ଗୌହାଟି: ଆସାମର ଉଦଲଗୁରୀ ଜିଲ୍ଲାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଅନ୍ଧବିଶ୍ବାସର ଜାଲରେ ପଡି ଜଣେ ବିଜ୍ଞାନ ଶିକ୍ଷକ ପରିବାର ସହ ମିଶି ନିଜ 3 ବର୍ଷର ପୁତୁରାକୁ ବଳି ଦେଇଥିବା ଅଭିଯୋଗ ହୋଇଛି । ତେବେ ଆଶ୍ଟର୍ଯ୍ୟର କଥା ହେଉଛି ଏହି ଅମାନବୀୟ କାଣ୍ଡରେ ଶିଶୁର ମା-ବାପା ମଧ୍ୟ ସାମିଲ ଥିଲେ । ସେମାନେ ନିଜ ଆଧ୍ୟାତ୍ମିକ ଉଦେଶ୍ୟକୁ ପୂରଣ କରିବା ପାଇଁ ସ୍ବ-ଇଚ୍ଛାରେ ନିଜ ପୁଅର ବଳି ଦେବାକୁ ରାଜି ହୋଇଯାଇଥିଲେ ।
ସୂଚନା ଅନୁଯାୟୀ, ବିଜ୍ଞାନ ଶିକ୍ଷକ ଯାଦବ ସହରିଆଙ୍କର ଝିଅ ଆତ୍ମହତ୍ୟା କରିବା ପରେ ସେମାନଙ୍କ ସ୍ଥିତି ବିଗିଡିବାରେ ଲାଗିଥିଲା । ତେଣୁ ଏହି ସମସ୍ୟାରୁ ମୁକ୍ତି ପାଇବା ପାଇଁ ମାନବ ଶିଶୁ ବଳି ଦେବାକୁ କେହି ଜଣେ ସେମାନଙ୍କୁ ଉପଦେଶ ଦେଇଥିଲା । ଏହା ପରେ ଯାଦବ ନିଜ ପତ୍ନୀ, ଶାଳି, ସଡୁ ଏବଂ ପୁଅ ସହ ମିଶି ଶିଶୁଟିକୁ ବଳି ଦେଉଥିଲେ । ସେମାନେ ଉଲଗ୍ନ ହୋଇ ଏହି କାଣ୍ଡ କରୁଥିବା ବେଳେ ଏହି ଘଟଣା ସମ୍ବନ୍ଧରେ ତାଙ୍କ ପଡୋଶୀ ଜାଣିବାକୁ ପାଇଥିଲେ । ସେମାନେ ଶିଶୁଟିକୁ ଉଦ୍ଧାର କରିବାକୁ ଯିବାରୁ ଯାଦବ ସହରିଆ ଏବଂ ତାଙ୍କ ପରିବାର ସେମାନଙ୍କ ଉପରକୁ ଆକ୍ରମଣ କରିଥିଲେ । ତେବେ ଉପାୟହୀନ ହୋଇ ସେମାନେ ପୋଲିସ ଏବଂ ସିଆରପିଏଫକୁ ଫୋନ୍ କରିଥିଲେ । ପୋଲିସ ଏବଂ ସିଆରପିଏଫ ଘଟଣା ସ୍ଥଳରେ ପହଞ୍ଚି ଶିଶୁଟିକୁ ଉଦ୍ଧାର କରିବା ସହ ସେମାନଙ୍କୁ ଗିରଫ କରିଥିଲେ ।
ପରିବାରର ସମସ୍ତେ ଶିକ୍ଷିତ ହେବା ସହ ସେମାନଙ୍କ ମଧ୍ୟରୁ ଜଣେ ମେଡିକାଲ ନର୍ସ ଭାବେ କାର୍ଯ୍ୟରତ ଥିଲେ । ତେବେ ସଭ୍ୟସମାଜରେ ଶିକ୍ଷିତ ଏବଂ ବିଜ୍ଞାନର ଜ୍ଞାନ ରଖୁଥିବା ପରିବାରର ଏଭଳି ଜଘନ୍ୟ ଏବଂ ଅମାନବୀୟ କାଣ୍ଡ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
