ଭୁବନେଶ୍ବର: ଆଜିଠୁ ଆରମ୍ଭ ହୋଇଛି ଅକ୍ଟୋବର ମାସ । ମାସଟା ଯାକ କେବଳ ଛୁଟି ହିଁ ଛୁଟି । ପାର୍ବଣରେ ବୁଲା ବୁଲି କରିବା ସହ ଛୁଟିର ମଜା ନେବେ ସମସ୍ତେ । ବିଶେଷ କରି ସ୍କୁଲ ଛାତ୍ରଛାତ୍ରୀ ମାନେ ଛୁଟିକୁ ଉପଭୋଗ କରିବେ । ଅକ୍ଟୋବର ୨ ଅର୍ଥାତ ଗାନ୍ଧୀ ଜୟନ୍ତୀଠାରୁ ଆରମ୍ଭ ହେବ ମାସର ପ୍ରଥମ ଛୁଟି । ଚଳିତ ମାସରେ ମାତ୍ର ୧୭ଟି କାର୍ଯ୍ୟ ଦିବସ ରହିଛି ।
ଛୁଟିରେ କଟିବ ଅକ୍ଟୋବର:
ବର୍ତ୍ତମାନ ପାର୍ବଣ ଋତୁ ଚାଲିଥିବା ବେଳେ ଚଳିତ ମାସରେ ଦୁର୍ଗାପୂଜା ସାଙ୍ଗକୁ ନବରାତ୍ରୀ ଏବଂ କାଳିପୂଜା ରହିଛି । ଦଶହରାରରେ ବୁଲାବୁଲି କରିବାକୁ ଓ କାଳିପୂଜା ଅର୍ଥାତ ଦୀପାବଳିରେ ବାଣ ଫୁଟାଇବାକୁ ଅନାଇ ବସିଥାନ୍ତି ସମସ୍ତେ । ସେହି ଦିନ ପାଖେଇ ଆସୁଥିବାରୁ ସ୍କୁଲ କଲେଜ ଛୁଟି ରହିବ । ଦଶହରା ପାଇଁ ଅକ୍ଟୋବର 9ରୁ 16 ତାରିଖ ପର୍ଯ୍ୟନ୍ତ ସ୍କୁଲ ବନ୍ଦ ରହିବ । ଏଥିସହ ଗାନ୍ଧୀଜୟନ୍ତୀ ଓ ଦୀପାବଳିରେ ସ୍କୁଲ ଛୁଟି ରହିବ ।
ଚଳିତ ମାସରେ ୧୪ ଦିନ ଛୁଟି:
ବିଦ୍ୟାଳୟ ଓ ଗଣଶିକ୍ଷା ବିଭାଗର ଏକାଡେମୀକ କ୍ୟାଲେଣ୍ଡର 2024-25 ଅନୁସାରେ ଅକ୍ଟୋବର ମାସରେ ମାତ୍ର ୧୭ ଦିନ କାର୍ଯ୍ୟ ଦିବସ ରହିଛି । ବାକି ଦିନ ଛୁଟି ରହିଛି । ଅର୍ଥାତ ମାସର ଅଧା ଦିନ ଛୁଟି । ଅକ୍ଟୋବର ୨ ତାରିଖରେ ଗାନ୍ଧୀ ଜୟନ୍ତୀ ଛୁଟି ରହିଥିବା ବେଳେ ଦଶହରା ଛୁଟି ୯ ତାରିଖରୁ ଆରମ୍ଭ ହୋଇ ୧୬ ତାରିଖ ପର୍ଯ୍ୟନ୍ତ ରହିଛି । ଏପରିକି ୩୧ ତାରିଖ ଦୀପାବଳି ପାଇଁ ମଧ୍ୟ ଛୁଟି ରହିଛି । ଏଥିରେ ୪ଟି ରବିବାର ମଧ୍ୟ ସାମିଲ ରହିଛି ବୋଲି ବିଭାଗ ପକ୍ଷରୁ ଏକାଡେମିକ କ୍ୟାଲେଣ୍ଡରରେ ପ୍ରକାଶ ପାଇଛି ।
- ଚଳିତ ମାସର ଛୁଟି ତାଲିକା
- ଅକ୍ଟୋବର ୨ ଗାନ୍ଧୀ ଜୟନ୍ତୀ ଛୁଟି
- ଅକ୍ଟୋବର ୬,୧୩ ,୨୦ ଓ ୨୭ ତାରିଖ ରବିବାର
- ଅକ୍ଟୋବର ୯ରୁ ୧୭ ଦଶହରା ଛୁଟି
- ଅକ୍ଟୋବର ୩୧ ଦୀପାବଳି ଛୁଟି
ଏହା ମଧ୍ୟ ପଢନ୍ତୁ-ମୋହନ ମାଝୀ ସରକାରଙ୍କ ବଡ ଘୋଷଣା; ସରୋଗେସି ପାଇଁ ସରକାରୀ ଛୁଟି - Surrogacy Leave
