ଭୁବନେଶ୍ବର: ବହୁଚର୍ଚ୍ଚିତ ରୁଚିକା ମହାନ୍ତି ମୃତ୍ୟୁ ଘଟଣାକୁ ନେଇ ଗର୍ଜିଲା ଯୁବ କଂଗ୍ରେସ । କଂଗ୍ରେସ ଭବନରେ ଆୟୋଜିତ ସାମ୍ବାଦିକ ସମିଳନୀରେ ଯୁବ କଂଗ୍ରେସର ସାଧାରଣ ସାମ୍ବାଦିକ ସୁଦିପ ସାମଲ ରାଜ୍ୟ ସରକାରକୁ ଟାର୍ଗେଟ କରିଛନ୍ତି । ରୁଚିକା ମହାନ୍ତି ମୃତ୍ୟୁର ସତ୍ୟାସତ୍ୟ ଏପର୍ଯ୍ୟନ୍ତ ଜନସାଧାରଣଙ୍କ ସାମ୍ନାକୁ ଆସିପାରିଲା ନାହିଁ । ଘଟଣାର ତଦନ୍ତ ବାଟବଣା ହୋଇଥିବା ସେ ଅଭିଯୋଗ କରିଛନ୍ତି । ୨୪ ଘଣ୍ଟା ମଧ୍ୟରେ ପୋଲିସ ପ୍ରଶାସନ ଯଦି ରୁଚିକା ମହାନ୍ତିଙ୍କ ମୃତ୍ୟୁ ଘଟଣାର ତଥ୍ୟ ପ୍ରକାଶ ନକରେ, ତେବେ ଯୁବ କଂଗ୍ରେସ ପୋଲିସ ମହାନିର୍ଦ୍ଦେଶକ ଏବଂ କମିଶନରଙ୍କ ବାସଭବନ ଘେରାଓ କରିବାକୁ ଚେତାବନୀ ଦେଇଛି । କାହା ଚାପରେ ପୋଲିସ ଚୁପ ହୋଇ ବସିଛି ବୋଲି ପ୍ରଶ୍ନ କରିଛି କଂଗ୍ରେସ ।
ଅନ୍ୟପଟେ କିଛିଦିନ ତଳେ ଯୁବ କଂଗ୍ରେସ ଏକ ଭାଇରଲ ଅଡିଓ ପର୍ଦ୍ଦାଫାଶ କରିଥିଲା । ଏହି ଅଡିଓରୁ ରୁଚିକା ମହାନ୍ତି ମୃତ୍ୟୁରେ ବିଧାୟକ ଜଡ଼ିତ ବୋଲି ପ୍ରମାଣିତ ହେଉଥିବା କଂଗ୍ରେସ କହିଛି । ତେଣୁ ଏହି ଅଡିଓ କାହାର ତାହା ମଧ୍ୟ ତଦନ୍ତ ପରିସରକୁ ଆଣାଯାଉ ବୋଲି ଦାବି କରିଛି ଯୁବ କଂଗ୍ରେସ । ଏହା ସହିତ ରୁଚିକାଙ୍କ ମୋବାଇଲ ଯାଞ୍ଚ ପାଇଁ ସିଙ୍ଗାପୁର ଯାଇଥିଲା । ଯାହା ଆଜି ପର୍ଯ୍ୟନ୍ତ ଆସିପାରିଲା ନାହିଁ ବୋଲି କହିଛନ୍ତି ସୁଦିପ ସାମଲ । ଯାହା ଫଳରେ ବିଜେବି ଛାତ୍ରୀ ରୁଚିକାଙ୍କ ମୃତ୍ୟୁର ରହସ୍ୟ କେବଳ ରହସ୍ୟର ରହିଯାଇଛି ବୋଲି ସେ କହିଛନ୍ତି ।
