ସମ୍ବଲପୁର: ମାନେଶ୍ଵର ହାଟପଦାରେ ବୃଦ୍ଧା ମାଆ ଓ ଝିଅକୁ ଘରେ ନିଆଁ ଲଗାଇ ହତ୍ୟା ଘଟଣାର ଟ୍ବିଷ୍ଟ । ବୃଦ୍ଧାଙ୍କ ପୁଅ ଓ ନାତିଙ୍କୁ ଗିରଫ କରିବା ପରେ ଘଟଣା କ୍ରାଇମ ସିନ ରିକ୍ରିଏସନ କଲା ପୋଲିସ । ସଦର ଥାନା ପୋଲିସ ଘଟଣାସ୍ଥଳକୁ ଦୁଇ ଅଭିଯୁକ୍ତଙ୍କୁ ନେଇ କ୍ରାଇମ ସିନ ରିକ୍ରିଏସନ କରିଛି । ନିଆଁ ଲଗାଇବା ପାଇଁ ବ୍ୟବହାର ହୋଇଥିବା ୨ଟି ପେଟ୍ରୋଲ ବୋତଲକୁ ଲୁଚେଇ ଥିବା ସ୍ଥାନରୁ ବାହାର କରିଥିଲେ ଅଭିଯୁକ୍ତ । ଏହି ପେଟ୍ରୋଲକୁ ସେମାନେ ମାନେଶ୍ଵର ପେଟ୍ରୋଲ ପମ୍ପରୁ 200 ଟଙ୍କା ଦେଇ କିଣିଥିଲେ ।
ସମ୍ବଲପୁର SDPO ତୁଫାନ ବାଗଙ୍କ ସୂଚନା ଅନୁସାରେ, '' ଜଗନ୍ନାଥ ଓ ତାଙ୍କ ପୁଅ ସଙ୍କେତ ପ୍ରଥମେ ନିଜ ଘରର ପ୍ରଥମ ମହଲାରେ ରହୁଥିବା ସଇରେନ୍ଦ୍ରିଙ୍କ ମୁହଁରେ କପଡା ଦେଇ ଶ୍ୱାସ ରୁଦ୍ଧ କରି ହତ୍ୟା କରିଥିଲେ । ପରେ ତାଙ୍କ ମୃତଦେହକୁ ରୋଷେଇ ଘରକୁ ନେଇ ଯାଇଥିଲେ । ଏହା ପରେ ପାଖ କୋଠରୀରେ ଶଯ୍ୟାଶାୟୀ ଥିବା ସ୍ନେହଲତା ଦୀକ୍ଷିତଙ୍କୁ ମଧ୍ୟ କପଡା ସାହାଯ୍ୟରେ ଶ୍ୱାସରୁଦ୍ଧ କରି ହତ୍ୟା କରିଥିଲେ ବାପ ପୁଅ । ପରେ ଘଟଣାକୁ ଦୁର୍ଘଟଣାର ରୂପ ଦେବା ପାଇଁ ଗ୍ୟାସ ଚୁଲାରେ ନିଆଁ ଲଗେଇ କୋଠରୀର ମୁଖ୍ୟ ଦ୍ୱାରାର କବାଟ ଭିତର ପଟୁ ବନ୍ଦ କରି ଦେଇ ଅନ୍ୟ ଏକ ଅସ୍ଥାୟୀ ଦ୍ୱାର ଦେଇ ଅଭିଯୁକ୍ତ ବାହାରକୁ ଚାଲିଯାଇଥିଲେ । ଜମିବାଡ଼ି ବିବାଦକୁ ନେଇ ଏହି ହତ୍ୟାକାଣ୍ଡ ଘଟିଥିଲା । ''
ଏହା ମଧ୍ୟ ପଢନ୍ତୁ-ସମ୍ବଲପୁର ମାଆ-ଝିଅ ମୃତ୍ୟୁର ଖୁଲାସା, ଶ୍ବାସରୁଦ୍ଧ ପରେ ପେଟ୍ରୋଲ ଢାଳି ପୋଡ଼ିଥିଲେ ବାପା-ପୁଅ ଏହା ମଧ୍ୟ ପଢନ୍ତୁ :- ଶୋଇଥିବା ବେଳେ ଲାଗିଗଲା ନିଆଁ, ମାଆ-ଝିଅ ଜୀବନ୍ତ ଦଗ୍ଧ, ସମ୍ପର୍କୀୟ ଆଣିଲେ ହତ୍ୟା ଅଭିଯୋଗ |
ସମ୍ବଲପୁର ଅତିରିକ୍ତ ଏସପି ଅଜୟ କୁମାର ମିଶ୍ର କହିଛନ୍ତି , ''ଦୁଇ ଅଭିଯୁକ୍ତ ବାପା ପୁଅ ଜଗନ୍ନାଥ ଓ ସଙ୍କେତ ନିଜ ଦୋଷ ସ୍ବିକାର କରିଛନ୍ତି । ସେମାନେ କେମିତି ଦୁଇ ଜଣଙ୍କୁ ହତ୍ୟା କରିଥିଲେ ତାହା ମାନିଛନ୍ତି । କ୍ରାଇମ ସିନ ରିକ୍ରିଏସନ ସମୟରେ ଲୁଚାଇ ରଖିଥିବା ଦୁଇଟି ପେଟ୍ରୋଲ ବୋତଲ ଜବତ ହୋଇଛି । ସମ୍ପତ୍ତି ବିବାଦ ନେଇ ହତ୍ୟାକାଣ୍ଡ ଘଟିଛି । ''
ବୁଧବାର ସଦର ଥାନା ଅନ୍ତର୍ଗତ ମାନେଶ୍ଵର ହାଟପଦାରେ 95 ବର୍ଷୀୟା ବୃଦ୍ଧା ସ୍ନେହଲତା ଦୀକ୍ଷିତ ଏବଂ ତାଙ୍କର 62 ବର୍ଷୀୟା ଝିଅ ସଇରେନ୍ଦ୍ରୀ ଦୀକ୍ଷିତଙ୍କର ଅର୍ଦ୍ଧଦଗ୍ଧ ମୃତଦେହ ଘର ମଧ୍ୟରୁ ସନ୍ଦେହଜନକ ଅବସ୍ଥାରେ ଠାବ ହୋଇଥିଲା । ପ୍ରାଥମିକ ଭାବେ ଏହା ଏକ ଅଗ୍ନିକାଣ୍ଡ ବୋଲି ସନ୍ଦେହ କରାଯାଉଥିଲେ ସୁଦ୍ଧା ମୃତ ବୃଦ୍ଧା ସ୍ନେହଲତାଙ୍କର ଅନ୍ୟ ଜଣେ ଝିଅ ଏହା ହତ୍ୟାକାଣ୍ଡ ବୋଲି ଅଭିଯୋଗ କରିଥିଲେ । ଜମିବାଡି ବିବାଦ ପାଇଁ ମାଆ ଓ ବଡ଼ ଭଉଣୀଙ୍କୁ ଭାଇ ହତ୍ୟା କରିଛି ବୋଲି କହିଥିଲେ । ପରେ ପୋଲିସ ଘଟଣାର ତଦନ୍ତ କରିବା ପରେ ସତ ସାମ୍ନାକୁ ଆସିଥିଲା ।
ଇଟିଭି ଭାରତ, ସମ୍ବଲପୁର
