ନୂଆଦିଲ୍ଲୀ: ନିକଟରେ ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲିଙ୍କ ବିବାଦୀୟ ମନ୍ତବ୍ୟ ପରେ ଉତ୍ତେଜନା ଦେଖାଦେଇଛି। କେ.ପି ଶର୍ମା ପ୍ରଭୁ ରାମଙ୍କ ଜନ୍ମସ୍ଥାନ ବିଷୟରେ ବିବାଦୀୟ ମନ୍ତବ୍ୟ ଦେଇଛନ୍ତି । ଯେଉଁଥିପାଇଁ ସେ ସୋସିଆଲ ମିଡିଆରେ ଅନେକ ସମାଲୋଚନାର ସମ୍ମୁଖୀନ ହୋଇଛନ୍ତି । ନିକଟରେ ବାବ୍ରୀ ମସଜିଦ ମାମଲାରେ ମୁସଲିମ ପକ୍ଷକାର ଇକବାଲ ଅନସାରୀଙ୍କ ଏକ ଭିଡିଓ ସାମ୍ନାକୁ ଆସିଛି। ଏହି ଭିଡିଓରେ ଇକବାଲ ଅନସାରୀ ନେପାଳର ବିନାଶ ବିଷୟରେ କହିଛନ୍ତି।
ନେପାଳ ପ୍ରଧାନମନ୍ତ୍ରୀଙ୍କ ବିବାଦୀୟ ମନ୍ତବ୍ୟ ପରେ ଇକବାଲ ଅନସାରୀ କହିଛନ୍ତି ଯେ, 'ନେପାଳ ପ୍ରଧାନମନ୍ତ୍ରୀଙ୍କର ଧର୍ମ ବିଷୟରେ କୌଣସି ଜ୍ଞାନ ନାହିଁ। ଅଯୋଧ୍ୟା ହେଉଛି ଧର୍ମର ନଗରୀ। ଏଠାରେ ସବୁ ଧର୍ମର ଭଗବାନ ବାସ କରନ୍ତି। ଅଯୋଧ୍ୟାରୁ 5 କିମି ଦୂରତା ମଧ୍ୟରେ ମନ୍ଦିର, ମସଜିଦ, ଚର୍ଚ୍ଚ ଓ ଗୁରୁଦ୍ୱାର ଆଦି ରହିଛି'।
ବାବ୍ରୀ ମସଜିଦ ମାମଲାରେ ମୁସଲିମ ପକ୍ଷକାର ଇକବାଲ ତାଙ୍କ ଭିଡିଓରେ କହିଛନ୍ତି ଯେ, 'ଯଦି ନେପାଳ ପ୍ରଧାନମନ୍ତ୍ରୀ ଓଲି କେବେ ଅଯୋଧ୍ୟାକୁ ଆସିନାହାଁନ୍ତି, ତେବେ ଏହାକୁ ନ ଦେଖି ଏପରି ମନ୍ତବ୍ୟ ଦେବା ଅତ୍ୟନ୍ତ ଭୁଲ ଅଟେ। ସେ କହିଛନ୍ତି ଯେ କେ.ପି ଶର୍ମା ପ୍ରଥମେ ଅଯୋଧ୍ୟା ବିଷୟରେ ଜାଣିବା ଉଚିତ। ଭଗବାନ ଶ୍ରୀରାମଙ୍କ ବିଷୟରେ ଜାଣନ୍ତୁ ଏବଂ ତା’ପରେ ମନ୍ତବ୍ୟ ଦିଅନ୍ତୁ'।
ସେ ଆହୁରି କହିଛନ୍ତି ଯେ, ‘ଅଯୋଧ୍ୟା ବିଷୟରେ କିଛି ବିବାଦ ମନ୍ତବ୍ୟ ଦେବାର ପରିଣାମ ଅତି ଭୟଙ୍କର ହୋଇପାରେ। ଅଯୋଧ୍ୟାରେ ପ୍ରଭୁ ରାମଙ୍କ ସହ ହନୁମାନ ବିରାଜିତ । ଯଦି ହନୁମାନ କ୍ରୋଧିତ ହୁଅନ୍ତି, ତେବେ ପତ୍ତା ମିଳିବନି ଯେ, କେଉଁଆଡେ ଗଲା ନେପାଳ । ତାଙ୍କ ଗଦାରେ ହିଁ ଭଷ୍ମ ହୋଇଯିବ ନେପାଳ ।’