ସେ କହିଛନ୍ତି, "ରୁଚିକା ମହାନ୍ତି ମୃତ୍ୟୁର ସତ୍ୟାସତ୍ୟ ଏପର୍ଯ୍ୟନ୍ତ ଜନସାଧାରଣଙ୍କ ସାମ୍ନାକୁ ଆସିପାରିଲା ନାହିଁ । ଘଟଣାର ତଦନ୍ତ ବାଟବଣା ହୋଇଛି । ରାଜ୍ୟ ସରକାର ତାଙ୍କ ପରିବାରକୁ ନ୍ୟାୟ ଦେଇପାରିଲେ ନାହିଁ । ଆମେ ଦୁଇ ଦିନ ତଳେ ଏକ ଅଡିଓ କଲ ମଧ୍ୟ ଡିସିପିଙ୍କୁ ଦେଇଥିଲୁ । ଆଗାମୀ ୨୪ ଘଣ୍ଟା ମଧ୍ୟରେ ଏହି ବହୁ ଚର୍ଚ୍ଚିତ ମାମଲାର ତଦନ୍ତ ରିପୋର୍ଟ ସର୍ବଜନୀନ କରୁ ପୋଲିସ । ଏହା ସହିତ ସେହି ଅଡିଓ କଲ୍ର ମଧ୍ୟ ଯାଞ୍ଚ ହେଉ । ନହେଲେ ଆମେ ପୋଲିସ ମହାନିର୍ଦ୍ଦେଶକ ଏବଂ କମିଶନରଙ୍କ ବାସଭବନ ଘେରାଓ କରିବା ସହିତ ଆଇନକୁ ହାତକୁ ନେବାକୁ ବାଧ୍ୟ ହେବୁ ।"
ପ୍ରକାଶ ଥାଉ, ବିଜେବି ଯୁକ୍ତ ତିନି ଛାତ୍ରୀ ରୁଚିକା ମହାନ୍ତିଙ୍କ ମୃତଦେହ ତାଙ୍କ ହଷ୍ଟେଲ ରୁମରୁ ଉଦ୍ଧାର ହୋଇଥିଲା । ହତ୍ୟା ଅଭିଯୋଗ ଆଣି ଅନେକ ଦିନ ଧରି କଲେଜ ଗେଟ ସମ୍ମୁଖରେ ରୁଚିକାଙ୍କ ପରିବାର ଧାରଣାରେ ବସିରହିଥିଲେ । ହେଲେ ପୋଲିସ ଘଟଣାକୁ ଚପାଇ ଦେବାପାଇଁ ପ୍ରାୟାସ କରୁଥିବା ଅଭିଯୋଗ ହୋଇଥିଲା । ରୁଚିକାଙ୍କ ପରିବାର ଲୋକଙ୍କୁ ମଧ୍ୟ ପୋଲିସ ଉଠାଇ ନେଇଥିଲା । ପରବର୍ତ୍ତୀ ମୁହୂର୍ତ୍ତରେ ଅନେକ ସମୟରେ ରୂଚିକାଙ୍କୁ ରାଗିଂ କରାଯାଉଥିବା ନେଇ ସନ୍ଦେହ ପ୍ରକାଶ ପାଇଥିଲା । ହେଲେ ଆଜି ପର୍ଯ୍ୟନ୍ତ ମଧ୍ୟ ରୁଚିକାଙ୍କ କୌଣସି ତଦନ୍ତ ରିପୋର୍ଟ ଆସିପାରିଲା ନାହିଁ । କେବଳ ରୁଚିକା ନୁହଁନ୍ତି, ରାଜ୍ୟରେ ଏପରି ଅନେକ ଛାତ୍ରୀଙ୍କୁ ନ୍ୟାୟ ମିଳିବାରେ ଦୀର୍ଘ ବର୍ଷ ଲାଗିଯାଇଛି, ଅନେକଙ୍କୁ ଏବେ ବି ନ୍ୟାୟ ମିଳିପାରିନାହିଁ ବୋଲି କଂଗ୍ରେସ ଅଭିଯୋଗ କରିଛି ।
ଇଟିଭି ଭାରତ, ଭୁବନେଶ୍ବର
