ଜଗତସିଂହପୁର: ଜିଲ୍ଲା ତ୍ରିର୍ତ୍ତଲ ବ୍ଲକ ଅନ୍ତର୍ଗତ ଅରିଲୋ ସ୍ଥିତ ଶିଶୁ ଅନନ୍ତ ଆଶ୍ରମ ପରିସରରେ ୫୫ତମ ବାର୍ଷିକ ଚତୁର୍ଦ୍ଦଶୀ ମେଳା ଶନିବାର ଉଦଘାଟିତ ହୋଇଛି । ଏହି ଅବସରରେ ବିଶ୍ୱ ଶାନ୍ତି ଲାଗି ବିଶ୍ବ ପତାକା ଉତ୍ତୋଳନ ଓ ସର୍ବଧର୍ମ ପ୍ରାର୍ଥନା ସଭା ଅନୁଷ୍ଠିତ ହୋଇଛି । ପଦ୍ମଶ୍ରୀ ବାବା ବଳିଆଙ୍କ ଅଧ୍ୟକ୍ଷତାରେ ଆୟୋଜିତ ଉଦଘାଟନୀ ସଭାରେ ବାବା ବଳିଆ କହିଛନ୍ତି ଯେ, ସମଗ୍ର ବିଶ୍ଵରେ ଗୋଟିଏ ଧର୍ମ ହେଉଛି ମାନବିକତାର ଧର୍ମ । ଧର୍ମ ଶବ୍ଦ ପୂର୍ବରୁ କୌଣସି ଶବ୍ଦ ଯୋଡ଼ାଗଲେ ତାହା ସମ୍ପ୍ରଦାୟରେ ପରିଣତ ହୋଇଥାଏ । ତାହା ଧର୍ମ ପଦବାଚ୍ୟ ହୁଏ ନାହିଁ । ବିଶ୍ବରେ ମାନବ ଧର୍ମ ହିଁ ସର୍ବଶ୍ରେଷ୍ଠ ଧର୍ମ । ସମସ୍ତେ ଇଶ୍ବରଙ୍କ ସନ୍ତାନ । ଧର୍ମ ନାମରେ ହତ୍ୟା ଆତଙ୍କ ସୃଷ୍ଟି କରାନଯାଉ ବୋଲି କହିଥିଲେ । ସମନ୍ବୟ ଓ ଭାତୃତ୍ବ ଭାବ ଦ୍ବାରା ହିଁ ବିଶ୍ଵରେ ଶାନ୍ତି ପ୍ରତିଷ୍ଠା ସମ୍ଭବ ।
ବାବା ବଳିଆ ଆହୁରି ମଧ୍ୟ କହିଛନ୍ତି ଯେ, ବର୍ତ୍ତମାନ ବିଶ୍ୱରେ ତାପମାତ୍ରା ସୀମା ଲଙ୍ଘନ କରିଛି । ଅନନ୍ତ ବଳିଆ ଆଶ୍ରମ ପକ୍ଷରୁ ଚଳିତ ବର୍ଷ 1 ଲକ୍ଷ ବୃକ୍ଷରୋପଣ କରାଯିବ । ଓଡ଼ିଆ ଓ ଓଡ଼ିଶା ବାହାରେ ଗଛ ଲଗାଯିବାର ବ୍ୟବସ୍ଥା କରାଯାଇଥିବା ବେଳେ ଭାରତ ବାହାରେ, ଆମେରିକା, ଚୀନ, ଋଷ ଆଦି ଦେଶରେ ଗଛ ଲଗାଯିବାକୁ ନିଷ୍ପତ୍ତି ନିଆଯାଇଥିବା କହିଥିଲେ । ଏହି ସର୍ବ ଧର୍ମ ପ୍ରାର୍ଥନା ସଭାରେ ପ୍ରତିଟି ସମ୍ପ୍ରଦାୟର ଅନୁଗାମୀମାନେ ଯୋଗଦେଇ ବିଶ୍ୱଶାନ୍ତି ପାଇଁ ପ୍ରାର୍ଥନା କରିଥିଲେ ।
ଏଥିରେ ବୌଦ୍ଧ ଧର୍ମର ଭନ୍ତେ ଧର୍ମରତ୍ନ ଓ ଭନ୍ତେ ଧର୍ମ ଗବେଷକ ଦିଗମ୍ବର, ଜୈନ ସମ୍ପ୍ରଦାୟର ରାଜେଶ କୁମାର ଓ ଖ୍ରୀଷ୍ଟ ଧର୍ମର ମିହିର କୁମାର ସିଂହ, ଇସଲାମ ଧର୍ମର ସେକ୍ ମହମ୍ମଦ ସକିଲ ଅହମ୍ମଦ, ବକ୍ତିଆର ଅଲ୍ଲୀ ଓ ତିଲକ ବାବୁ, ବ୍ରାହ୍ମ ସମ୍ପ୍ରଦାୟର ମହାତ୍ମା ନିତି ନିତି ପ୍ରେମାନନ୍ଦ, ପାଗଳ ବାବା, ପ୍ରେମଦା ମଦାସାନନ୍ଦ, ମହିମା ଅଲେଖ ସମ୍ପ୍ରଦାୟର କୃଷ୍ଣ ବାବା ପ୍ରମୁଖ ଯୋଗଦାନ କରି ବିଶ୍ୱଶାନ୍ତି ଉଦ୍ଦେଶ୍ୟରେ ପ୍ରାର୍ଥନା କରିଥିଲେ । ସମସ୍ତ ଧର୍ମଯାଜକଙ୍କୁ ଶିଶୁ ଅନନ୍ତ ଆଶ୍ରମ ପକ୍ଷରୁ ପୁଷ୍ପଗୁଚ୍ଛ ଓ ଉତ୍ତରୀୟ ଦ୍ବାରା ସମ୍ବଦ୍ଧିତ କରାଯାଇଥିଲା ।
ପ୍ରାରମ୍ଭରେ ବିଶ୍ବ ପତାକା ଉତ୍ତୋଳନ ଓ ବିଶ୍ଵ ସଙ୍ଗୀତ ଗାନ କରାଯାଇଥିଲା । ଏହି କାର୍ଯ୍ୟକ୍ରମକୁ ଆଶ୍ରମର ମନୁଦାସ ସଂଯୋଜନା କରିଥିବାବେଳେ ପରିଚାଳନାରେ ବାବାଜୀ ଶ୍ରୀବାସ ଦାସ, ଡ଼ ସ୍ବାମୀ ଚିଦାନନ୍ଦ ବ୍ରହ୍ମଚାରୀ, ବିମ୍ବାଧର ଦାସ ଓ ଗୋପାଳ ଦାସ ପ୍ରମୁଖ ଉପସ୍ଥିତ ଥିଲେ ।
ଇଟିଭି ଭାରତ, ଜଗତସିଂହପୁର
