ହାଇଦ୍ରାବାଦ: ସମୟ ସହିତ ସାମ୍ନାକୁ ଆସୁଛି ନୂଆ ନୂଆ ଟେକ୍ନୋଲୋଜି । ପୂର୍ବରୁ ଫିଙ୍ଗର ପ୍ରିଣ୍ଚ ଏବଂ ଫେସ ଅନଲକ ସିଷ୍ଟମ ଦ୍ବାରା ଫୋନକୁ ଅନଲକ୍ କରାଯାଇପାରୁଥିଲା । ସୁରକ୍ଷା ଦୃଷ୍ଟିରୁ ସମସ୍ତ ସ୍ମାର୍ଟଫୋନରେ ଏହି ଫିଚର ରଖାଯାଇଥିଲା । ସେତେବେଳେ ଦାବି କରାଯାଇଥିଲା ଯେ, ଏହି ଫିଚର ଦ୍ବାରା ଆଉ ଫୋନର ଡାଟାକୁ ଚୋରି କରାଯାଇ ପାରିବ ନାହିଁ କିମ୍ବା ପ୍ରାଇଭେସିରେ କୌଣସି ତ୍ରୁଟି ଦେଖାଯିବନି । କିନ୍ତୁ ଏଥିରେ ବ୍ୟତିକ୍ରମ ଦେଖାଯାଇଥିଲା । ଫଟୋ ଦେଖାଇ କିମ୍ବା ଶୋଇଥିବା ଅବସ୍ଥାରେ ଆଙ୍ଗୁଠି ବ୍ୟବହାର କରି ଫୋନକୁ ଅନଲକ କରିବାରେ ସକ୍ଷମ ହେଉଥିଲେ । ଏବେ ସିକ୍ୟୁରିଟି ସିଷ୍ଟମକୁ ଆହୁରି ଶକ୍ତିଶାଳୀ କରିବା ପାଇଁ ଫୋନରେ ଆଉ ଏକ ଫିଚର ଆସିବାକୁ ଯାଉଛି । ଏଣିକି ନିଶ୍ବାସ ଦ୍ବାରା ଖୋଲିବ ବା ଅନଲକ୍ ହେବ ସ୍ମାର୍ଟଫୋନ । ଏନେଇ ଦାବି କରିଛନ୍ତି ଚେନ୍ନାଇ ଇଣ୍ଡିଆନ ଇନିଷ୍ଟିଚ୍ୟୁଟ ଅଫ ଟେକ୍ନୋଲୋଜିର ମହେଶ ପଞ୍ଚାଗନୁଲା ଏବଂ ତାଙ୍କ ଟିମ୍ । ଗ୍ୟାଜେଟ ଗୁଡିକର ନିରାପତ୍ତାକୁ ଦୃଷ୍ଟିରେ ରଖି ବୈଜ୍ଞାନିକମାନେ ବ୍ରିଥ ପ୍ରିଣ୍ଟ ଟେକ୍ନୋଲୋଜି(Breath Print Technology) ଉପରେ କାର୍ଯ୍ୟ ଜାରି ରଖିଛନ୍ତି ।
ଟିମ୍ର କହିବା ଅନୁସାରେ, ଏହି ପ୍ରୟୋଗ ଏୟାର ପ୍ରେସର ସେନ୍ସରରୁ ସଂଗୃହୀତ ଡାଟାକୁ ନେଇ ପରୀକ୍ଷଣ କରାଯାଇଛି । ଏହି ଡାଟାର ସାହାଯ୍ୟରେ ଏକ ଆର୍ଟିଫିସିଆଲ ମଡେଲ ତିଆରି କରିବା ଲକ୍ଷ୍ୟ ରହିଥିଲା । ଅନୁସନ୍ଧାନକାରୀ ଟିମର କହିବା ଅନୁସାରେ, ଏହି ଏଆଇ ମଡେଲ ଯଦି ଥରେ କୌଣସି ବ୍ୟକ୍ତିର ନିଶ୍ବାସକୁ ଆନାଲାଇଜ କରିଥାଏ, ତା'ହେଲେ 97 ପ୍ରତିଶତ ସଠିକତା ସହିତ ଭେରିଫାଇ କରିଥାଏ । ଯେଉଁ ବ୍ୟକ୍ତିର ନିଶ୍ବାସ ସହ ଥରେ ଆନାଲାଇଜ ହୋଇଥିବ, ପରବର୍ତ୍ତୀ ମୁହୂର୍ତ୍ତରେ ମଧ୍ୟ ଉକ୍ତ ବ୍ୟକ୍ତିଙ୍କ ନିଶ୍ବାସ ଦ୍ବାରା ହିଁ ଆନାଲାଇଜ ହୋଇପାରିବ ।
ଯେତେବେଳେ ଜଣେ ବ୍ୟକ୍ତିର ନାକ, କାନ, ଗଳା ଦ୍ବାରା ନିଶ୍ବାସ ଭିତରକୁ ପ୍ରବେଶ କରିବା ପରେ ଯେଉଁ ପ୍ରକାର ଟର୍ବ୍ୟୁଲେନ୍ସ ସୃଷ୍ଟି ହୋଇଥାଏ, ଏହି ଏଆଇ ମଡେଲ ଉକ୍ତ ଟର୍ବୁଲେନ୍ସ ଦ୍ବାରା ବ୍ୟକ୍ତିକୁ ଚିହ୍ନଟ କରିବାରେ ସାହାଯ୍ୟ କରିବ । କାରଣ ସମସ୍ତ ବ୍ୟକ୍ତିର ନିଶ୍ବାସ ନେବା ଦ୍ବାରା ଟର୍ବ୍ୟୁଲେନ୍, ଅଲଗା ଅଲଗା ହୋଇଥାଏ । ଫଳରେ ଫୋନ ମାଲିକକୁ ଚିହ୍ନଟ କରିବାରେ ତ୍ରୁଟି କରିବ ନାହିଁ ଏହି ଏଆଇ ମଡେଲ । ଆଗାମୀ ଦିନରେ ଭାରତ ସହିତ ସମଗ୍ର ବିଶ୍ବର ଲୋକେ ଏଣିକି ନିଶ୍ବାସ ଦ୍ବାରା ଅନଲକ୍ କରିବେ ସ୍ମାର୍ଟଫୋନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
