ଲକ୍ଷ୍ନୌ: ମହିଳା ଯାତ୍ରୀଙ୍କୁ ସଂଘବଦ୍ଧ ଆକ୍ରମଣ କଲେ ମହିଳା ଟିଟିଇ । କଲର ଧରି ମାଡ ମାରିବା ସହ ଘୋଷାଡି ଘୋଷାଡି ନେଇଗଲେ । କାରଣ ସମ୍ପର୍କରେ ଜଣାପଡିଲା, ସମ୍ପୃକ୍ତ ମହିଳା ଯାତ୍ରୀଙ୍କ ନିକଟରେ ଯାତ୍ରା କରିବା ପାଇଁ ଉଦ୍ଦିଷ୍ଟ ଟିକେଟ ନଥିଲା । ହେଲେ ଫାଇନ କାଟିବା ବଦଳରେ ମହିଳା ଟିକେଟ ନିରୀକ୍ଷକ ଆଇନକୁ ହାତକୁ ନେଇ ମହିଳାଙ୍କୁ ମାଡ ମାରିଥିବାର ଏକ ଘଟଣା ଉତ୍ତର ପ୍ରଦେଶ ବରେଲୀ ଜଙ୍କସନରେ ଦେଖିବାକୁ ମିଳିଛି । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଭିଡିଓ ଭାଇରାଲ ହେବା ପରେ DRM ରେଖା ଯାଦବ ତିନିଜଣ ମହିଳା TTE ଙ୍କୁ ଦାୟିତ୍ବରୁ ଅପସାରଣ କରିବା ସହ ଘଟଣା ସମ୍ପର୍କରେ ସ୍ପଷ୍ଟୀକରଣ ମାଗିଥିବା ଜଣାପଡିଛି ।
ସୂଚନା ଅନୁସାରେ, ପୂର୍ବୋତ୍ତର ରେଳବାଇର ଲାଲକୂଆଁରୁ ଯାତ୍ରା ଆରମ୍ଭ କରିଥିବା ଏକ ଏକ୍ସପ୍ରେସ ଟ୍ରେନଟି ବରେଲୀ ଜଙ୍କସନରେ ପହଞ୍ଚିବା ପରେ ଏହି 3 ମହିଳା ଟିଟିଇଙ୍କ ଟିମ୍ ଟ୍ରେନରେ ପ୍ରବେଶ କରି ଟିକେଟ ଚେକିଂ ଆରମ୍ଭ କରିଥିଲା । ତେବେ ଏଥିରେ ଯାତ୍ରା କରୁଥିବା ଜଣେ ଯୁବତୀଙ୍କ ନିକଟରେ ଟିକେଟ ନଥିଲା । ଯାହା ଫଳରେ ତାଙ୍କୁ ଟିଟିଇ ଅଟକ ରଖିଥିଲେ । ହେଲେ ଫାଇନ କାଟିବା ବଦଳରେ ଏହି ମହିଳା ଟିଟିଇମାନେ ଯୁବତୀଙ୍କୁ ମାଡ ମାରିଥିଲେ । ଏପରିକି ବରେଲୀ ଜଙ୍କସନରେ ସମ୍ପୃକ୍ତ ଯୁବତୀଙ୍କୁ ଟ୍ରେନରୁ ଓହ୍ଲାଇ ଦିଆଯାଇଥିଲା । ପ୍ଲାଟଫର୍ମରେ ଯୁବତୀଙ୍କୁ ଛିଡା କରି ମହିଳା ଟିଟିଇମାନେ ସଙ୍ଘବଦ୍ଧ ମାଡ ମାରିଥିଲେ । କଲର ଧରି ଘୋଷାଡି ଘୋଷାଡି ନେଇଯାଇଥିଲେ । ଯାହାକୁ ପ୍ଲାଟଫର୍ମର ଅପରପାର୍ଶ୍ବରେ ଥିବା ଯାତ୍ରୀମାନେ ନିଜ ମୋବାଇଲ ଫୋନରେ ରେକର୍ଡ କରିଥିଲେ । ଏବେ ଭିଡିଓ ଭାଇରାଲ ହେବା ପରେ ରେଳବାଇ କାର୍ଯ୍ୟାନୁଷ୍ଠାନ ମୋଡକୁ ଆସିଛି ।
ଏହା ମଧ୍ୟ ପଢନ୍ତୁ:- ସୋନିଆଙ୍କୁ ତେଲେଙ୍ଗାନା କଂଗ୍ରେସର ଅନୁରୋଧ: ଇନ୍ଦିରା ଲଢିଥିଲେ, ଆପଣ ବି ଏଠାରୁ ଲଢନ୍ତୁ
ଉତ୍ତର-ପୂର୍ବାଞ୍ଚଳ ରେଳ ବିଭାଗର DRM ରେଖା ଯାଦବ କହିଛନ୍ତି ଯେ କୌଣସି ଯାତ୍ରୀଙ୍କ ସହ ରେଳ କର୍ମଚାରୀଙ୍କ ଏହି ପ୍ରକାର ଆଚରଣକୁ ଆଦୌ ବରଦାସ୍ତ କରାଯିବ ନାହିଁ । ତଦନ୍ତ ନିର୍ଦ୍ଦେଶ ମିଳିସାରିଛି । ସମ୍ପୃକ୍ତ ଟିଟିଇମାନଙ୍କୁ ମଧ୍ୟ ଅସ୍ଥାୟୀ ଭାବେ କାର୍ଯ୍ୟରୁ ଅପସାରଣ କରାଯାଇଛି । ତଦନ୍ତ ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସୋସିଆଲ ମିଡିଆରେ ୟୁଜର୍ସମାନେ ଏହି ଭିଡିଓକୁ ପୋଷ୍ଟ କରି ରେଳମନ୍ତ୍ରଣାଳୟକୁ ସମାଲୋଚନା କରିବା ସକ କଡା କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