ଏହା ମଧ୍ୟ ପଢନ୍ତୁ-କର୍ମଚାରୀଙ୍କୁ ଖୁସି କରାଇଲେ ମୋଦି, ବଢାଇଲେ ସମସ୍ତଙ୍କ ମଜୁରୀ - Minimum wages hike
ଦଶହରା ଛୁଟିକୁ ନେଇ ପିଲା ଖୁସ୍ :
କଟକ ଦଶହରା ପ୍ରସିଦ୍ଧ ହୋଇଥିଲେ ମଧ୍ୟ ରାଜ୍ୟର ବିଭିନ୍ନ ସ୍ଥାନରେ ଦଶହରା ପର୍ବ ବେଶ ଜାକଜକମରେ ପାଳନ କରାଯାଇଥାଏ । ଦଶହରାର ମଜା ନେବାକୁ କିଏ ବନ୍ଧୁ ପରିଜନଙ୍କ ଘରକୁ ଯାଇଥାଏ ତ ଆଉ କିଏ ବାହାରକୁ ବୁଲାବୁଲି କରିବାକୁ । କାହିଁକି ନା ଏହି ସମୟରେ ଲମ୍ବା ଛୁଟି ମିଳିଥାଏ । ବିଶେଷ କରି ସ୍କୁଲ ପିଲାମାନେ ଅଧିକ ଖୁସି ଥାଆନ୍ତି । ଧାନକଟା ଛୁଟି ପରେ ଲମ୍ବା ସମୟ ପାଇଁ ଦଶହରାରେ ଛୁଟି ମିଳିଥାଏ । ଦଶହରାରେ ନୂଆ ଡ୍ରେସ ପିନ୍ଧି ବୁଲା ବୁଲି କରିବା ସହ ମେଢ଼ ଦେଖାକୁ ନେଇ ପିଲାଙ୍କ ମନରେ ଉତ୍ସାହ ଭାରି ରହିଛି । ଛୁଟି ଦିନର ମାମୁଁ ଘର ବୁଲିଯିବା ସହ ପରୀକ୍ଷା ପାଇଁ ପ୍ରସ୍ତୁତି କରିବାକୁ ପଡ଼ିବ ବୋଲି କହିଛନ୍ତି ଛାତ୍ର ଛାତ୍ରୀ।
ପରୀକ୍ଷା ପାଇଁ ପ୍ରସ୍ତୁତି:
ଛୁଟି ଦିନକୁ ନେଇ କ୍ୟାପିଟାଲ ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ନିରୁପମା ମଙ୍ଗରାଜ କହିଛନ୍ତି , ''ଦଶହରା ଛୁଟି ସବୁଠାରୁ ବଡ ଛୁଟି ଅଛି । ୯ ରୁ ୧୭ ତାରିଖ ପର୍ଯ୍ୟନ୍ତ ସ୍କୁଲ ଛୁଟି ରହିବ । ୧୮ରେ ସ୍କୁଲ ଖୋଲିବ । ଅକ୍ଟୋବର ୩ ତାରିଖରୁ ୮ ତାରିଖ ମଧ୍ୟରେ ନବମ ଓ ଦଶମ ଶ୍ରେଣୀ ପିଲାଙ୍କ ପରୀକ୍ଷା ହେବ । ଏହାପରେ ଦଶହରା ଛୁଟି ରହିଛି ।
ଜଣେ ଛାତ୍ର କହିଛନ୍ତି, '' ଦଶହରା ଛୁଟିରେ ଆମେ ବୁଲାବୁଲି କରିବୁ ଓ ଦେବୀ ଦୁର୍ଗା ମାଆଙ୍କ ଦର୍ଶନ କରିବୁ । ପରେ ଆନୁଆଲ ପରୀକ୍ଷା ପାଇଁ ପଢାପଢି କରିବୁ । ଛୁଟିରେ ମୋର ପ୍ରୋଜେକ୍ଟ କିରବି । ଛୁଟିରେ ବୁଲିବା ସହ ପାଠପଢାରେ ମନ ଦେବି । ''
ନଭେମ୍ବରର କେତେ ଦିନ ଛୁଟି ?
ନଭେମ୍ବର ମାସରେ ୨୩ଟି କାର୍ଯ୍ୟ ଦିବସ ରହିଥିବା ବେଳେ ଡିସେମ୍ବର ମାସରେ ୧୮ ଟି, 2025 ଜାନୁଆରୀ ମାସରେ ୨୨, ଫେବୃଆରୀରେ ୨୩ ଓ ମାର୍ଚ୍ଚରେ ୨୧ଟି ଲେଖାଏଁ କାର୍ଯ୍ୟ ଦିବସ ରହିଛି । ଅର୍ଥାତ ମାସର ଅନ୍ୟ ଦିନଗୁଡ଼ିକ ଛୁଟି ରହିବ ।
ଇଟିଭି ଭାରତ, ଭୁବନେଶ୍ବର
