ଭୁବନେଶ୍ବର: ପଦ୍ମଶ୍ରୀ ପୁରସ୍କାର 2024 ପାଇଁ ମନୋନୀତ ହୋଇଥିବା ଓଡ଼ିଆ ଶିଳ୍ପୀ ବିନୋଦ ମହାରଣାଙ୍କୁ ସମ୍ମାନିତ କଲା କଂଗ୍ରେସ । ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକ ପଟ୍ଟଚିତ୍ର ଶିଳ୍ପୀ ବିନୋଦ ମହାରଣାଙ୍କୁ ସମ୍ମାନିତ କରିଛନ୍ତି । ବିନୋଦ ମହାରଣାଙ୍କ ପୁରୁଣା ଭୁବନେଶ୍ୱର ସ୍ଥିତ ବାସଭବନରେ ସାକ୍ଷାତ କରି ଉପଢୌକନ ଓ ପୁଷ୍ପଗୁଚ୍ଛ ଦେଇ ତାଙ୍କୁ ସମ୍ମାନିତ କରାଯାଇଛି । ତେବେ ପଟ୍ଟଚିତ୍ର ଶିଳ୍ପୀ ବିନୋଦ ମହାରଣା କଳା କ୍ଷେତ୍ରରେ ଓଡ଼ିଶାରୁ ପଦ୍ମଶ୍ରୀ ପୁରସ୍କାର ପାଇବାକୁ ଯାଉଛନ୍ତି ।
ଗତକାଲି (ରବିବାର) ଦିନ ପିସିସି ସଭାପତି ଶରତ ପଟ୍ଟନାୟକ ପଦ୍ମଶ୍ରୀ ପୁରସ୍କାର ପାଇଁ ମନୋନୀତ ହୋଇଥିବା ଓଡ଼ିଶାର ପ୍ରଥମ ପଟ୍ଟଚିତ୍ର ଶିଳ୍ପୀ ବିନୋଦ ମହାରଣାଙ୍କୁ ସମ୍ମାନୀତ କରିଛନ୍ତି । ପୁରୁଣା ଭୁବନେଶ୍ୱର ସ୍ଥିତ ବାସଭବନକୁ ଯାଇ ତାଙ୍କୁ ଉପଢ଼ୌକନ ଏବଂ ପୁଷ୍ପଗୁଚ୍ଛ ପ୍ରଦାନ କରିଛନ୍ତି ଶରତ ପଟ୍ଟନାୟକ । ଏହି ଅବସରରେ ଶରତ ପଟ୍ଟନାୟକ ତାଙ୍କୁ ଓ ପରିବାରବର୍ଗଙ୍କୁ ଅଭିନନ୍ଦନ ଜଣାଇବା ସହ କିଛି ସମୟ ସେମାନଙ୍କ ସହ କଥା ହୋଇଥିଲେ । ତେବେ ପଟ୍ଟଚିତ୍ର ଶିଳ୍ପରେ ପ୍ରଥମ ଥର ପାଇଁ ଜଣେ ଓଡ଼ିଆ ଶିଳ୍ପୀ ଦେଶର ସମ୍ମାନଜନକ ପୁରସ୍କାର ପାଉଛନ୍ତି । ଯାହା ଓଡ଼ିଶା ପାଇଁ ଏକ ଗର୍ବ ଓ ଗୌରବ କଥା ବୋଲି କହିଛନ୍ତି ପିସିସି ସଭାପତି ।
ଅନୁରୂପ ଭାବେ ପୂର୍ବତନ ପ୍ରଦେଶ କଂଗ୍ରେସ ସଭାପତି ଜୟଦେବ ଜେନା, ବିଧାୟକ ତାରାପ୍ରସାଦ ବାହୀନିପତି, ବରିଷ୍ଠ ଉପସଭାପତି ଶିବାନନ୍ଦ ରାୟ, ଭୁବନେଶ୍ୱର ଜିଲ୍ଲା କଂଗ୍ରେସ ସଭାପତି ବିଶ୍ୱଜିତ୍ ଦାସ, ମୁଖପାତ୍ର ରଜନୀ ମହାନ୍ତି, ଭୁବନେଶ୍ୱର ଜିଲ୍ଲା କଂଗ୍ରେସ ନେତା ପ୍ରଶାନ୍ତ ଚମ୍ପତି ଓ ପ୍ରଭାତ ପ୍ରତାପ ସିଂ ପ୍ରମୁଖ ପଦ୍ମଶ୍ରୀ ମହାରଣାଙ୍କୁ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରିଥିଲେ ।
ସୂଚନା ଯୋଗ୍ୟ, ଚଳିତ ବର୍ଷ ଓଡ଼ିଶାର 4 ଜଣ ପଦ୍ମଶ୍ରୀ ପୁରସ୍କାରରେ ସମ୍ମାନିତ ହେବାକୁ ଯାଉଛନ୍ତି । 75 ତମ ସାଧାରଣତନ୍ତ୍ର ଦିବସ ଅବସରରେ ଏନେଇ ଘୋଷଣା କରିଥିଲେ ଭାରତ ସରକାର । ଚଳିତ ବର୍ଷ 5 ଜଣଙ୍କୁ ପଦ୍ମବିଭୂଷଣ, 17 ଜଣଙ୍କୁ ପଦ୍ମଭୂଷଣ ଓ 110ଜଣଙ୍କୁ ପଦ୍ମଶ୍ରୀ ପୁରସ୍କାର ମିଳିବାକୁ ଯାଉଥିବା ବେଳେ ଓଡିଶାର 4 ଜଣଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯିବ । କଳାକ୍ଷେତ୍ରରେ ସମସ୍ତ 4 ଜଣଙ୍କୁ ପଦ୍ମଶ୍ରୀ ପୁରସ୍କାର ପାଇଁ ମନୋନୀତ କରାଯାଇଛି । ତେବେ ସେମାନେ ହେଲେ ଗଞ୍ଜାମର କୃଷ୍ଣଲୀଳାର ସଙ୍ଗୀତକାର ଗୋପୀନାଥ ସ୍ବାଇଁ, ବରଗଡର ଶବ୍ଦ ନୃତ୍ୟ ଶିଳ୍ପୀ ଭାଗବତ ପ୍ରଧାନ, ପଟ୍ଟଚିତ୍ର ଶିଳ୍ପୀ ବିନୋଦ ମହାରଣା ଓ ସମ୍ବଲପୁରର ନାଗ୍ୟକାର ତଥା ଗୀତିକାର ବିନୋଦ ପଶାୟତ ।
ଇଟିଭି ଭାରତ, ଭୁବନେଶ୍ୱର
