍ଷା ବିଲ ନେଇ ବିବାଦ ସୃଷ୍ଟି ହୋଇଛି । ଏହାକୁ ହଂକଂବାସୀ ବିରୋଧ କରୁଥିବାବେଳେ ସାରା ବିଶ୍ବ ସେମାନଙ୍କୁ ସମର୍ଥନ ଦେଉଛି । ଏହି ପ୍ରସଙ୍ଗରେ ଚଳିତ ମାସରେ ବ୍ରିଟିଶ ସରକାର କହିଥିଲେ ଯେ ହଂକଂବାସୀଙ୍କୁ ୟୁକେରେ ବାସ କରିବା ସହ ନାଗରିକତ୍ବ ଗ୍ରହଣ କରିବା ପାଇଁ ଏହା ଅଫର ପ୍ରଦାନ କରୁଛି । ଯାହାକୁ ନେଇ ଚୀନ୍ କ୍ଷୁବ୍ଧ ହେବା ସହ ଆଭ୍ୟନ୍ତରୀଣ ବ୍ୟାପାରରେ ମୁଣ୍ଡ ନପୁରାଇବାକୁ ବ୍ରିଟେନକୁ ଚେତାବନୀ ଦେଇଥିଲା ।
